కలం, వెబ్డెస్క్: లక్ అంటే అతనిదే. మ్యాచ్ చూడ్డానికి వెళ్లి.. ఒకటీ రెండూ కాదు ఏకంగా కోటి రూపాయలను ఒంటిచేత్తో పట్టేశాడు (Fan wins one crore). సదరు లక్కీ పర్సన్కు ఈ లక్కీయెస్ట్ ఇన్సిడెంట్ సౌతాఫ్రికా టీ20 లీగ్ ఎస్ఏ20లో (SA20) జరిగింది. ఈ సీజన్ మొదటి మ్యాచ్ శనివారం దక్షిణాఫ్రికాలోని కేప్టౌన్లో డర్బన్స్ సూపర్ జెయింట్స్, ఎంఐ కేప్టౌన్ మధ్య జరిగింది. ఇందులో కేప్టౌన్ ఇన్నింగ్స్ జరుగుతుండగా, ఆ జట్టు ఆటగాడు రియాన్ రికెల్టన్ కొట్టిన ఓ బంతి ప్రేక్షకుల గ్యాలరీలోకి దూసుకొచ్చింది. అక్కడే స్నేహితులతో కలసి మ్యాచ్ చూస్తున్న ఓ వ్యక్తి వెంటనే పైకి లేచి క్యాచ్ కోసం ఎడమ చేయి చాచాడు. అంతే, ఆ బంతి నేరుగా అతని చేతిలో పడింది. దీంతో ఆ వ్యక్తి ఆనందానికి అవధులు లేకపోయాయి. కాగా, మ్యాచ్లో ఎవరైనా ఒంటి చేత్తో క్యాచ్ పడితే బెట్వే సంస్థ 2 మిలియన్ల సౌతాఫ్రికా డాలర్లు ఇస్తుంది. ఇది ప్రస్తుతం మన భారత కరెన్సీలో రూ.1కోటీ 7లక్షలకు సమానం. అయితే, దీని కోసం కొన్ని నియమాలు ఉన్నాయి. క్యాచ్ను కేవలం ఒంటిచేత్తోనే పట్టాలి. శరీరంలోని ఇతర భాగాల (భుజం, ఛాతీ) తోపాటు డ్రస్, టోపీ వంటివి తగలకూడదు. 18 ఏళ్లు నిండిన వ్యక్తి మాత్రమే అర్హులు. ఇప్పటి వరకు ఇలా ముగ్గురు మాత్రమే కోటి రూపాయలు గెల్చుకున్నారు.
కాగా, పరుగుల వరద పారిన ఈ మ్యాచ్లో తొలుత బ్యాటింగ్ చేసిన డర్బన్ నిర్ణీత ఓవర్లలో 5 వికెట్ల నష్టానికి 232 పరుగులు చేసింది. డెవాన్ కాన్వే(64; 33 బంతుల్లో 7 ఫోర్లు, 2 సిక్స్లు) చేయగా, కేన్ విలియమ్సన్(40)తోపాటు బట్లర్(20), క్లాసెన్(22), మార్క్రమ్(35), జోన్స్(33) తలో చేయి వేశారు. అనంతరం ఛేదనలో కేప్టౌన్ కెప్టెన్, ముంబై ఇండియన్స్ ఆటగాడు రికెల్టన్(113; 63 బంతుల్లో 5 ఫోర్లు, 11 సిక్స్లు) విరుచుకుపడినప్పటికీ, జేసన్ స్మిత్(41; 14 బంతుల్లో 4 ఫోర్లు, 3 సిక్స్లు) మినహా మిగిలినవాళ్లు రాణించడంతో ఆ జట్టు 15 పరుగుల తేడాతో ఓడింది. తమ జట్టు ఓడినప్పటికీ తను కొట్టిన సిక్స్తో ఓ ప్రేక్షకుడికి మరచిపోలేని ఆనందం ఇచ్చాడు రికెల్టన్.
Read Also: యాంకర్ సుమ కామెంట్లపై వివాదం..
Follow Us On : WhatsApp
