కలం, వెబ్ డెస్క్ : మానవ అంతరిక్ష పరిశోధన చరిత్రలో మరో సువర్ణ అధ్యాయం మొదలైంది. దశాబ్దాల నిరీక్షణకు తెరదించుతూ, మనిషిని తిరిగి చంద్రుడి వైపు పంపే లక్ష్యంతో నాసా (NASA) చేపట్టిన అత్యంత ప్రతిష్టాత్మకమైన ‘ఆర్టెమిస్-II’ (Artemis II) మిషన్ విజయవంతంగా నింగిలోకి దూసుకెళ్లింది. ఫ్లోరిడాలోని కెనడీ స్పేస్ సెంటర్ నుంచి ఈ రోజు తెల్లవారుజామున సరిగ్గా 4.04 గంటలకు శక్తివంతమైన రాకెట్ ద్వారా ఓరియన్ స్పేస్క్రాఫ్ట్ అంతరిక్షంలోకి ప్రయాణమైంది.
నలుగురు వ్యోమగాములతో కూడిన ఈ నౌక, ప్రయోగించిన కొద్దిసేపటికే విజయవంతంగా తొలి కక్ష్యలోకి ప్రవేశించినట్లు శాస్త్రవేత్తలు ధృవీకరించారు. భూమి నుంచి చంద్రుడి వైపు ప్రయాణాన్ని ప్రారంభించిన ఈ బృందం, చందమామ చుట్టూ ప్రదక్షిణలు చేసి తిరిగి సురక్షితంగా భూమికి చేరుకోనుంది. దాదాపు యాభై ఏళ్ల విరామం తర్వాత మనిషి తిరిగి చంద్రమండలానికి వెళ్లే ఈ ప్రయోగం అంతరిక్ష రంగంలో ఒక మైలురాయిగా నిలిచిపోనుంది. ఈ ప్రయోగం సక్సెస్ కావడంతో ప్రపంచవ్యాప్తంగా శాస్త్రవేత్తలు హర్షం వ్యక్తం చేస్తున్నారు.
అంతరిక్షంలో సరికొత్త రికార్డు
అంతరిక్ష పరిశోధనల్లో కెనడా సరికొత్త చరిత్రను లిఖించింది. నాసా (NASA) చేపట్టిన ప్రతిష్టాత్మక ‘ఆర్టెమిస్-II’ (Artemis II) మిషన్లో భాగంగా కెనడాకు చెందిన వ్యోమగామి జెరెమీ హాన్సెన్ చంద్రమండల యాత్రకు ఎంపికయ్యారు. దీని ద్వారా చంద్రుడి వైపు ప్రయాణిస్తున్న తొలి కెనెడియన్, అమెరికన్ కాని మొదటి వ్యక్తిగా ఆయన రికార్డు సృష్టించారు.
ఫ్లోరిడా నుంచి విజయవంతంగా ప్రయోగించిన ఈ మిషన్, మొత్తం నలుగురు వ్యోమగాములను మోసుకెళ్తోంది. దాదాపు 10 రోజుల పాటు సాగే ఈ ప్రయాణంలో ఓరియన్ నౌక చంద్రుడి చుట్టూ తిరుగుతూ పరిశోధనలు చేయనుంది. 1972లో జరిగిన అపోలో మిషన్ తర్వాత మనిషి తిరిగి 50 ఏళ్ల తర్వాత చంద్రుడి చెంతకు వెళ్తుండటం ఇదే మొదటిసారి కావడం విశేషం. ఈ అద్భుత ఘట్టంతో అంతరిక్ష ప్రయోగాల్లో కెనడా తనదైన ముద్ర వేసింది.
Read Also: ఆటో ఎల్పీజీ సంక్షోభం.. బీజేపీ, కాంగ్రెస్ బ్లేమ్ గేమ్
Follow Us On : WhatsApp
