ముఖ్యమంత్రి రేవంత్ రెడ్డి(Revanth Reddy) సొంత ఇలాకాలోనే నిరసన సెగ ఎదురైంది. కొడంగల్(Kodangal) మండలానికి చెందిన పలు విద్యాసంస్థలను దుద్యాల మండలానికి తరలించాలని ఇటీవల ప్రభుత్వం నిర్ణయించింది. అయితే ఈ నిర్ణయానికి స్థానికుల నుంచి తీవ్ర నిరసన ఎదురైంది. ప్రభుత్వ నిర్ణయానికి వ్యతిరేకంగా స్థానిక ప్రజలు, సంఘాలు తీవ్రంగా స్పందించాయి. కొడంగల్ అభివృద్ధి పరిరక్షణ ఐక్య కార్యాచరణ కమిటీ పిలుపు మేరకు బుధవారం కొడంగల్‌లో బంద్ కొనసాగుతోంది.
కొడంగల్(Kodangal) మండల కేంద్రం నుండి మెడికల్ కళాశాల, వెటర్నరీ కాలేజ్, నర్సింగ్ కాలేజ్, యంగ్ ఇండియా ఇంటిగ్రేటెడ్ కళాశాలలను దుద్యాల మండలానికి తరలించడం సరికాదని కమిటీ సభ్యులు అభిప్రాయపడుతున్నారు. స్థానిక యువతకు, విద్యార్థులకు ఇది పెద్ద నష్టమని వారు ఆగ్రహం వ్యక్తం చేశారు. ఏ అభివృద్ధి చర్య అయినా స్థానిక ప్రజల అభిప్రాయాలను పరిగణనలోకి తీసుకోవాలని, అన్యాయంగా సంస్థల తరలింపును అంగీకరించబోమని స్పష్టం చేశారు.
అదే సమయంలో కొడంగల్ మండలంలో జరగనున్న ముఖ్యమంత్రి రేవంత్ రెడ్డి బహిరంగ సభకు వెళ్లకుండా నిరసన తెలియజేయాలని కమిటీ ప్రజలకు పిలుపునిచ్చింది. ప్రాంతీయ అభివృద్ధి సమస్యల పరిష్కారం కోసం న్యాయబద్ధంగా తమ గొంతును వినిపించడం అవసరమని వారు భావిస్తున్నారు. బంద్ పిలుపు నేపథ్యంలో కొడంగల్‌లో వ్యాపార సముదాయాలు స్వచ్ఛందంగా తమ దుకాణాలను మూసివేశారు. ప్రధాన రహదారులు, మార్కెట్ ప్రాంతాలు, వాణిజ్య కేంద్రాలు కార్యకలాపాలు నిలిచిపోయాయి. ప్రజలు కూడా పెద్ద సంఖ్యలో బంద్‌కు మద్దతు తెలుపుతున్నారు. విద్యార్థి సంఘాలు, స్థానిక సంఘాలు, సామాజిక కార్యకర్తలు కూడా ఈ నిరసనలో పాల్గొంటున్నాయి. ఉద్రిక్తతలు రాకుండా పోలీసు బలగాలు అన్ని కీలక ప్రాంతాల్లో మోహరించాయి. శాంతి భద్రతలు కాపాడేందుకు ప్రత్యేక చర్యలు తీసుకున్నట్లు అధికారులు తెలిపారు.
Read Also: సీఎం రేవంత్‌పై మరోసారి మండిపడ్డ జీవన్ రెడ్డి
Follow Us on : Pinterest
