UFC మెయిన్ ఈవెంట్‌కు సాల్కిల్డ్ రెడీ.. గామ్‌రాట్‌కే టార్గెట్

కలం, స్పోర్ట్స్ : వరుస విజయాలతో UFCలో తనదైన ముద్ర వేసిన క్విల్లన్ సాల్కిల్డ్ (Quillan Salkilld) .. ఇప్పుడు కెరీర్‌లోనే అతిపెద్ద పోరుకు అడుగు పెడుతున్నాడు. గామ్‌రాట్‌పై గెలిచి టాప్ ఫైటర్ల సరసన నిలవాలనే లక్ష్యంతో బరిలోకి దిగుతున్నాడు. ఆస్ట్రేలియాకు చెందిన 26 ఏళ్ల సాల్కిల్డ్ ఇప్పటివరకు 12 విజయాలు, ఒకే ఓటమితో కొనసాగుతున్నాడు. UFCలో ఐదు ఫైట్లు ఆడి అన్నింటిలోనూ విజయం సాధించాడు. నాలుగు ఫినిష్‌లు నమోదు చేసి వరుసగా నాలుగు ‘పర్‌ఫార్మెన్స్ ఆఫ్ ది నైట్’ బోనస్‌లు అందుకున్నాడు.

శనివారం జరిగే UFC ఫైట్ నైట్ మెయిన్ ఈవెంట్‌లో ఎనిమిదో ర్యాంక్ ఫైటర్ మాటెయుజ్ గామ్‌రాట్‌ను ఎదుర్కోనున్నాడు. ఈ పోరును తానే ఎంచుకున్నానని సాల్కిల్డ్ (Quillan Salkilld) వెల్లడించాడు. కఠినమైన ప్రత్యర్థులతోనే పోరాడాలని తన లక్ష్యమని తెలిపాడు. ఈ ఫైట్ కోసం శిక్షణను రెండు దశల్లో పూర్తి చేశాడు. పెర్త్‌లో తొలి దశ సాధన చేశాడు. తర్వాత లాస్ వెగాస్‌కు వెళ్లి నెల రోజుల పాటు UFC పెర్ఫార్మెన్స్ ఇన్‌స్టిట్యూట్, సిండికేట్ MMAలో ప్రాక్టీస్ చేశాడు.

దీంతో పూర్తి స్థాయిలో సిద్ధమయ్యానని చెప్పాడు. తొలి UFC మెయిన్ ఈవెంట్ కావడం ప్రత్యేక అనుభూతిగా ఉందని తెలిపాడు. అయితే తనకు అసలు తేడా ఐదు రౌండ్ల మ్యాచ్ మాత్రమేనని, దానికి తగ్గట్టే శిక్షణ తీసుకున్నానని వివరించాడు. ర్యాంకింగ్స్ తన ఆత్మవిశ్వాసాన్ని మార్చవని చెప్పాడు. తాను ఇప్పటికే లైట్‌వెయిట్ విభాగంలో అగ్రస్థాయికి చెందానని నమ్ముతున్నానని తెలిపాడు. గామ్‌రాట్‌పై గెలిస్తే అదే విషయం అందరికీ తెలుస్తుందని పేర్కొన్నాడు.

తర్వాతి లక్ష్యం టాప్-15 నుంచి టాప్-10, ఆపై టాప్-5లోకి చేరడమేనని వెల్లడించాడు. చివరికి టైటిల్ కోసం పోరాడటమే తన ప్రధాన లక్ష్యమని స్పష్టం చేశాడు. తాజా పోరులో తొలి దశలో ఇబ్బంది ఎదురైనా ప్రశాంతంగా ఉండి విజయం సాధించిన విషయాన్ని గుర్తు చేశాడు. ఒత్తిడిని పట్టించుకోకుండా పోరుపైనే దృష్టి పెడతానని చెప్పాడు. 2026లో ఇప్పటికే రెండు సార్లు బరిలోకి దిగిన సాల్కిల్డ్, ఫిట్‌గా ఉండటంతో వరుసగా పోరాడగలిగానని తెలిపాడు. ప్రస్తుతం మాత్రం తన దృష్టి మొత్తం గామ్‌రాట్‌తో జరిగే పోరుపైనే ఉందని స్పష్టం చేశాడు.

Also Read : అన్మోల్ ఎక్కా సారథ్యంలో జూనియర్ ఆసియా కప్‌కు భారత్

Follow Us On : WhatsApp