కలం, వెబ్డెస్క్: స్టార్లింక్ శాటిలైట్ల (Starlink Satellite) లో ఒకటి అదుపుతప్పి భూమివైపు దూసుకొస్తోంది. భూమికి సుమారు 418 కిలోమీటర్ల ఎత్తులో తిరుగుతున్న 35956 అనే శాటిలైట్లో ఈ నెల 17న సాంకేతిక లోపం ఏర్పడింది. ప్రొపల్షన్ ట్యాంకులో తలెత్తిన సమస్య కారణంగా గ్యాస్ బలంగా నెట్టడంతో కక్షలో దాదాపు నాలుగు కిలోమీటర్లకు కిందకు జారింది. దీంతో దానిపై గ్రౌండ్ కంట్రోల్ సిబ్బందికి సంబంధాలు తెగిపోయాయి. ఈ క్రమంలో అదుపుతప్పిన శాటిలైట్ నుంచి కొన్ని పరికరాలు వేరుపడినట్లు ఎలాన్ మస్క్కు చెందిన స్పేస్ఎక్స్ సంస్థ తెలిపింది. ఈ శాటిలైట్ శకలాలు వారం లోపల భూ వాతావరణంలోకి ప్రవేశించి, కూలిపోతాయని చెప్పింది. ప్రస్తుత శకలాలు, శాటిలైట్ వల్ల ఎలాంటి ఇబ్బందీ లేదని, అది అంతర్జాతీయ అంతరిక్ష కేంద్రం కంటే కింద తిరుగుతోందని స్పేస్ఎక్స్ చెప్పింది. ఇవి భూ వాతావరణంలోకి రాగానే కూలిపోతాయని వివరించింది. శకలాలు అమెరికాలోని అలాస్కా సమీపంలో భూమిపై ఉండగా, వరల్డ్వ్యూ–3 అనే ఉపగ్రహం 241 కిలోమీటర్ల దూరం నుంచి హై రెజల్యూషన్ ఫొటోలు తీసింది. కాగా, ప్రపంచవ్యాప్తంగా మారుమూల ప్రాంతాలకు సైతం అత్యధిక సామర్థ్యంతో ఇంటర్నెట్ అందించేందకు దాదాపు 9వేలకు పైగా శాటిలైట్లను స్పేస్ఎక్స్ అంతరిక్షంలోకి పంపింది.
