ఢిల్లీ(Delhi)లో వాయుకాలుష్యం తీవ్రరూపం దాలుస్తున్న విషయం తెలిసిందే. మంగళవారం ఢిల్లీ సగటు ఎయిర్ క్వాలిటీ ఇండెక్స్ (ఏక్యూఐ) 382కి చేరింది. ఇది ‘వెరీ పూర్’ విభాగం. ఇక కొన్ని ప్రాంతాల్లో ఈ సంఖ్య 410–420 మధ్య ఉంది. దీంతో ప్రజల్లో తీవ్రమైన ఆందోళనలు నెలకొన్నాయి. ఈ నేపథ్యంలో తాజాగా ఢిల్లీ పర్యావరణశాఖ కీలక నిర్ణయం తీసుకున్నది.
ఢిల్లీలోని ప్రభుత్వ కార్యాలయాలు, ప్రైవేటు సంస్థలు, కార్పొరేట్ ఆఫీసులు, బ్యాంకులు (అత్యవసర సేవలు తప్ప) తమ మొత్తం సిబ్బందిలో 50 శాతం మందిని తప్పనిసరిగా వర్క్ ఫ్రం హోం చేయించాలని పర్యావరణశాఖ ఆదేశాలు జారీ చేసింది. ఈ ఆదేశాలు సోమవారం రాత్రి 8 గంటల నుంచే తక్షణ అమలులోకి వచ్చాయి. పర్యావరణ పరిరక్షణ చట్టం-1986లోని సెక్షన్ 5 నిబంధనల ప్రకారం ఈ ఉత్తర్వులు జారీ అయ్యాయి. ఈ ఆదేశాలు ఉల్లంఘించే సంస్థలపై కఠిన చర్యలు తీసుకుంటామని పర్యావరణ శాఖ తెలిపింది.
ఎందుకు ఈ నిర్ణయం?
ఢిల్లీ(Delhi)లో మొత్తం వాహనాల నుంచి వెలువడే కాలుష్యం, ఎగ్జాస్ట్ పొగ 30 నుంచి 40 శాతం వరకు ఉంటుందని సిస్టమ్ ఆఫ్ ఎయిర్ క్వాలిటీ అండ్ వెదర్ ఫోర్ కాస్టింగ్ అండ్ రీసెర్చ్ (ఎస్ఏఎఫ్ఏఆర్) అధ్యయనాలు చెబుతున్నాయి. రోజూ 80 లక్షలకు పైగా ప్రైవేటు వాహనాలు, వేలాది ఆఫీసు బస్సులు, ఆటోలు రోడ్లపై ఉంటాయి. ఈ సంఖ్యను సగానికి తగ్గిస్తే వాహన కాలుష్యం గణనీయంగా తగ్గుతుందని ప్రభుత్వం భావిస్తోంది.
అయితే ఆస్పత్రులు, డిస్పెన్సరీలు, నర్సింగ్ హోమ్స్ వంటి సంస్థలు పూర్తి స్థాయిలో తమ ఉద్యోగులతో పనిచేయించుకోవచ్చు. పోలీసు స్టేషన్లు, అగ్నిమాపక శాఖ , ఢిల్లీ మెట్రో, డీటీసీ బస్సులు, ఎయిర్‌పోర్ట్ సిబ్బంది, విద్యుత్ సరఫరా, జల్ బోర్డు, పారిశుధ్య కార్మికులు , ఫార్మసీలు, డెయిరీ, కూరగాయల సరఫరా చేసే సంస్థలు, కోర్టులు, రెస్యూ టీమ్ కార్యాలయాల నుంచే పనిచేయనున్నారు.
వైద్య నిపుణుల సలహాలు ఇవే..
పిల్లలు, దీర్ఘకాలిక వ్యాధులతో బాధపడేవాళ్లు బయటకు రావొద్దని పల్మనాలజిస్టులు సూచిస్తున్నారు. వృద్ధులు, గుండె, శ్వాస సంబంధిత వ్యాధులు ఉన్నవారు బయటకు రాకుండా ఉండాలని కోరారు. తప్పనిసరి పరిస్థితుల్లో బయటకు వస్తే ఎన్95 మాస్క్ ధరించాలని సూచిస్తున్నారు. గొంతు నొప్పి, కళ్లు మంట, శ్వాస తీసుకోవడంలో ఇబ్బంది వంటి లక్షణాలు కనిపిస్తే వెంటనే వైద్యుడిని సంప్రదించాలని సలహా ఇస్తున్నారు.
Read Also: లక్నోలో అనధికార కాల్‌సెంటర్ గుట్టు రట్టు.. అమెరికన్లే టార్గెట్..
Follow Us on: Youtube
