కేంద్రంపై పోరుకు కాంగ్రెస్ ఎంపీలు రెడీ

కలం డెస్క్ : పార్లమెంటు శీతాకాల సమావేశాలు సోమవారం నుంచి ప్రారంభం కానుండడంతో కాంగ్రెస్ పార్టీకి చెందిన ఎనిమిది మంది తెలంగాణ ఎంపీలు(Congress MPs) కేంద్ర ప్రభుత్వంపై ఒత్తిడి పెంచనున్నాయి. ఇప్పటికే రెండు దఫాలుగా వారితో సమావేశమైన డిప్యూటీ సీఎం, వివిధ శాఖల అధికారులు రాష్ట్రానికి రావాల్సిన హక్కులపై వివరించారు. పునర్ విభజన చట్టం ప్రకారం కేంద్ర ప్రభుత్వం గతంలో ఇచ్చిన హామీలు, వివిధ ప్రాజెక్టులకు రావాల్సిన అనుమతులు, పెండింగ్ అంశాలు, తాజాగా రాష్ట్ర సర్కారు కోరుతున్న సాయం తదితర మొత్తం 28 అంశాలను ఎంపీలకు వివరించారు. రాష్ట్రం నుంచి ప్రాతినిధ్యం వహిస్తున్న ఇద్దరు కేంద్ర మంత్రులు సహా బీజేపీకి చెందిన 8 మంది ఎంపీలు, మజ్లిస్ ఎంపీ, బీఆర్ఎస్‌కు చెందిన రాజ్యసభ సభ్యులకు రాష్ట్ర అవసరాలకు సమిష్టిగా గొంతెత్తాలని, ఐక్యంగా ఉండి రాష్ట్ర అభివృద్ధికి పాటుపడాలని ఇటీవల నిర్వహించిన ఆల్ పార్టీ మీటింగ్ (అన్ని పార్టీలకు చెందిన లోక్‌సభ, రాజ్యసభ సభ్యులతో) రాష్ట్ర ప్రభుత్వం విజ్ఞప్తి చేసింది.

కేంద్రం నుంచి రాష్ట్ర ప్రభుత్వం కోరుతున్నది ఇవే :

