బీఆర్ఎస్ వర్కింగ్ ప్రసిడెంట్ కేటీఆర్(KTR)కు హైకోర్టులో ఊరట దక్కింది. 2023 అసెంబ్లీ ఎన్నికల సమయంలో నమోదైన కేసును న్యాయస్థానం కొట్టేసింది. గత అసెంబ్లీ ఎన్నికల సమయంలో కేటీఆర్, గొరటి వెంకన్న ఎన్నికల ప్రవర్తనా నియమావళిని ఉల్లంఘించినట్టు కేసు నమోదైంది. సచివాలయం ఎదురుగా ఉన్న అమరవీరుల జ్యోతి వద్ద గోరటి వెంకన్న(Goreti Venkanna), కేటీఆర్‌తో ఇంటర్వ్యూ నిర్వహించారని.. ఇది ఎన్నికల కోడ్‌ను ఉల్లంఘించడమేనని సైఫాబాద్‌ పోలీస్‌ స్టేషన్‌లో ఎఫ్‌ఐఆర్‌ నమోదు చేశారు. అనుమతి లేకుండా డ్రోన్‌ కెమెరా వినియోగించడం, ఆ ఇంటర్వ్యూ భారత రాష్ట్ర సమితికి రాజకీయ ప్రయోజనం చేకూర్చేలా ఉందని పేర్కొంటూ పోలీసులు కేసు నమోదు చేశారు.
ఈ కేసు కూడా పూర్తిగా రాజకీయ ఉద్దేశంతోనే పెట్టారని, ఎన్నికల సమయంలో ప్రత్యర్థులను ఇబ్బంది పెట్టడానికి పోలీసులను ఉపయోగించి తప్పుడు కేసు సృష్టించారని కేటీఆర్(KTR) తరఫు న్యాయవాది వాదించారు. ఇరుపక్షాల వాదనలు విన్న ధర్మాసనం, కేసు నమోదు సమయంలో చట్టపరమైన ఆధారాలు లేకపోవడం, కోడ్‌ ఉల్లంఘన ఆరోపణలకు సరైన సాక్షాలు చూపించలేకపోవడం వంటి అంశాలను పరిశీలించింది. చివరికి కేటీఆర్, గోరటి వెంకన్నపై నమోదైన ఎఫ్‌ఐఆర్‌ను కొట్టివేస్తూ హైకోర్టు కీలక తీర్పు వెలువరించింది.
బండి సంజయ్ మీద కూడా..
కేంద్రమంత్రి బండి సంజయ్ కుమార్‌(Bandi Sanjay)కు కూడా హైకోర్టులో ఊరట దక్కింది. 2023లో జరిగిన పదోతరగతి ప్రశ్నా పత్ర లీకేజీ వ్యవహారంలో బండి సంజయ్ మీద కమలాపూర్‌ పోలీస్‌ స్టేషన్‌లో కేసు నమోదైంది. ప్రశ్నాపత్రం లీకేజ్‌కు బండి సంజయ్ కుట్ర చేశారంటూ అప్పట్లో కేసు నమోదు చేశారు. అయితే ఈ కేసు రాజకీయ ప్రేరేపితమైనదని బండి తరఫు న్యాయవాదులు వాదించారు. కేసు నమోదు సమయంలో సరైన సెక్షన్లు వర్తింపజేయకపోవడం, దర్యాప్తులో కూడా స్పష్టత లేకపోవడం, అభియోగాలు స్థిరంగా నిలబడే విధంగా ఆధారాలు లేకపోవడం వంటి అంశాలను కోర్టు పరిశీలించింది. ఈ కేసులో న్యాయపరమైన ప్రక్రియలో లోపాలున్నాయని గుర్తించిన హైకోర్టు, చివరికి బండి సంజయ్‌పై నమోదైన కేసును పూర్తిగా కొట్టివేస్తూ తీర్పునిచ్చింది.
Read Also: మంత్రి సీతక్కకు నిరసన సెగ
Follow Us on: Youtube
