తెలంగాణ క్యాబినెట్(Telangana Cabinet) మంగళవారం సమావేశమై పలు కీలక నిర్ణయాలు తీసుకున్నది. ముఖ్యమంత్రి రేవంత్‌రెడ్డి అధ్యక్షతన జరిగిన కేబినెట్ సమావేశం దాదాపు నాలుగు గంటలపాటు సాగింది. ఇందులో జీహెచ్ఎంసీ విస్తరణ, విద్యుత్ రంగంలో పునర్‌వ్యవస్థీకరణ, కొత్త పరిశ్రమలకు స్వతంత్ర విద్యుత్ ఉత్పత్తి అనుమతి, స్పోర్ట్స్–ఎడ్యుకేషన్ రంగాలకు ప్రత్యేక కేటాయింపులు వంటి అనేక నిర్ణయాలు తీసుకున్నారు. అనంతరం మంత్రి శ్రీధర్‌బాబు మీడియాతో సమావేశమై కేబినెట్ తీర్మానాలను వివరించారు.
జీహెచ్‌ఎంసీలో 27 మున్సిపాలిటీల విలీనం
మెట్రో సిటీలో పెరుగుతున్న జనాభా, సేవల విస్తరణ, పట్టణ అభివృద్ధి అవసరాలను దృష్టిలో ఉంచుకొని ఔటర్ రింగ్ రోడ్‌ పరిసర ప్రాంతాల మున్సిపాలిటీలను జీహెచ్ఎంసీ పరిధిలోకి చేర్చాలని కేబినెట్ నిర్ణయించింది. పెద్ద అంబర్‌పేట్, జల్‌పల్లి, శంషాబాద్, తుర్కయంజాల్, మణికొండ, నార్సింగి, ఆదిభట్ల, మేడ్చల్, నాగారం, దమ్మాయిగూడ, పోచారం, ఘట్‌కేసర్, గుండ్లపోచంపల్లి, తూంకుంట, కొంపల్లి, దుండిగల్, బొల్లారం, తెల్లాపూర్, అమీన్‌పూర్, బడంగ్‌పేట్, బండ్లగూడ జాగీర్, మీర్‌పేట, బోడుప్పల్, నిజాంపేట్, ఫిర్జాదిగూడ, జవహర్‌నగర్ మున్సిపాలిటీలు జీహెచ్‌ఎంసీలో విలీనం కానున్నాయి. ఈ నిర్ణయం అమల్లోకి వస్తే మెట్రో నగర పరిమాణం గణనీయంగా పెరగనుంది. అందుకు అవసరమైన జీహెచ్ఎంసీ యాక్ట్, తెలంగాణ మున్సిపల్ చట్టాలకు సవరణలు చేసేందుకు మంత్రివర్గం ఆమోదం తెలిపింది.
విద్యుత్ రంగంలో భారీ మార్పులు
క్యాబినెట్(Telangana Cabinet) సమావేశంలో మరో డిస్కమ్ ఏర్పాటు చేయాలని ప్రభుత్వం నిర్ణయించింది. ఈ కొత్త డిస్కమ్ పరిధిలో లిఫ్ట్ ఇరిగేషన్ కనెక్షన్లు, హైదరాబాద్ మెట్రో వాటర్ సప్లై, వ్యవసాయ విద్యుత్ కనెక్షన్లు, మిషన్ భగీరథ సరఫరాలు వంటి కీలక విభాగాలు చేరనున్నారు. వచ్చే దశాబ్దంలో రాష్ట్రంలో పెరుగనున్న విద్యుత్ డిమాండ్‌కు ముందుగానే ప్రణాళికలు సిద్ధం చేస్తూ పలు కీలక నిర్ణయాలు తీసుకున్నారు. రాష్ట్రంలోని ఉచిత వ్యవసాయ కనెక్షన్లు, లిఫ్ట్ ఇరిగేషన్ స్కీమ్స్, మిషన్ భగీరథ, సురక్షిత తాగునీటి పథకాలు, హైదరాబాద్ మెట్రో వాటర్ సప్లయ్ సీవరేజ్ బోర్డ్.. తదితర సంస్థలకు చెందిన పవర్ కనెక్షన్లన్నీ కొత్త డిస్కమ్ పరిధిలోకి వస్తాయి.
