కలం, వెబ్ డెస్క్: యూరియా (Urea app) పంపిణీ అంశం తెలంగాణ రాష్ట్రంలో ఓ సమస్యలా మారింది. యూరియా సకాలంలో అందడం లేదు.. రైతులు పడిగాపులు గాస్తున్నారన్నది ప్రతిపక్షాల విమర్శ. ఇటీవల బీఆర్ఎస్ అధినేత కేసీఆర్ కూడా ఈ సమస్యను ప్రస్తావించారు. యూరియా కోసం ప్రభుత్వం తీసుకొచ్చిన యాప్ కూడా ప్రయోజనం లేనిదని కొట్టి పారేశారు. కానీ ప్రభుత్వం తీసుకొచ్చిన యూరియా యాప్ సత్ఫలితాలు ఇస్తోంది. రెండు రోజుల్లో ఈ యాప్ ను లక్ష మంది రైతులు డౌన్ లోడ్ చేసుకున్నారు. గత రెండ్రోజుల్లో యూరియా యాప్తో 60,510 బస్తాల యూరియాను కూడా పొందారు. ఈ యాప్ పనితీరు విషయంలో రైతులు సంతృప్తి వ్యక్తం చేస్తున్నారు.
ఐదు జిల్లాల్లో ప్రతిష్ఠాత్మకంగా..
వ్యవసాయశాఖ ద్వారా ప్రవేశపెట్టిన యూరియా యాప్ (Urea App) 5 జిల్లాలలో ప్రయోగాత్మకంగా అమలు చేస్తున్నారు. దాదాపు లక్ష మందికి పైగా యాప్ డౌన్ లోడ్ చేసుకున్నారని అధికారులు తెలిపారు. ఆదిలాబాద్ జిల్లాలో 897, జనగామ జిల్లాలో 5150, మహబూబ్ నగర్ 3741, నల్లగొండ 3618 మరియు పెద్దపల్లి జిల్లాలోని 6289 మొత్తం 19695 మంది రైతులు ఈ యాప్ ద్వారా యూరియాను తమ సమీప డీలర్ దగ్గర 60,510 యూరియా బస్తాలు బుక్ చేసుకున్నారని అధికారులు చెప్పారు. 217 మంది కౌలు రైతులు కూడా 678 యూరియా బస్తాలు ఈ యాప్ ద్వారా బుక్ చేసుకోవడం జరిగిందని, మొదటి రోజు అక్కడక్కడ తలెత్తిన సాంకేతిక సమస్యలను కూడా వెంటనే పరిష్కరించామని అధికారులు చెప్పారు.
రైతుల సంతృప్తి
రైతులు కూడా ఈ యాప్ పట్ల సంతృప్తి వ్యక్తం చేశారని, వారికి వారి ఊరిలో ఏ డీలర్ దగ్గర ఎంత స్టాక్ ఉందో తెలుస్తుందని, తద్వారా వారు బుక్ చేసుకొని, వారికి నచ్చిన సమయంలో షాప్ వద్దకు వెళ్లి ఒటిపి చూపించి కొనుగోలు చేసారని తెలిపారు. ఈ రెండు రోజుల్లో యాప్ విజయవంతం కావడంతో, ఈ యాప్ను మరికొన్ని రోజులు పరిశీలించి రాష్ట్రవ్యాప్తంగా అమలు చేయడానికి సిద్ధం కావాల్సిందిగా అధికారులను మంత్రి తుమ్మల ఆదేశించారు.
రైతుల డౌట్లు క్లియర్ చేశాం
రైతునేస్తం కార్యక్రమంలో కూడా రైతులకు యాప్పై గల సందేహాలను నివృత్తి చేశామన్నారు. ఈ రబీ సీజన్కు గాను రాష్ట్రానికి ఇప్పటికే 5.30 లక్షల మెట్రిక్ టన్నుల యూరియా వచ్చిందని చెప్పారు. యూరియా వినియోగం అధికంగా ఉండే జనవరి, ఫిబ్రవరి నెలలకు గాను సరిపడ యూరియాను ముందస్తుగానే తెప్పించడానికి రాష్ట్ర ప్రభుత్వం కృషి చేస్తుందని తెలిపారు.
Read Also: పల్లె వెలుగులోనూ ఏసీ బస్సులు
Follow Us On: X(Twitter)
