కలం, ఖమ్మం బ్యూరో: జిల్లాలో కోడిగుడ్డు ధర (Egg Price Hike) అమాంతం పెరిగిపోవడంతో సామాన్య, మధ్యతరగతి ప్రజలపై అదనపు భారం పడుతోంది. నెల రోజుల క్రితం వరకు రిటైల్ మార్కెట్లో ఒక్కో కోడిగుడ్డు ధర రూ. 6 ఉండగా, కొద్ది రోజుల వ్యవధిలోనే అది రూ. 8 లకు చేరుకుంది. నిత్యం ప్రోటీన్ ఆహారంగా కోడిగుడ్డును ఆశ్రయించే పేద కుటుంబాలకు ఈ ధరల పెరుగుదల మింగుడుపడటం లేదు. ఒక్కో గుడ్డుపై రూ. 2 పెరగడంతో రోజువారీ బడ్జెట్ తలకిందులవుతోందని వినియోగదారులు ఆందోళన వ్యక్తం చేస్తున్నారు.
ఈ అకస్మాత్తు ధరల పెరుగుదలకు ప్రధానంగా ఎండల తీవ్రత, మార్కెట్లో డిమాండ్కు తగ్గ సరఫరా లేకపోవడమే కారణమని స్థానిక వ్యాపారులు చెప్తున్నారు. ప్రస్తుత వేసవి కాలంలో ఉష్ణోగ్రతలు రికార్డు స్థాయిలో నమోదవుతుండటంతో పౌల్ట్రీ ఫారాలలో గుడ్ల ఉత్పత్తి గణనీయంగా పడిపోయింది. తీవ్రమైన వడగాల్పుల కారణంగా లేయర్ కోళ్లు మేత సరిగ్గా తినకపోవడంతో ఉత్పత్తి సామర్థ్యం తగ్గిందని, దీనికి తోడు ఇటీవలి ఎండలకు తట్టుకోలేక భారీ సంఖ్యలో గుడ్లు పెట్టే కోళ్లు చనిపోవడం కూడా ఈ కొరతకు దారితీసిందని పౌల్ట్రీ నిర్వాహకులు పేర్కొంటున్నారు.
ఒకవైపు కోళ్ల మరణాలతో పౌల్ట్రీ యజమానులు నష్టాల్లో కూరుకుపోగా, మరోవైపు మార్కెట్లో ఏర్పడిన కొరత కారణంగా వినియోగదారులకు గుడ్డు ప్రియంగా (Egg Price Hike) మారింది. కేవలం ఇళ్లలోనే కాకుండా హోటళ్లు, బేకరీలు, ఫాస్ట్ ఫుడ్ సెంటర్లలో కూడా గుడ్డు ధరల ప్రభావం స్పష్టంగా కనిపిస్తోంది. రాబోయే రోజుల్లో వాతావరణం చల్లబడి, పౌల్ట్రీలలో ఉత్పత్తి మళ్లీ యథాస్థితికి వచ్చేంతవరకు గుడ్ల ధరలు ఇలాగే కొనసాగే అవకాశాలు ఉన్నాయని మార్కెట్ వర్గాలు అంచనా వేస్తున్నాయి.
Read Also: ఫోన్పే యూజర్లకు అలర్ట్.. ఈ తప్పు చేస్తే ప్రతి 3 నెలలకు రూ.100 ఫైన్!
Follow Us On: Instagram
