కలం డెస్క్ : ఖైరతాబాద్ ఎమ్మెల్యే దానం నాగేందర్, స్టేషన్ ఘన్‌పూర్ ఎమ్మెల్యే కడియం శ్రీహరిలకు పార్టీ ఫిరాయింపు అంశానికి సంబంధించి అసెంబ్లీ స్పీకర్ గడ్డం ప్రసాద్(Speaker Gaddam Prasad) తాజాగా నోటీసులు జారీచేశారు. పార్టీ ఫిరాయింపు వ్యవహారంలో రాతపూర్వకంగా వైఖరిని తెలియజేయాలని, అఫిడవిట్ దాఖలు చేయాలని ఆ నోటీసుల్లో పేర్కొన్నారు. మొత్తం పది మంది బీఆర్ఎస్ ఎమ్మెల్యేలు కాంగ్రెస్‌లోకి ఫిరాయించారని పలువురు బీఆర్ఎస్ ఎమ్మెల్యేలు ఫిర్యాదు చేయడం, స్పీకర్ నిర్ణయం తీసుకోకపోవడంతో సుప్రీంకోర్టులో పిటిషన్లు దాఖలు చేశారు. నాలుగు వారాల్లోగా ఈ వ్యవహారాన్ని తేల్చేయాలని చీఫ్ జస్టిస్ నేతృత్వంలోని సుప్రీంకోర్టు ధర్మాసనం మూడు రోజుల క్రితం ఆదేశించడంతో విచారణ ప్రక్రియను స్పీకర్ ముమ్మరం చేశారు. ఇప్పటివరకు ఎనిమిది మంది ఎమ్మెల్యేలు స్పీకర్ విచారణకు హాజరుకాగా దానం నాగేందర్, కడియం శ్రీహరి మాత్రం అటు అఫిడవిట్ సమర్పించలేదు.. ఇటు విచారణకు హాజరు కాలేదు. మరోవైపు వివరణ ఇవ్వడానికి గడువు కావాలంటూ స్పీకర్‌ను అనుమతి కోరారు.
రాజీనామా యోచనలో దానం నాగేందర్ :
సుప్రీంకోర్టు ఇచ్చిన గడువు మేరకు నాలుగు వారాల్లో తేల్చాల్సి ఉన్నందున వీరిద్దరికీ స్పీకర్(Speaker Gaddam Prasad) నోటీసులు జారీచేయడం గమనార్హం. ఇదే సమయంలో దానం నాగేందర్(Danam Nagender) ఢిల్లీ వెళ్ళారు. అక్కడ కొందరు ఏఐసీసీ పెద్దలను కలిసి హైదరాబాద్ వచ్చిన తర్వాత లాంఛనంగా రాజీనామా చేయనున్నట్లు సన్నిహిత వర్గాల సమాచారం. అసెంబ్లీ ఎన్నికల్లో ఖైరతాబాద్ నుంచి బీఆర్ఎస్ బీ-ఫామ్ మీద పోటీ చేసి గెలిచి పార్లమెంటు ఎన్నికల్లో సికింద్రాబాద్ నియోజకవర్గం నుంచి కాంగ్రెస్ బీ-ఫామ్ మీద పోటీ చేసినందున పార్టీ ఫిరాయించినట్లేనని, అనర్హుడిని చేయాలని స్పీకర్‌కు ఇచ్చిన ఫిర్యాదులో బీఆర్ఎస్ ఎమ్మెల్యేలు పేర్కొన్నారు. స్పీకర్ అనర్హత వేటు వేయడం దాదాపు ఖాయమనే సమాచారం అందుతున్న నేపథ్యంలో అదే జరిగితే ఆరు సంవత్సరాల వరకు మళ్ళీ పోటీచేసే అవకాశాన్ని కోల్పోనున్నందున స్వచ్ఛందంగా రాజీనామా చేయడమే ఉత్తమమనే అభిప్రాయానికి వచ్చినట్లు తెలిసింది. ఒకటి రెండు రోజుల్లో రాజీనామా చేసి తిరిగి ఖైరతాబాద్ నుంచి కాంగ్రెస్ అభ్యర్థిగా పోటీచేసే అవకాశాలున్నాయి.
వివరణ ఇవ్వనున్న కడియం శ్రీహరి :
స్పీకర్ ఇచ్చిన నోటీసుకు అనుగుణంగా పార్టీ మారిన వ్యవహారంలో స్టేషన్ ఘన్‌పూర్ ఎమ్మెల్యే కడియం శ్రీహరి వివరణ ఇవ్వనున్నారు. పార్లమెంటు ఎన్నికల్లో వరంగల్ నియోజకవర్గం (రిజర్వు) నుంచి ఆయన కుమార్తె కడియం కావ్య కాంగ్రెస్ అభ్యర్థిరిగా పోటీచేసే నామినేషన్ పత్రంపై ప్రొపోజర్‌గా కడియం శ్రీహరి సంతకం చేశారన్న అభియోగాన్ని బీఆర్ఎస్ ఎమ్మెల్యేలు ఆ ఫిర్యాదుల్లో ప్రస్తావించారు. కానీ ఈ అంశం అనర్హత వేటు వేయడానికి తగిన గ్రౌండ్‌గా ఉండదన్నది రాజ్యాంగ నిపుణుల అభిప్రాయం. మరోవైపు కుమార్తె ఎన్నికల ప్రచారం సందర్భంగా కాంగ్రెస్ వాహనంపై కనిపించారని, ఇది కూడా అనర్హతకు ఒక ఆధారంగా ఉంటుందని బీఆర్ఎస్ ఎమ్మెల్యేలు ప్రస్తావించారు.
దీనిపై కడియం శ్రీహరి(Kadiyam Srihari) ఎలాంటి వివరణ ఇస్తారు.. స్పీకర్ దాని ఆధారంగా ఎలాంటి నిర్ణయం తీసుకుంటారన్నది ఆసక్తికరంగా మారింది. కానీ ఈ రెండు కారణాలూ అనర్హతకు ఉపయోగపడకపోవచ్చనే భావనతో రాజీనామా చేసే అవకాశాలు ఉండకపోవచ్చన్న మాటలూ వినిపిస్తున్నాయి. అఫిడవిట్‌లో కడియం శ్రీహరి ఏం పేర్కొంటారు.. వాటిపై స్పీకర్ విచారణలో బీఆర్ఎస్ ఎమ్మెల్యేల, న్యాయవాదుల క్రాస్ ఎగ్జామినేషన్ ఎలా ఉంటుందన్నది చర్చనీయాంశంగా మారింది. ఒకటి రెండు రోజుల్లో ఆయన కూడా స్పీకర్ విచారణకు హాజరయ్యే అవకాశాలున్నాయి.
Read Also: ఫార్ములా ఈ రేస్ కేసులో కీలక మలుపు… కేటీఆర్ అరెస్ట్ కానున్నారా?
Follow Us on : Pinterest
