రెండేళ్ల కిందటి వరకు ప్రాంతీయ పార్టీల్లో అత్యంత బలమైనవి ఏవి? అంటే ఠక్కున గుర్తొచ్చే మొదటి పేరు బీఆర్ఎస్(BRS). ఉద్యమం నుంచి పురుడు పోసుకోవడంతోపాటు రాష్ట్ర సాధనలో ప్రధాన పాత్ర పోషించిన పార్టీగా ప్రజల్లో విపరీత ఆదరణ ఉండేది.అదే ఆ పార్టీకి పదేళ్ల అధికారం ఇచ్చింది.అంతేకాదు, ఫెడరల్ ఫ్రంట్ పేరుతో కేసీఆర్ వివిధ రాష్ట్రాల్లో పర్యటించారు. కాంగ్రెస్, బీజేపీ కూటములకు వ్యతిరేకంగా మరో కూటమి అంటూ తిరిగారు. కానీ, ఫలితం కనిపించలేదు. అదే సమయంలో ప్రజల అంచనాలు అందుకోలేకపోవడం, కుటుంబ పాలన అని ముద్ర పడడం, కాలేశ్వరం ప్రాజెక్టుతో వచ్చిన మచ్చ, ఎమ్మెల్యేల ఒంటెత్తు పోకడలు, అధికార జులుం వెరసి రాష్ట్రంలో పార్టీని అధికారానికి దూరం చేశాయి. ఇదే అదనుగా అధికారంలోకి వచ్చిన కాంగ్రెస్, ఇటు కేంద్రంలో వరుసగా మూడోసారి పీఠమెక్కిన బీజేపీ తెలంగాణలో బీఆర్ఎస్ ను నిర్వీర్యం చేసే ప్రయత్నాలు మొదలుపెట్టాయి. ఈ క్రమంలో పార్టీని సంస్థాగతంగా మరింత బలోపేతం చేయాలనే నిర్ణయం బీఆర్ఎస్ చేస్తున్నట్లు తెలుస్తోంది. అందులో భాగమే సభ్యత్వ నమోదుపై సమీక్ష.
నిజానికి బీఆర్ఎస్(BRS) పార్టీ గతంలోనే సభ్యత్వ నమోదు అట్టహాసంగా చేసింది. తమకు ఏకంగా 60లక్షల మంది క్రియాశీల సభ్యులున్నట్లు చెప్పుకుంది. వాస్తవానికి ఆ స్థాయిలో సభ్యత్వం నిజంగా జరిగి ఉంటే బీఆర్ఎస్ మూడోసారి అధికారంలోకి వచ్చి ఉండేదనే విషయం కాస్తోకూస్తో రాజకీయ పరిజ్థానం ఉన్న ఎవరికైనా సులభంగా అర్థమవుతుంది. కారణం, గత ఎన్నికల్లో బీఆర్ఎస్, కాంగ్రెస్ మధ్య ఓట్ల వ్యత్యాసం.అప్పట్లో కాంగ్రెస్ సైతం 40లక్షల సభ్యత్వం చేసినట్లు ఘనంగా ప్రకటించుకుంది. దీనికిగాను అప్పటి పీసీసీ అధ్యక్ష హోదాలో రేవంత్ రెడ్డి(Revanth Reddy) తమ నాయకుడు రాహుల్ గాంధీ నుంచి ప్రశంసలూ పొందారు. అదే సమయంలో బీజేపీ కూడా తమకు 40లక్షల మంది సభ్యత్వం ఉన్నట్లు ప్రకటించుకుంది. ఈ సభ్యత్వం వివరాలు పరిశీలిస్తే భారత రాష్ట్ర సమితి సులభంగా అధికారంలోకి రావాల్సిందని అనిపిస్తుంది. కానీ, అలా జరగలేదు. దీన్ని బట్టి ఆ పార్టీ సభ్యత్వం లెక్కలు అసలైనవి కావని అర్థమవుతోంది.
ఈ క్రమంలో తమ తప్పును సరిదిద్దుకునే ప్రయత్నంలో ఉన్న బీఆర్ఎస్ తాజాగా జరగనున్న పంచాయతీ ఎన్నికలను(Panchayat Elections) కొలమానంగా తీసుకోవాలని భావిస్తోంది. ఫలితాల తర్వాత ఆయా ప్రాంతాల్లో తమ అభ్యర్థుల గెలుపోటములు, అక్కడ తమ పార్టీకి ఉన్న సభ్యత్వాన్ని పోల్చనుంది. తద్వారా ఎక్కడ నిజమైన సభ్యత్వం ఉందో తేల్చి, దానికి అనుగుణంగా తదుపరి నిర్ణయాలు తీసుకోనుంది.మరోవైపు కాంగ్రెస్, బీజేపీ ఇప్పటికే బీఆర్ఎస్ శ్రేణులను, సభ్యులను తమ వైపు తిప్పుకోవడంలో తలమునకలై ఉన్నాయి. ఆ ప్రయత్నంలో అవి చాలా వరకు విజయం సాధించాయి కూడా.ఈ క్రమంలో బీజేపీని, కాంగ్రెస్ ను ఎదురించి తిరిగి పునర్వైభవం సాధించడం బీఆర్ఎస్ కు కత్తి మీద సాము వంటిదే.
