కలం, నల్లగొండ : నల్లగొండ (Nalgonda) పట్టణ శివారులోని చర్లపల్లి ఫ్లైఓవర్ బైపాస్ రోడ్డు వద్ద గురువారం ఉదయం ఘోర రోడ్డు ప్రమాదం చోటుచేసుకుంది. రాజస్థాన్కు చెందిన కంటైనర్ అతివేగంగా దూసుకొచ్చి ఒక ద్విచక్ర వాహనాన్ని బలంగా ఢీ కొట్టింది. ఈ ప్రమాదంలో బైక్ నడుపుతున్న వ్యక్తి అక్కడికక్కడే అత్యంత దారుణంగా ప్రాణాలు కోల్పోయారు.
పోలీసులు, స్థానికులు తెలిపిన వివరాల ప్రకారం.. నాగార్జునసాగర్ నియోజకవర్గ పరిధిలోని చలకుర్తి గ్రామానికి చెందిన బొల్లం లింగయ్య తన పని నిమిత్తం ద్విచక్ర వాహనంపై వెళ్తుండగా ఈ విషాదం సంభవించింది. రాజస్థాన్ రిజిస్ట్రేషన్ కలిగిన భారీ కంటైనర్ లారీ.. లింగయ్యను ఢీ కొట్టడమే కాకుండా, ఆయనపై నుండి దూసుకెళ్లింది. ఈ ఘటనలో లింగయ్య శరీరం పూర్తిగా ఛిన్నాభిన్నమై, గుర్తుపట్టలేనంతగా మారిపోయింది. ఈ ప్రమాదానికి సంబంధించి స్థానికులు సంచలన ఆరోపణలు చేస్తున్నారు.
ప్రమాదం జరిగిన సమయంలో సమీపంలో ఆర్టీఓ అధికారులు వాహన తనిఖీలు నిర్వహిస్తున్నారు. ఈ తనిఖీల నుండి తప్పించుకోవాలనే ఉద్దేశంతో లారీ డ్రైవర్ వాహనాన్ని ఒక్కసారిగా వేగంగా పోనిచ్చాడని, ఈ క్రమంలోనే నియంత్రణ కోల్పోయి బైక్ను ఢీ కొట్టాడని ప్రత్యక్ష సాక్షులు ఆరోపిస్తున్నారు. అధికారుల తనిఖీల వల్ల కలిగే భయమే ఈ ప్రాణం పోవడానికి కారణమని స్థానికులు ఆగ్రహం వ్యక్తం చేస్తున్నారు. సమాచారం అందుకున్న వెంటనే స్థానిక పోలీసులు ఘటనా స్థలానికి చేరుకున్నారు. మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. పోలీసులు కేసు నమోదు చేసి దర్యాప్తు ప్రారంభించారు.
