కలం, వెబ్ డెస్క్: తమిళ సినిమా నటి విష్ణుప్రియ (Tamil Actress Vishnupriya) తండ్రి సూర్యనారాయణన్ (73) దారుణ హత్యకు గురయ్యారు. దిండిగల్ జిల్లా కొడైకెనాల్లోని తన సొంత రిసార్ట్లో ఆయన్ని దుండగులు కిరాతకంగా చంపేశారు. అనంతరం రిసార్ట్లోని నగలు, నగదుతో పరారయ్యారు. స్థానిక పోలీసులు తెలిపిన వివరాల ప్రకారం.. హైదరాబాద్కు చెందిన సూర్యానారాయణన్ కొడైకెనాల్ సమీపంలోని కురింజి ఆండవర్ ఆలయం సమీపంలో రిసార్ట్ ఉంది. కోయంబత్తూరుకు చెందిన ఐదుగురు యువకులు రెండు రోజుల కిందట ఇక్కడ అద్దెకు దిగారు. ఈ క్రమంలో శనివారం సాయంత్రం రిసార్ట్స్లోని పనివాళ్లు పని ముగించుకొని వెళ్లిపోయారు. ఆర్ముగం, మురళి అనే ఇద్దరు కాపలాదారులు ఉన్నారు.
ఇదే అదనుగా భావించిన యువకులు వాళ్లిద్దరినీ తాళ్లతో కట్టేసి, సూర్యనారాయణన్ను బంధించారు. స్విమ్మింగ్పూల్ సమీపంలోని కుర్చీలో చేతులు, కాళ్లను తాళ్లతో కట్టేశారు. అనంతరం ముక్కు, నోరు మూసేసి ఊపిరాడకుండా చేసి చంపేశారు. మరుసటి రోజు రిసార్ట్కు వచ్చిన పనవాళ్లు విషయం గమనించి పోలీసులకు ఫిర్యాదు చేశారు. సంఘటన స్థలానికి చేరుకున్న పోలీసులు సూర్యనారాయణన్ అప్పటికే మృతి చెందినట్లు గుర్తించారు. అలాగే రిసార్ట్ నుంచి భారీగా నగదు, నగలతోపాటు సీసీ టీవీలను ఎత్తుకుపోయినట్లు తేల్చారు. నిదితుల కోసం పోలీసులు గాలింపు మొదలుపెట్టారు.
పాత పగతోనే?
సూర్యనారాయణన్ కుమార్తె విష్ణుప్రియ (Tamil Actress Vishnupriya) అనేక తమిళ సినిమాల్లో సహాయ పాత్రల్లో నటించారు. ఆమె దివ్యాంగురాలిగా నటించిన ‘మాయావి’ సినిమా ఎంతో పేరు తెచ్చింది. అయితే, డ్రైవర్ ప్రభాకరన్తో విష్ణుప్రియ ప్రేమలో ఉన్నట్లు కొన్నేళ్ల కిందట వార్తలు గుప్పుమన్నాయి. ఈ క్రమంలోనే 2018లో ప్రభాకరన్ గుర్తుతెలియని దుండగుల చేతిలో హత్యకు గురయ్యాడు. ఇప్పుడు, అందుకు ప్రతీకారంగానే సూర్యనారాయణన్ హత్య జరిగినట్లు పోలీసులు అనుమానిస్తున్నారు. కాగా, విష్ణుప్రియ ప్రస్తుతం చెన్నలో నివాసం ఉంటోంది.
