నేడు దీక్షాదివస్. తెలంగాణ రాష్ట్ర సాధనే ధ్యేయంగా సరిగ్గా పదహారు ఏండ్ల కిందట తెలంగాణ రాష్ట్ర సమితి అధ్యక్షుడు కేసీఆర్(KCR) ఆమరణ నిరాహార దీక్షకు దిగిన రోజు. ఎవరు అవునన్నా, కాదన్నా రాష్ట్ర ఏర్పాటుకు కీలక శక్తిగా పనిచేసిన ఘట్టమిది. అందుకే ఈ రోజును దీక్షాదివస్(Deeksha Divas) గా జరుపుకోవాలని, కేసీఆర్ సారథ్యంలో సాగిన ఆనాటి పోరాటాన్ని గుర్తు చేసుకోవాలని బీఆర్ఎస్ సంకల్పించింది. ఆ ప్రకారంగానే వాడవాడలా దీక్షాదివస్ జరుపుతోంది. తెలంగాణ తల్లికి నివాళులు, అమరవీరుల స్మారక స్తూపానికి వందనాలు, కేసీఆర్ ఫొటోలకు పాలాభిషేకాలను బీఆర్ఎస్ శ్రేణులు జరుపుతున్నాయి. కానీ, ఈ తతంగంలో అందరినీ ఆశ్చర్యపరిచింది మాత్రం నిస్సందేహంగా తెలంగాణ జాగృతి అధ్యక్షురాలు, ఎమ్మెల్సీ కవిత(Kavitha) తీరు.. ఆమె తన ‘ఎక్స్’ ఖాతాలో పెట్టిన ట్వీట్.
వారి పేర్లు కూడా తలచుకోలేదు:
‘ఒక యోధుని దీక్ష.. అమరుల త్యాగం..’ అంటూ కవిత పెట్టిన దీక్షా దివస్ ట్వీట్ లో ఎక్కడా తన తండ్రి కేసీఆర్ పేరును ప్రస్తావించలేదు. అంతేకాదు, ఫ్రొఫెసర్ జయశంకర్ పేరునూ స్మరించుకోలేదు. కేసీఆర్ కేవలం తన తండ్రి మాత్రమే కాదని, తనకు రాజకీయ మార్గదర్శి కూడా అని ఎన్నోసార్లు కవిత స్వయంగా చెప్పింది. అలాగే దివంగత ప్రొఫెసర్ జయశంకర్ భావజాల స్ఫూర్తి తనలో ఉందని ఇప్పటికీ చెబుతోంది. అయితే, తాజాగా దీక్షా దివస్ కు ఆ ఇద్దరి పేర్లను కనీసం తన ట్వీట్ లో కూడా తలవకపోవడంపై విమర్శలు చెలరేగాయి.ముఖ్యంగా కేసీఆర్ అభిమానులు, బీఆర్ఎస్ శ్రేణులు జీర్ణించుకోలేకపోతున్నాయి. దాంతో‘ఆ యోధుడెవరో చెప్పాల’ని కొందరు, ‘ఆ యోధుని వల్లే నీకు ఇంత గుర్తింపు, ఎన్నో పదవులు వచ్చాయ’ని మరికొందరు.. ‘ఎక్స్’ లో కవిత ట్వీట్ కింద కామెంట్లతో తమ అసంతృప్తిని, ఆక్రోషాన్ని వెళ్లగక్కారు.
ఇంకా తప్పటడుగులేనా?:
దీక్షా దివస్ ను కవిత(Kavitha) కేవలం ట్వీట్ తో సరిపెట్టడం చూస్తే ఆమె రాజకీయంగా ఇంకా తప్పటడుగుల దశలోనే ఉందేమో అనే అభిప్రాయాలు వ్యక్తమవుతున్నాయి. తండ్రి అడుగు జాడల్లో రాజకీయాల్లో ప్రవేశించిన కవితకు సమకాలీన రాజకీయాలపై ఎంతో విషయ పరిజ్ఞానం ఉందనడంలో సందేహం లేదు. విద్యావంతురాలు, తండ్రిలాగే వాగ్దాటీ ఉంది. అవే ఆమెను తెలంగాణ జాగృతి అధ్యక్షురాలిగా చేశాయి. అంతేకాదు, రాష్ట్ర సాధనలో కవిత పాత్ర కూడా విస్మరించలేనిది. ఇవన్నీ ఆమెను రాజకీయంగా తీర్చిదిద్దినవే. కానీ, దీక్షా దివస్ రోజు ఆమె వేసిన ట్వీట్, కనీసం జాగృతి కార్యాలయానికి వెళ్ళి తెలంగాణ తల్లికి నివాళులు అర్పించలేని తీరు విమర్శలకు గురిచేస్తోంది. తనను పార్టీ నుంచి సస్పెండ్ చేసినందుకు తండ్రి మీద కోపం ఉన్నా దాన్ని ప్రదర్శించేందుకు ఇది సరైన సమయం కాదని రాజకీయ విశ్లేషకులు సైతం అంటున్నారు.
నిజానికి, రాజకీయంగా ఎదగాలనే ప్రయత్నంలో పట్టువిడుపులు ఉండాలనే విషయం కవితకు తెలియనిది కాదు. కానీ, తండ్రి పేరును స్మరించకపోవడం సంగతి అటుంచితే దివంగత ప్రొఫెసర్ జయశంకర్ కు, తెలంగాణ తల్లికి నివాళులు అర్పించకపోవడం కవితకు కచ్చితంగా ఇబ్బంది కలిగించేదే. అలాగే ‘భౌగోళిక తెలంగాణ సాధించాం.. సామాజిక తెలంగాణ సాధిస్తాం’ అంటూ ట్వీట్ లో పేర్కొన్న వాక్యం పదేళ్ల బీఆర్ఎస్ పాలనలో సామాజిక తెలంగాణ రాలేదనే విషయాన్ని ఎత్తిచూపుతున్నా.. ఆ పాలన కాలంలో తాను కూడా అందులోనే భాగమనే విషయాన్ని కవిత మరిచిపోయినట్లుందని అంటున్నారు. తండ్రి చేతిలో రాజకీయ ఓనమాలు దిద్దుకొని, జయశంకర్ భావజాల స్ఫూర్తిని నింపుకున్నాను అని చెప్పుకునే కవితకు దీక్షా దివస్ ట్వీట్ ఇరకాటంలో పడేసేదే.
Read Also: దీక్షా దివస్.. బైక్ ర్యాలీలో పాల్గొన్న హరీష్ రావు
Follow Us On : Youtube
