కలం, ఖమ్మం బ్యూరో: గ్రామ పంచాయతీ సమగ్ర అభివృద్ధి ప్రణాళిక రూపకల్పన, అమలుపై ఖమ్మం (Khammam) జిల్లాలోని సర్పంచులు, పంచాయతీ కార్యదర్శులకు నియోజకవర్గాల వారీగా రెండు రోజుల పాటు ప్రత్యేక శిక్షణ కార్యక్రమాలు నిర్వహించనున్నట్లు జిల్లా గ్రామీణాభివృద్ధి అధికారి విద్యాచందన బుధవారం తెలిపారు. జిల్లాలోని మూడు కేంద్రాలలో జూలై 9, 10 తేదీల్లో ఉదయం 10 గంటల నుండి సాయంత్రం 5 గంటల వరకు ఈ శిక్షణా తరగతులు జరుగుతాయని ఆమె పేర్కొన్నారు.
ఈ షెడ్యూల్ ప్రకారం జూలై 9న కొత్తగూడెం క్లబ్లో కొత్తగూడెం, ఇల్లందు, వైరా నియోజకవర్గాలకు చెందిన ప్రజాప్రతినిధులు, అధికారులకు శిక్షణ ఇస్తారు. అదే రోజు భద్రాచలంలోని వీరభద్ర ఫంక్షన్ హాల్లో భద్రాచలం, పినపాక నియోజకవర్గాల వారికి శిక్షణ ఉంటుంది. అనంతరం, జూలై 10న పట్వారిగూడెంలోని చలికాని ఆదమ్మ ఫంక్షన్ హాల్లో అశ్వారావుపేట నియోజకవర్గానికి చెందిన సర్పంచులు, పంచాయతీ కార్యదర్శులకు ఈ కార్యక్రమాన్ని నిర్వహించనున్నారు.
గ్రామ అవసరాల గుర్తింపు, ప్రాధాన్యతల నిర్ణయం, అభివృద్ధి కార్యక్రమాల రూపకల్పనతో పాటు ప్రభుత్వ మార్గదర్శకాల అమలుపై ఈ శిక్షణలో పూర్తి అవగాహన కల్పిస్తామని డీఆర్డీఓ వివరించారు. కాబట్టి సంబంధిత నియోజకవర్గాలకు చెందిన సర్పంచులు, పంచాయతీ కార్యదర్శులు అందరూ నిర్ణీత తేదీలలో, నిర్దేశిత సమయానికి ఆయా శిక్షణా కేంద్రాలకు తప్పనిసరిగా హాజరై, ఈ కార్యక్రమాన్ని విజయవంతం చేయాలని ఆమె కోరారు.
Read Also: అర్జెంటీనా సంచలన విజయం.. కోచ్ స్కలోని ఎమోషనల్
Follow Us On: X(Twitter)