1. రీజినల్ రింగు రోడ్డుకు పూర్తిస్థాయి అనుమతులు (రూ. 34,367 కోట్ల సాయం)
2. ఔటర్ నుంచి రీజినల్ రింగు రోడ్డు వరకు రేడియల్ రోడ్లు (రూ. 45 వేల కోట్లు)
3. హైదరాబాద్‌లో ఐదు కారిడార్లలో 76.40 కి.మీ. మేర మెట్రో రైల్ విస్తరణ (రూ. 24,269 కోట్లు)
4. మూసీ నది పునరుజ్జీవనం, బాపూ ఘాట్ నిర్మాణం (రూ. 14,100 కోట్లు). రక్షణ శాఖకు చెందిన 222.27 ఎకరాల భూముల బదలాయింపు.
5. మూసీ-గోదావరి అనుసంధానం. నగరానికి 15 టీఎంసీల త్రాగునీటితో పాటు మూసీ నదిలోకి 5 టీఎంసీల నీటి సప్లై (రూ. 7,400 కోట్లు)
6. హైదరాబాద్ డ్రైనేజీ మాస్టర్ ప్లాన్. నగరంతో పాటు ఆనుకుని ఉన్న 27 మున్సిపాలిటీలు, మున్సిపల్ కార్పొరేషన్ల పరిధిలోని సుమారు 7,444 కి.మీ. మేర డ్రైనేజీ పైప్‌లైన్ నెట్‌వర్క్ నిర్మాణం (రూ. 17,212.69 కోట్లు)
7. వరంగల్ అండర్‌గ్రౌండ్ డ్రైనేజీ ప్లాన్. (రూ. 4,170 కోట్లు)
8. ఆంధ్రప్రదేశ్‌లోని బందరు (మచిలీపట్నం) నౌకాశ్రయంతో హైదరాబాద్ సమీపంలోని డ్రై పోర్టును అనుసంధానించేలా గ్రీన్ ఫీల్డ్ జాతీయ రహదారి నిర్మాణం (రూ. 17 వేల కోట్లు)
9. గోదావరి కోల్ ఫీల్డ్ లోని బొగ్గు బ్లాకులను సింగరేణి కాలరీస్ సంస్థకు కేటాయించడం.
10. సెమీ కండక్టర్ పరిశ్రమల స్థాపనకు తెలంగాణను కూడా పరిగణనలోకి తీసుకుని యూనిట్లను కేటాయించడం.
11. రాష్ట్ర అవసరాలకు తగినట్లుగా అదనంగా 29 మంది ఐపీఎస్ అధికారులను కేటాయించేలా హోంశాఖ నిర్ణయం తీసుకోవడం.
12. తెలంగాణ ట్రాన్స్ కో, జెన్‌కో రెండేండ్ల క్రితం విజ్ఞప్తి చేసినట్లుగా నేషనల్ లోడ్ డిస్పాచ్ సెంటర్ నుంచి తొమ్మిది స్కీమ్‌లకు అనుమతి మంజూరు.
13. ‘పీఎం-కుసుమ్’ స్కీమ్ కింద తెలంగాణలోని స్వయం సహాయక మహిళా బృందాలకు సంప్రదాయేతర ఇంధన వనరుల ఉత్పత్తి ప్లాంట్ల నిర్మాణానికి కేంద్ర ప్రభుత్వం నుంచి అనుమతి మంజూరు. ఈ స్కీమ్ కింద 4000 మెగావాట్ల ప్లాంట్ కేటాయించాలి.
14. ‘పీఎం-కుసుమ్’ ‘ప్లాన్ బి’ కింద తెలంగాణలోని గిరిజన, ఆదివాసీ రైతులకు వ్యవసాయ అవసరాలకు ఒక లక్ష సోలార్ పంపుసెట్ల కేటాయింపు.
15. రాష్ట్రంలో వ్యవసాయ రంగం గణనీయంగా అభివృద్ధి చెందుతున్నందున వివిధ ప్రాంతాల్లో ఉన్న 2,500 ఫీడర్ల (11 కేవీ సామర్థ్యం) ఫీడర్ల పరిధిలో రెండు లక్షల సోలార్ పంపుసెట్ల మంజూరు.
16. తాడిచెర్లలోని 1,875 హెక్టార్ల కోల్ బ్లాక్‌ను మైనింగ్ లీజు ప్రాతిపదికన తెలంగాణకు కేటాయిస్తూ అనుమతుల మంజూరు.
