కలం, వెబ్ డెస్క్ : చలికాలంలో బయట ఉష్ణోగ్రతలు తగ్గుతుంటాయి. దీంతో చలిని తట్టుకోలేక కొందరు అనారోగ్యం పాలవుతుంటారు. రోగ నిరోధక శక్తి కూడా తక్కువగా ఉంటుంది. జలుబు, దగ్గు లాంటి వైరల్ వ్యాధులు వెంటనే అంటుకుంటాయి. ఈ నేపథ్యంలో శరీరాన్ని వెచ్చగా ఉంచుకోవడం ఎంతో అవసరం. కొన్ని పదార్థాలు (Winter Foods) తినడం ద్వారా బాడీని చలి నుంచి కాపాడుకోవచ్చు. అలాగే, ఈ ఆహారాలు తీసుకోవడం వల్ల శరీరానికి అనేక ప్రయోజనాలు కలిగిస్తాయి.
అల్లం – ఆహారంలో అల్లం భాగం చేసుకోవడం ద్వారా శరీర ఉష్ణోగ్రత పెరగడంతో పాటు రక్త ప్రసరణ మెరుగవుతుంది. టీ లేదా కూరల్లో దీనిని ఉపయోగించవచ్చు.
బెల్లం– బెల్లంలో ఐరన్ సమృద్ధిగా ఉంటుంది. దీనిని తినడం ద్వారా ఒంట్లో శక్తి పెరిగి వేడిగా ఉంచుతుంది. పాలు, టీ, లడ్డు లేదా ఇతర స్వీట్స్ లో బెల్లంను వాడొచ్చు.
నెయ్యి– దీనిని తీసుకోవడం ద్వారా వాటిలో ఉండే కొవ్వులు శరీరానికి ఎంతో మేలు చేస్తాయి. ప్రతి రోజు నెయ్యిని తినడం ద్వారా జీర్ణక్రియ మెరుగుపడుతుంది.
నువ్వులు– నువ్వుల్లో కొవ్వులు, ఐరన్ నిండుగా ఉంటాయి. తెల్ల నువ్వులు లేదా నల్ల నువ్వులను చిక్కీ లేదా లడ్డూలా తయారు చేసుకుని తింటే రుచితో పాటు ఆరోగ్యానికి లాభదాయకం.
డ్రై ఫ్రూట్స్ – బాదం, జీడిపప్పు, వాల్ నట్స్, పిస్తా లాంటి డ్రై ఫ్రూట్స్ తినడం ద్వారా అనే ఉపయోగాలు ఉన్నాయి. వీటిని తినడం ద్వారా శరీరం ధృఢంగా కావడంతో పాటు విటమిన్స్, పోషకాలు అధికంగా సమకూరుతాయి. ప్రతిరోజు నానబెట్టిన డ్రై ఫ్రూట్స్ ను ఉదయం తింటే చాలా లాభాలు ఉంటాయి.
రూట్ వెజిటెబుల్స్ – బీట్ రూట్, క్యారెట్, బంగాళదుంపలను తినడం వల్ల నెమ్మదిగా జీర్ణమై శరీరంలో ఉష్ణోగ్రతలు పెరుగుతాయి. అలాగే చలికాలంలో వచ్చే చర్మ సమస్యల నుంచి రక్షణ కల్పిస్తాయి.
ధాన్యాలు – చలికాలంలో రాగులు, జొన్నలు, ఓట్స్, కొర్రలు, వరిగెలు వంటి మిల్లెట్ ధాన్యాలు తీసుకోవడం ద్వారా స్థిరమైన శక్తి, వేడిని అందిస్తాయి. జావా, ఇడ్లీ, దోశ రూపంలో రాగులు, జొన్నలను ఆహారంగా తినొచ్చు.
వేడీ సూప్స్ – ఈ కాలంలో వేడివేడిగా ఓ సూప్ తాగితే శరీరంలో ఉత్తేజం కలుగుతుంది. దీంతో పాటు జీర్ణక్రియను మెరుగుపరచడంలో ఉపయోగపడుతుంది. కూరగాయలు లేదా చికెన్ సూప్ తీసుకుంటే శరీరం లోపల వేడిగా ఉంటుంది.
గుడ్లు – ప్రతి రోజూ గుడ్లు తినడం ద్వారా శరీరానికి అవసరమైన ప్రొటీన్, ఐరన్, కాల్షియం అందుతాయి. అలాగే తక్షణ శక్తిని ఇచ్చి చలి నుంచి ఉపశమనం కలిగిస్తాయి కూడా. బాయిల్డ్ ఎగ్ లేదా ఆమ్లెట్ రూపంలో తీసుకోవచ్చు. ఉడకబెట్టిన గుడ్డును తినడం వల్ల అధిక ప్రయోజనం కలుగుతుంది.
పసుపు – వంటింట్లో ఉండే ఈ పదార్థం రోగ నిరోధకతను పెంచడంలో గణనీయమైన పాత్ర పోషిస్తుంది. పసుపును కూరల్లో వాడడంతో పాటు పాలలో కలిపి తాగితే మంచి ఫలితాలు ఉంటాయి. అలాగే, చలికాలంలో వేడిని కలిగించే ఇతర ఆహార పదార్థాలు (Winter Foods) తినడం మంచింది.
Read Also: రాహు, కేతు దోషాల నివారణకు సింపుల్ ట్రిక్ !
Follow Us On: Instagram
