కలం, వెబ్ డెస్క్ : ప్రభుత్వ ఉద్యోగమే లక్ష్యంగా విద్యార్థులు, నిరుద్యోగులు (Unemployees) ఏళ్ల తరబడి ప్రిపరేషన్ కొనసాగిస్తున్నారు. పుట్టిన ఊరును, కన్న తల్లిదండ్రులను వదిలి కోచింగ్ లపేరుతో పట్టణాలకు వెళ్లి పుస్తకాలతో కుస్తీలు పడుతున్నారు. ఈ క్రమంలో నోటిఫికేషన్లు లేక నిరుద్యోగులు అసహనం వ్యక్తం చేస్తున్నారు. కాంగ్రెస్ పార్టీ ఎన్నికల్లో ఇచ్చిన హామీల్లో ప్రధానంగా జాబ్ క్యాలెండర్ ఒకటి. బీఆర్ఎస్ గద్దె దిగడానికి.. కాంగ్రెస్ ప్రభుత్వం ఏర్పడడానికి నిరుద్యోగులు (Unemployees) ముఖ్యపాత్ర పోషించారు.
ప్రభుత్వం ఏర్పడి నెలలు, ఏండ్లు గడిచినా జాబ్ క్యాలెండర్ ఊసే ఎత్తడం లేదు. గతంలో జాబ్ క్యాలెండర్ పేరుతో విడుదల చేసిన ఓ పత్రం పక్కకే పోయింది. నిరుద్యోగుల జాబ్ క్యాలెండర్ కోసం కళ్లు కాయలు కాచేలా ఎదురు చూస్తున్నారు. అయినా ప్రభుత్వం నుంచి ఎలాంటి స్పందన లేదు. ఈ క్రమంలో జాబ్ క్యాలెండర్ విడుదల చేయాలని నిరుద్యోగులు రోడ్డుకెక్కారు .
హైదరాబాద్ అశోక్ నగర్, చిక్కడపల్లి లైబ్రరీ ఎదుట భారీ నిరసన ప్రదర్శన చేశారు. పెద్ద ఎత్తున నినాదాలు చేస్తు ధర్నా చేపట్టారు. ఎన్నికల హామీలను ప్రభుత్వం అమలు చేయకపోవడంపై ఆగ్రహం వ్యక్తం చేశారు. ఖాళాగా ఉన్న ప్రభుత్వ ఉద్యోగాలను వెంటనే భర్తీ చేయాలని, జాబ్ క్యాలెండర్ తక్షణమే విడుదల చేయాలని డిమాండ్ చేస్తూ ధర్నా చేశారు. ఈ క్రమంలో ఉద్రిక్తతలు నెలకొనగా పోలీసులు భారీగా మోహరించి పరిస్థితిని అదుపులోకి తేవడానికి ప్రయత్నిస్తున్నారు.