పునరుత్పాదక విద్యుత్తు వినియోగం పెంచేందుకు కేంద్ర ప్రభుత్వం తెచ్చిన నిబంధనల ప్రకారం.. రాష్ట్రంలో పునరుత్పాదక విద్యుత్ వినియోగాన్ని పెంచేందుకు మంత్రివర్గం ఆమోదం. ఇందులో భాగంగా 3000 మెగా వాట్ల సోలార్ పవర్ కొనుగోలుకు వీలైనంత తొందరగా టెండర్లు పిలవాలని నిర్ణయం. ఐదేళ్ల పాటు విద్యుత్ సరఫరా చేసే కాల పరిమితి ఒప్పందాలతో ఈ టెండర్లు పిలవాలని కేబినెట్ నిర్ణయం. రామగుండం థర్మల్ పవర్ స్టేషన్లో కొత్తగా నిర్మించే 800 మెగావాట్ల ప్లాంట్‌ను ఎన్టీపీసీ అధ్వర్యంలో చేపట్టాలని మంత్రివర్గం నిర్ణయించింది. పాల్వంచ, మక్తల్ లోనూ ఎన్టీపీసీ అధ్వర్యంలో విద్యుత్తు ప్లాంట్ల నిర్మాణానికి ఉన్న అవకాశాలను పరిశీలించాలని అధికారులకు సూచించింది. ఎన్టీపీసీకి ఈ యూనిట్ నిర్మాణం అప్పగిస్తే ఎంత విద్యుత్ యూనిట్ రేట్ పడుతుంది.. జెన్ కో ద్వారా చేపడితే ఎంత రేట్ పడుతుందో.. ముందుగా అంచనాలు వేసుకొని తుది పరిశీలన చేయాలని కేబినెట్ నిర్ణయించింది.
క్యాబినెట్‌లో తీసుకున్న ప్రధాన నిర్ణయాలు ఇవే..
3,000 మెగావాట్ల సోలార్ విద్యుత్ కొనుగోలు, త్వరలోనే టెండర్లు పిలవాలని నిర్ణయం.
2,000 మెగావాట్ల పంప్డ్ స్టోరేజ్ పవర్ కొనుగోలు
పంప్డ్ స్టోరేజ్ ప్రాజెక్టులలో పెట్టుబడులకు ఆహ్వానం
కొత్త పరిశ్రమలకు స్వయంగా విద్యుత్ ఉత్పత్తి చేసుకునే అనుమతి
రామగుండంలో ఎన్టీపీసీ ఆధ్వర్యంలో 800 మెగావాట్ల నూతన ప్లాంట్ నిర్మాణానికి ఆమోదం
పాల్వంచ, మక్తల్ ప్రాంతాల్లో కొత్త విద్యుత్ ప్లాంట్ల అవకాశాలపై పరిశీలన
హైదరాబాద్‌కు భూగర్భ విద్యుత్ వ్యవస్థ
మెట్రో నగరంలో విద్యుత్ వ్యవస్థను ఆధునీకరించేందుకు ప్రభుత్వం కీలక నిర్ణయం తీసుకుంది. హైదరాబాద్‌ను 3 సర్కిళ్లుగా విభజించి ప్రథమ దశలో భూగర్భ కేబులింగ్ వ్యవస్థ ఏర్పాటు చేయనున్నారు. ఈ కేబులింగ్‌తో పాటు టీఫైబర్ లైన్లను కూడాను ఏర్పాటు చేసి నగరంలో డిజిటల్ కనెక్టివిటీని మరింత మెరుగుపరచాలని నిర్ణయం తీసుకున్నారు. భద్రాద్రి జిల్లా దుమ్ముగూడెం మండలంలోని పెద్దనల్లవెల్లిలో యంగ్ ఇండియా స్కూల్ నిర్మాణం కోసం 20 ఎకరాల భూమి కేటాయించారు. ములుగు జిల్లా జగ్గన్నపేటలో స్పోర్ట్స్ స్కూల్ కోసం 40 ఎకరాలు కేటాయించారు. జూబ్లీహిల్స్‌తో పాటు రాష్ట్రంలోని మరికొన్ని ప్రాంతాల్లో ఆధునిక అడ్వాన్స్‌డ్ ట్రైనింగ్ ఇన్‌స్టిట్యూట్‌లు ఏర్పాటు చేయాలని నిర్ణయం తీసుకున్నారు.
Read Also: కాంగ్రెస్ ఎమ్మెల్యేకు నిరసన సెగ
Follow Us on: Youtube
