గతంలో ఏపీ ప్రభుత్వం ప్రతిపాదించిన బనకచర్ల ప్రాజెక్టు(Banakacherla Project)ను తెలంగాణ రాష్ట్రం తీవ్రంగా వ్యతిరేకించిన విషయం తెలిసిందే. ఢిల్లీ స్థాయిలో చర్చలు కూడా జరిగాయి. గత కొన్ని రోజులుగా ప్రాజెక్టుపై చర్చ జరగడం లేదు. అయితే తాజాగా ఈ ప్రాజెక్టు విషయంలో ఏపీ కొత్త ఎత్తుగడతో ముందుకు సాగుతున్నట్టు సమాచారం. బనకచర్ల ప్రాజెక్టుకు తెలంగాణ అభ్యంతరం వ్యక్తం చేయడం, కేంద్ర జలసంఘం (సీడబ్ల్యూసీ) అనుమతి నిరాకరించడంతో ఆ టెండర్లను ఏపీ ఉపసంహరించుకున్నది.
కొత్త ప్రణాళిక
ఏపీ ప్రభుత్వం ఆ పాత ప్రాజెక్టును కొత్త రూపంలో, కొత్త పేరుతో మళ్లీ తెరపైకి తెచ్చింది. పోలవరం-నల్లమల సాగర్ లింక్ ప్రాజెక్టు(Polavaram–Nallamala Sagar Link Project) పేరుతో ఈ ప్రాజెక్టును తీసుకొచ్చినట్టు సమాచారం. పోలవరం ప్రాజెక్టు నుంచి వచ్చే గోదావరి “మిగులు జలాలను” ఇప్పటికే ప్రతిపాదించబడిన వెలిగొండ ప్రాజెక్టులో భాగమైన రిజర్వాయర్‌కు తరలించనున్నారు. ఈ రిజర్వాయర్ పేరును అధికారికంగా “నల్లమల సాగర్”గా మార్చారు. దీని కోసం రూ.9 కోట్లతో నిర్మించబోతున్నట్టు తెలుస్తోంది.
కొత్త ప్రతిపాదన ఎందుకు?
తెలంగాణ, కేంద్ర జలసంఘం గతంలో ‘బనకచర్ల’ ప్రాజెక్టు(Banakacherla Project)కు అభ్యంతరం తెలిపాయి. దీంతో ఏపీ ప్రభుత్వం పోలవరం ప్రాజెక్టుతో లింక్ చేసి ఈ కొత్త ప్రాజెక్టును తీసుకొస్తున్నట్టు సమాచారం. కేంద్ర జలసంఘం అనుమతి మేరకు మిగులు జలాలను మాత్రమే తరలిస్తాం అని ఏపీ ప్రభుత్వం చెబుతోంది.
శ్రీశైలం నుంచి కృష్ణా జలాలు కూడా!
ఇది ఒక్కటే కాదు. వెలిగొండ ప్రాజెక్టు ద్వారా శ్రీశైలం జలాశయం నుంచి టన్నెల్ మార్గంలో కృష్ణా నది నీటిని కూడా నల్లమల సాగర్‌కు తీసుకొచ్చే ప్రణాళికలు వేగంగా సాగుతున్నాయి. దీన్ని బట్టి ఏపీ ఒకేసారి గోదావరి, కృష్ణా నదుల నీటిని రాయలసీమ, ప్రకాశం, నెల్లూరు జిల్లాలకు తరలించే ప్రణాళికలో ఉందని స్పష్టమవుతోంది. ఈ పరిణామాలపై తెలంగాణలో తీవ్ర ఆందోళన నెలకొంది.
“పోలవరం నుంచి మిగులు జలాలు అంటూ మొదలుపెట్టి, చివరికి గోదావరి నికర జలాలను, శ్రీశైలం నుంచి కృష్ణా జలాలను కూడా దోచుకెళ్తారు” అని తెలంగాణ నీటిపారుదల శాఖ అధికారులు, రాజకీయ నాయకులు ఆరోపిస్తున్నారు. ఈ ప్రాజెక్టు గోదావరి జల విభజన ఒప్పందం , కృష్ణా జల విభజన ట్రిబ్యునల్ నిబంధనలకు విరుద్ధమని వాదిస్తున్నారు. రూ.9 కోట్ల డీపీఆర్ టెండరు ఇప్పటికే జారీ అయింది. ఈ డీపీఆర్ పూర్తయితే మళ్లీ కేంద్ర జలసంఘం, పర్యావరణ శాఖల అనుమతుల కోసం దరఖాస్తు చేయనున్నారు. ఈ ప్రాజెక్టు పూర్తయితే రాయలసీమలో భారీ ఎత్తున సాగు, తాగునీటి సమస్యలు పరిష్కారమవుతాయని ఏపీ ప్రభుత్వం చెబుతోంది. కానీ తెలంగాణ మాత్రం “మా నీటిని దోచుకుంటున్నారు” అని అభ్యంతరం వ్యక్తం చేస్తోంది. భవిష్యత్‌లో ఏం జరుగుతుందో వేచి చూడాలి.
Read Also: అర్ధరాత్రి రౌడీషీటర్ల ఇంటికి సజ్జనార్
Follow Us on : Pinterest
