కలం డెస్క్ : ఫార్ములా ఈ-కార్ రేసు కేసు వ్యవహారంలో కేటీఆర్(KTR)ను ప్రాసిక్యూట్ చేయడానికి అవినీతి నిరోధక శాఖకు గవర్నర్ నుంచి అనుమతి మంజూరు కావడంతో కేటీఆర్ అరెస్టుపై అన్ని పార్టీల్లో విస్తృతంగా చర్చలు జరుగుతున్నాయి. కోర్టులో ఏసీబీ ఛార్జిషీట్ దాఖలు చేయడానికి ముందే అరెస్టు ఉంటుందా?.. లేక దాఖలు చేసిన తర్వాత విచారణలో భాగంగా ఉంటుందా?.. లాంటి ప్రశ్నలు తలెత్తుతున్నాయి. తొలి ఛార్జిషీట్‌లో ఏ-వన్‌గా ఉన్న కేటీఆర్‌పై అభియోగాలను మాత్రమే ఏసీబీ నమోదు చేస్తుందని, మిగిలిన నిందితులైన ఐఏఎస్ అధికారి అరవింద్ కుమార్, రిటైర్డ్ ఇంజినీర్ బీఎల్ఎన్ రెడ్డి తదితరులపై అభియోగాలను సప్లిమెంటరీ ఛార్జిషీట్‌లో ప్రస్తావించనున్నట్లు సమాచారం.
KTR కు రెండు అరెస్టుల గుబులు :
ఫార్ములా ఈ-కార్ రేసు(Formula E car Race) కేసులో నిబంధనల ఉల్లంఘన జరగలేదని, అవినీతికి ఆస్కారమే లేదని, అంతా చట్టబద్ధంగానే జరిగిందని, అందుకే ఇది ఒక ‘లొట్టపీసు కేసు’ అని కేటీఆర్ పలు సందర్భాల్లో వ్యాఖ్యానించారు. స్థానిక సంస్థల ఎన్నికలకు ముందే కేటీఆర్‌ను ఏసీబీ అరెస్టు చేసే అవకాశముందని, మనీ లాండరింగ్ వ్యవహారంలో ప్రాసిక్యూట్ చేయడానికి ఈడీ సైతం గవర్నర్ నుంచి అనుమతి కోరినందున, అది మంజూరైతే ఆ దర్యాప్తు సంస్థ కూడా అరెస్టు చేసే అవకాశమున్నది. ఈ రెండు అరెస్టులు ఒకదాని తర్వాత ఒకటిగా ఉంటాయా?.. లేక ఏకకాలంలో ఉంటాయా?.. అనే చర్చలూ బీఆర్ఎస్ నేతల మధ్య జరుగుతున్నాయి. ఏసీబీ అరెస్టులో కనీసం 45 రోజులు, ఈడీ కేసులో కనీసంగా 90 రోజులు జైల్లోనే ఉండాల్సి వస్తుందని, బెయిల్ మంజూరయ్యే అవకాశాలు ఉండవన్నది వారి భావన.
ఛార్జిషీట్‌లో అభియోగాలపైనే ఆసక్తి :
కోర్టుకు సమర్పించే ఛార్జిషీట్‌లో కేటీఆర్‌కు సంబంధించి అవినీతి నిరోధక శాఖ ఎలాంటి అభియోగాలు నమోదు చేస్తుందనేది ఆసక్తికరంగా మారింది. ఇప్పటికే ఆయనను నాలుగుసార్లు ఏసీబీ అధికారులు విచారించారు. విదేశీ కరెన్సీ రూపంలో కార్ రేస్ నిర్వహణ సంస్థకు చేసిన పేమెంట్లు, నిబంధనల ఉల్లంఘన, గవర్నర్ నుంచి తీసుకున్న అనుమతులు.. ఇలాంటి అనేక అంశాలపై ఆరా తీశారు. డాక్యుమెంట్లను సేకరించారు. అవినీతి నిరోధక శాఖ చట్టానికి పార్లమెంటులో 2017 తర్వాత జరిగిన సవరణల నేపథ్యంలో కేటీఆర్ అరెస్టు అనివార్యమనే వాదనలు వినిపిస్తున్నాయి. దీంతో ఛార్జిషీట్ సమర్పించడానికి ముందే అరెస్టు ఉంటుందా?.. లేక ఆ తర్వాత ఉంటుందా?.. అనేది బీఆర్ఎస్ నేతలను ఉక్కిరిబిక్కిరి చేస్తున్నది. దాదాపు మూడు నెలలకు పైగా జైల్లో ఉండాల్సి వస్తే పార్టీ నిర్వహణ బాధ్యతలను ఎవరు చూసుకుంటారనేది గులాబీ నేతలకు మింగుడుపడడంలేదు.
Read Also: దానం, కడియం రాజీనామాలు తప్పవా?
Follow Us on : Pinterest
