కలం, వెబ్డెస్క్: అలప్పుజలోని పున్నమడ సరస్సు (Punnamada Lake) పడవల పోటీతో హోరెత్తుతోంది. శనివారం జరుగుతున్న 72వ నెహ్రూ ట్రోఫీ బోట్ రేస్ (Nehru Trophy Boat Race)లో 71 పడవలు బరిలో ఉన్నాయి. మధ్యాహ్నం 3.30 గంటలకు ప్రధాన ఆకర్షణైన స్నేక్ బోట్ రేస్ ప్రారంభమైంది. ఇందులో 22 చుండన్ పడవలు పోటీ పడుతున్నాయి. సుమారు 1,100 మీటర్ల ట్రాక్పై పడవలు వేగంగా దూసుకెళ్తున్నాయి. ఒక్కో పడవలో 100 మందికి పైగా పడవ నడిపేవారు లయబద్ధంగా తెడ్లు వేస్తున్నారు. పడవల వేగం, తెడ్ల సమన్వయం ఈ పోటీకి ప్రధాన ఆకర్షణగా నిలిచాయి.
సరస్సు ఒడ్డున భారీగా చేరిన ప్రేక్షకులు పోటీని ఉత్కంఠగా వీక్షిస్తున్నారు. తెడ్ల శబ్దం, డప్పుల మోతతో పున్నమడ సరస్సు మార్మోగుతోంది. నెహ్రూ ట్రోఫీకి 1952లోనే పునాది పడింది. అప్పటి ప్రధాని జవహర్లాల్ నెహ్రూ కేరళ పర్యటన సందర్భంగా అలప్పుజలో పడవల పోటీ నిర్వహించారు. పోటీని చూసిన నెహ్రూ ఎంతో ఆకట్టుకున్నారు. విజేతల పడవలోకి ఎక్కి సంబరాల్లో పాల్గొన్నారు. ఆ తర్వాత స్నేక్ బోట్ ఆకారంలో వెండి ట్రోఫీని అందించారు.
అదే తర్వాత నెహ్రూ ట్రోఫీగా మారింది. ఈ ఏడాది పోటీని ముఖ్యమంత్రి వి.డి. సతీశన్ ప్రారంభించారు. కర్ణాటక ముఖ్యమంత్రి డీకే శివకుమార్, కేంద్ర మంత్రి గజేంద్ర సింగ్ షెకావత్ ముఖ్య అతిథులుగా పాల్గొన్నారు. పోటీ నేపథ్యంలో అలప్పుజ జిల్లాలో విద్యాసంస్థలు, ప్రభుత్వ కార్యాలయాలకు సెలవు ప్రకటించారు. భారీగా ప్రజలు తరలిరావడంతో ట్రాఫిక్ ఆంక్షలు కూడా అమల్లో ఉన్నాయి. పడవలు పున్నమడలో బరిలోకి దిగిన తర్వాత అందరి దృష్టి పోటీ పైనే నిలిచింది.