అటు కాంగ్రెస్… ఇటు బీజేపీ:
ఎవరేమన్నా, ఎన్ని చెప్పినా బీఆర్ఎస్ బలం నిస్సందేహంగా కేసీఆర్(KCR) మాత్రమే. రాష్ట్ర సాధనలో, పార్టీని అధికారంలోకి తేవడంలో ఆయన పాత్ర ఎవరూ కాదనలేనిది. అయితే, గత శాసనసభ ఎన్నికల్లో పార్టీ ఓటమి తర్వాత ఆయన పూర్తిగా ఫామ్ హౌస్ కే పరిమితమయ్యారు. శాసనసభకు కూడా రావడం లేదు. ఇటీవల జరిగిన జూబ్లీహిల్స్ ఎన్నికలకు ప్రచారానికి వస్తారని పార్టీ శ్రేణులు అనుకున్నా, ఆయన రాలేదు. అంతేకాదు, కుటుంబంలో చోటుచేసుకున్న సమస్యలను పరిష్కరించడంలోనూ ఆయన చొరవ చూపించడం లేదని ప్రజలు భావిస్తున్నారు. కుమార్తె విషయంలో ఆయన తీసుకున్న నిర్ణయం కూడా పార్టీ శ్రేణుల్లో చాలా మందికి రుచించలేదు. నిజానికి బీఆర్ఎస్ బలం పోరాటాలు. తెలంగాణ రాష్ట్ర సమితి(టీఆర్ఎస్)గా ఉన్నప్పుడు ఆ పార్టీ పోరాటాలు ప్రజలను కదిలించాయి. అధికారాన్ని తెచ్చి ఇచ్చాయి. కానీ, ఆ అధికారం గత ఎన్నికల్లో దూరమైంది. దాని కారణాలు అనేకం. కానీ, వాటన్నిటినీ చక్కదిద్దుకోవడంలో మాత్రం ఆ పార్టీ ఇప్పటికీ సరైన ప్రయత్నాలు చేస్తున్నట్లు కనిపించడం లేదు.కనీసం కుటుంబ సమస్యలనైనా పరిష్కరించే ప్రయత్నం చేస్తున్నట్లు లేదు. మరోవైపు యూరియా కొరత, ధాన్యం సేకరణలో ప్రభుత్వ అలసత్వం, భారీ వర్షాల కారణంగా పంట నష్టం, ఆరు గ్యారెంటీలు సక్రమంగా అమలు చేయకపోవడం, శాంతి భద్రతలు క్షీణించడం వంటి వాటి వల్ల ప్రజల్లో ప్రభుత్వంపై తీవ్ర వ్యతిరేకత ఉందని నమ్మిన బీఆర్ఎస్ అవే రాబోయే ఎన్నికల్లో తమను అధికారంలోకి తీసుకువచ్చేలా చేస్తాయని కూడా భ్రమల్లో మునిగింది.
కానీ, జూబ్లీహిల్స్ ఫలితం వాటిని చెరిపేసింది.పైకి ఎన్ని చెప్పుకున్నా ఈ ఫలితం బీఆర్ఎస్ కు తీవ్ర నిరాశ కలిగించిందని చెప్పక తప్పదు. పార్టీ శ్రేణుల్లో నిస్తేజం నింపింది. ఇప్పటికే బీసీలు, దళితులను తమవైపు తిప్పుకునే ప్రయత్నంలో కాంగ్రెస్ ఉండగా, హిందుత్వ నినాదంతో అగ్రకులాలను బీజేపీ తన వైపు తిప్పుకుంటోంది. ముఖ్యంగా బీఆర్ఎస్ కు బలంగా చెప్పుకునే అగ్రకులాల యువతరం బీజేపీ వైపు మొగ్గు చూపుతుండడం ఉద్యమపార్టీని కలవరపాటుకు గురిచేస్తోంది. ఈ పరిణామాలన్నీ బీఆర్ఎస్ ను బలహీనం చేస్తున్నాయనడంలో సందేహం లేదు. పార్టీ కకావికలు కాకుండా కాపాడుకోవడం, శ్రేణులను ఇతర పార్టీల వైపు మళ్లకుండా చూసుకోవడం ప్రస్తుతం బీఆర్ఎస్(BRS) ముందున్న అతి పెద్ద సవాళ్లు. వీటిని అధిగమించలేకపోతే ఆ పార్టీ బలహీనమై, పూర్తిగా కనుమరుగు అయినా ఆశ్చర్యం లేదు.
Read Also: ఎమ్మెల్యేలపై స్థానిక భారం వేసిన కేటీఆర్
Follow Us On : Instagram
