కలం, వెబ్ డెస్క్ : న్యూజిలాండ్తో రెండో టెస్టుకు ముందు ఇంగ్లాండ్ క్రికెట్లో తీవ్ర కలకలం రేగింది. లార్డ్స్ టెస్టు విజయం అనంతరం అర్ధరాత్రి కర్ఫ్యూ నిబంధనలను ఉల్లంఘించి, ఒక నైట్క్లబ్ వద్ద రగ్బీ ఆటగాడితో గొడవకు దిగిన కేసులో రెగ్యులర్ కెప్టెన్ బెన్ స్టోక్స్, సీమర్ గస్ అట్కిన్సన్లపై ఇంగ్లాండ్ అండ్ వేల్స్ క్రికెట్ బోర్డు (ECB) అంతర్గత విచారణకు ఆదేశించింది. అంతేకాకుండా, వీరిద్దరినీ రెండో టెస్ట్ మ్యాచ్ నుంచి తప్పించింది. ఈ ఘటనపై ఇంగ్లాండ్ హెడ్ కోచ్ బ్రెండన్ మెకల్లమ్ (Brendon McCullum) స్పందిస్తూ తీవ్ర ఆందోళన వ్యక్తం చేశారు.
మొదట ఈ విషయం తెలిసినప్పుడు తనకు ఎంతో ఆశ్చర్యం, కోపం, తీవ్ర నిరాశ కలిగాయని, ఎందుకంటే జట్టు కోసం తాము నిర్దేశించుకున్న క్రమశిక్షణా ప్రమాణాలకు ఇది పూర్తి విరుద్ధమని పేర్కొన్నారు. అయితే, ఆటగాళ్లతో మాట్లాడిన తర్వాత తన కోపం కాస్తా ఆందోళనగా మారిందని, ముఖ్యంగా స్టోక్స్ మానసిక పరిస్థితిపై తనకు చింతగా ఉందన్నారు. ఈ వివాదం కారణంగా స్టోక్స్ కెప్టెన్సీ ప్రమాదంలో పడుతుందా అన్న ప్రశ్నకు స్పందిస్తూ, ప్రస్తుతానికి తనకు స్టోక్స్ క్షేమమే ముఖ్యమని, భవిష్యత్తు నిర్ణయాల గురించి ఆలోచించే సమయం ఇది కాదని మెకల్లమ్ స్పష్టం చేశారు. గత నాలుగేళ్లుగా స్టోక్స్ అద్భుతమైన కెప్టెన్గా, ఆటగాడిగా జట్టుకు ఎన్నో విజయాలు అందించాడని గుర్తుచేశారు. ఈ ఘటన జరిగినప్పటి నుండి తాను స్టోక్స్తో ప్రతిరోజూ మాట్లాడుతున్నానని, ఈ కష్టసమయంలో అతనికి, జట్టుకు అండగా నిలవడమే తమ బాధ్యతని ఆయన వివరించారు.
