కలం డెస్క్ : కొత్త సినిమాలను పైరసీ చేసి ఐ-బొమ్మ, బప్పం(ibomma Piracy Case) తదితర వెబ్‌సైట్ల ద్వారా పబ్లిక్ డొమెయిన్‌లో పెట్టిన ఆ సంస్థల నిర్వాహకుడు రవిపై బెట్టింగ్ నేరం కింద కొత్తగా కేసులు నమోదు కానున్నాయి. రవి తన వెబ్‌సైట్‌లలో బెట్టింగ్ యాప్‌లను ప్రమోట్ చేయడంతో భారీ మొత్తంలోనే ప్రతి నెలా ఆదాయం వస్తున్నట్లు పోలీసుల విచారణ సందర్భంగా తేలింది. ఇప్పటికే బెట్టింగ్ యాప్‌లపై దర్యాప్తు జరుపుతున్న సీఐడీ విభాగం ప్రస్తుతం రవి పోలీసు కస్టడీ ముగిసిన తర్వాత ఈ విషయమై విచారించే అవకాశమున్నది. బెట్టింగ్ యాప్‌ల ద్వారా రవి(Immadi Ravi)కి ఎంత మొత్తంలో ఆదాయం వచ్చిందీ.. ఆ డబ్బును ఏ అవసరాలకు వినియోగించారు.. ఇలాంటి వివరాలను రాబట్టనున్నది. పైరసీ చట్టం కింద రవిపై పోలీసులు ప్రస్తుతం కేసులు చేయగా త్వరలో బెట్టింగ్ యాప్‌లకు సంబంధించిన కేసులు కూడా చేరే అవకాశమున్నది. నాలుగు బెట్టింగ్ యాప్‌లను ప్రమోట్ చేసినట్లు కస్టడీ సందర్భంగా పోలీసులకు వివరాలు అందాయి.
ibomma Piracy Case | బెట్టింగ్ యాప్‌లను తెలంగాణ ప్రభుత్వం నిషేధించినప్పటికీ యాడ్‌లలో నటించి ప్రచారం చేసిన సినీ నటులపై కేసులు నమోదు చేసిన సీఐడీ ఒక్కొక్కరిని విచారణకు పిలుస్తున్నది. ప్రకాశ్‌రాజ్, శ్రీముఖి తదితర పలువురు సినీ నటులు ఇప్పటికే సీఐడీ అధికారుల విచారణకు హాజరై ఇకపైన బెట్టింగ్ యాప్‌లలో నటించబోమని, వాటి ప్రచారంలో పాలుపంచుకునేది లేదని స్పష్టం చేశారు. ప్రజలకూ బహిరంగంగానే వివరణ ఇచ్చారు. ఆ వరుసలో ఇప్పుడు ఐ-బొమ్మ రవి కూడా చేరారు. సీఐడీ విచారణలో ఎలాంటి అంశాలు వెలుగులోకి వస్తాయో.. బెట్టింగ్ యాప్ ప్రమోషన్ వెనక ఎవరున్నారో.. ఇలాంటివన్నీ వెలుగులోకి వచ్చే అవకాశమున్నది.
Read Also: మణిపూర్‌లో ఆర్ఎస్ఎస్ చీఫ్ సంచలన వ్యాఖ్యలు
Follow Us on : Pinterest
