కలం, వెబ్డెస్క్: ముస్లిం చట్టంలోని ‘తలాక్ ఎ హసన్’ (Talaq e Hasan) పై సుప్రీంకోర్టు కీలక వ్యాఖ్యలు చేసింది. ఈ అంశంపై దాఖలైన వివిధ పిటిషన్లను బుధవారం అత్యున్నత న్యాయస్థానం విచారించింది. ఈ సందర్భంగా వర్చువల్ (వాట్సాప్, ఈమెయిల్) తలాక్ పై ఆందోళన వ్యక్తం చేసింది.
ముస్లిం షరియా చట్టం ప్రకారం.. విడాకులు ఇచ్చే పద్ధతుల్లో మొదటిది ట్రిపుల్ తలాక్. ఈ విధానంలో భర్త మూడుసార్లు వెంట వెంటనే భార్యకు తలాక్ అని చెప్తే వారి మధ్య బంధం తెగిపోయినట్లే. ఈ పద్ధతిని భారత ప్రభుత్వం ఐదేళ్ల కిందట రద్దు చేసింది. ఇక రెండోది తలాక్ ఎ హసన్. ఇందులో భర్త నెలకోసారి చొప్పున వరుసగా మూడు నెలలు భార్యకు తలాక్ చెప్పడం ద్వారా విడాకులు పొందొచ్చు.
ఈ విధానంపై జర్నలిస్ట్ బేనజీర్ హీనా (Benazir Heena) దాఖలు చేసిన పిటిషన్ను మొదట ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్మాల్యా బాగ్చీతో కూడిన ధర్మాసనం విచారించింది. భర్త తన ఇంటి చిరునామాకు కాకుండా వేరే చోటుకు తలాక్ నోటీస్ పంపారని, అందువల్ల ఇది చెల్లదని ప్రకటించాలని పిటిషనర్ విన్నవించారు. దీనిని భర్త తరఫు న్యాయవాది ఖండించారు. సరైన అడ్రస్కే పంపామన్నారు. ఈ కేసు సంక్లిష్టతను గుర్తించిన న్యాయస్థానం.. పరిష్కారానికి మధ్యవర్తిగా సుప్రీం మాజీ జస్టిస్ కురియన్ జోసెఫ్ను నియమించింది. నాలుగు వారాల్లోగా వివాదాన్ని పరిష్కరించేలా చూడాలని ఆయన్ను కోరింది. అంతవరకు తలాక్ అమలును తాత్కాలికంగా నిలిపివేస్తున్నట్లు పేర్కొంది.
మరో కేసులోనూ తలాక్ ఎ హసన్ (Talaq e Hasan) అమలును సుప్రీం నిలిపివేసింది. చదువురాని భార్య నుంచి ఖాళీ కాగితంపై సంతకాలు తీసుకుని తలాక్ ఇచ్చినట్లు ఆరోపణలు ఉండటంతో ఈ నిర్ణయం తీసుకుంది. దీనిని ఖండించేందుకు భర్త కోర్టుకు రాకపోవడం ధర్మాసనం గమనించింది.
‘తనపై వచ్చిన ఆరోపణలను భర్త ఖండించలేదు. కాబట్టి తలాక్ ఎ హసన్ అమలును నిలిపివేస్తున్నాం. చెల్లుబాటు అయ్యేలా తలాక్ ఇచ్చినట్లు భర్త నిరూపించే వరకు ఇద్దరూ చట్ట ప్రకారం భార్యాభర్తలే’ అని కోర్టు (Supreme Court) పేర్కొంది.
వర్చువల్ తలాక్లు ఆందోళనకరం..
రాజ్యాంగంలోని ఆర్టికల్ 14 (సమానత్వ హక్కు), ఆర్టికల్ 15 (వివక్ష నిషేధం), ఆర్టికల్ 21 (జీవన, వ్యక్తిగత స్వేచ్ఛ హక్కు)లను తలాక్ ఎ హసన్ ఉల్లంఘిస్తోందని దాఖలైన మరో పిటిషన్నూ న్యాయస్థానం విచారించింది.
ఇమెయిల్, వాట్సాప్, రిజిస్టర్డ్ పోస్టు ద్వారా భర్త తలాక్ ఇచ్చినట్లు పేర్కొన్న మహిళ, ఇలా అన్యాయపు తలాక్తోపాటు ప్రతీకార క్రిమినల్ కేసులు, పోలీసుల పక్షపాతం వల్ల నష్టపోయిన ముస్లిం మహిళలకు రక్షణ కల్పించేలా మార్గదర్శకాలు జారీ చేయాలని కోరింది. ఈ పిటిషన్ విచారణ సందర్భంగా వర్చువల్ తలాక్లపై ఆందోళన వ్యక్తం చేసిన ధర్మాసనం తలాక్ ఎ హసన్పై వచ్చిన పిటిషన్లను రాజ్యాంగ ధర్మాసనానికి పంపే అంశాన్ని పరిశీలిస్తున్నట్లు సంకేతాలు ఇచ్చింది.
ఈ సందర్భంగా ‘సమాజం మొత్తానికి సంబంధించిన అంశం ఇది. తీవ్ర వివక్ష కలిగించే ఆచారాలు ఉంటే కోర్టు జోక్యం చేసుకోవాల్సిందే’ అని జస్టిస్ సూర్యకాంత్ వ్యాఖ్యానించారు.
Read Also: డాక్టర్ శ్రీలీల.. ఎంబీబీఎస్ పట్టా అందుకున్న నటి
Follow Us On: Youtube