17. గత ప్రభుత్వం కాళేశ్వరం లిఫ్ట్ ఇరిగేషన్ ప్రాజెక్టు కార్పొరేషన్ సహా పలు కార్పొరేషన్ల ద్వారా తీసుకున్న ఆఫ్-బడ్జెట్ బారోయింగ్స్ తో రాష్ట్ర ఖజానాపై భారం పడుతున్నందున పవర్ ఫైనాన్స్ కార్పొరేషన్ సహా పలు ద్రవ్య సంస్థలు ఆ రుణాలను రీస్ట్రక్చర్ చేసేలా ఆదేశాలు ఇవ్వడం.
18. ఆంధ్రప్రదేశ్ నుంచి తెలంగాణకు రావాల్సిన రూ. 408 కోట్ల బకాయిలను ఇప్పించడం. పునర్ విభజన చట్టం ప్రకారం కేంధ్ర హోంశాఖ నోడల్ ఏజెన్సీగా ఉన్నందున ఆ శాఖకు తగిన ఆదేశాలు ఇవ్వడం.
19. కేంద్ర ప్రభుత్వం సంక్షేమ పథకాల కింద తెలంగాణకు రావాల్సిన రూ. 495 కోట్లు పొరపాటున ఆంధ్రప్రదేశ్ ప్రభుత్వ ఖాతాలోకి వెళ్ళినందున దాన్ని తిరిగి ఇప్పించడం.
20. ఉమ్మడి రాష్ట్రంలో భవన నిర్మాణ సంక్షేమ బోర్డు దగ్గర ఉన్న ఫండ్ ప్రస్తుతం ఏపీ ప్రభుత్వం దగ్గర ఉన్నందున తెలంగాణకు రావాల్సిన వాటాను వెంటనే ఇచ్చేలా కేంద్రం నుంచి ఆదేశాలు ఇవ్వడం.
21. ఏపీ పవర్ ఫైనాన్స్ కార్పొరేషన్ సహా పలు సంస్థల నుంచి తెలంగాణకు రావాల్సిన సుమారు రూ. 1,330 కోట్ల నిధులు దీర్ఘకాలంగా పెండింగ్‌లో ఉన్నందున వాటిని తక్షణం బదిలీ చేసేలా కేంద్రం ఆదేశాలు ఇవ్వడం.
22. రాష్ట్రంలో కొత్తగా నాలుగు విమానాశ్రయాలను అభివృద్ధి చేయాలని రాష్ట్ర ప్రభుత్వం ప్రతిపాదనలు పంపగా అందులో వరంగల్ సమీపంలోని మామునూరు ఎయిర్ పోర్టు ప్రస్తుతం పురోగతిలో ఉన్నది. మిగిలిన మూడు ఆదిలాబాద్, పాల్వంచ (కొత్తగూడెం జిల్లా), బసంత్ నగర్ (పెద్దపల్లి జిల్లా) ఎయిర్ పోర్టులకు సైతం అనుమతి ఇవ్వడం.
23. రాష్ట్రంలో వికారాబాద్-కృష్ణా (122. కి.మీ.), కల్వకుర్తి-మాచర్ల (120), గద్వాల-దోర్నకల్ (316), కాచిగూడ-జగ్గయ్యపేట (250), పటాన్‌చెరు-ఆదిలాబాద్ (320), బోధన్-లాటూరు (128), అక్కన్నపేట బైపాస్ (128), పాండురంగాపురం-భద్రాచలం (13 కి.మీ.) మేర కొత్త రైల్వే లైన్‌ల ప్రతిపాదనలకు ఆమోదం.
24. విభజన చట్టం ప్రకారం ఉమ్మడి ఖమ్మం జిల్లాలో స్టీల్ ప్లాంట్ నిర్మాణానికి కేంద్రం చొరవ తీసుకోవడం.
25. తెలంగాణలోని వివిధ జిల్లాలను కలుపుతూ ఉన్న 16 రాష్ట్ర రహదారులను, ఇతర రాష్ట్రాలను కలుపుతున్న ఇండస్ట్రియల్ కారిడార్లను, టూరిజం కేంద్రాల రోడ్లను జాతీయ రహదారులుగా గుర్తించడం.
26. ‘పీఎం మిత్ర పార్కు’ స్కీమ్ కింద కాకతీయ మెగా టెక్స్ టైల్ పార్కును నిర్మించడంతో పాటు కేంద్రం నుంచి ఆర్థిక సాయం అందించడం.
27. రాష్ట్రంలో కొత్తగా 19 జవహర్ నవోదయ విద్యాలయాలను ఏర్పాటు చేయాలన్న రాష్ట్ర ప్రభుత్వ ప్రతిపాదనల్లో ఏడు మాత్రమే కేంద్రం ఆమోదించినందున మిగిలినవాటిని కూడా వీలైనంత తొందరగా క్లియర్ చేయడం.

Read Also: ‘సర్’పైనే ప్రతిపక్షాల ప్రధాన గురి

Follow Us On: X(Twitter)