కలం, చంద్రుగొండ: భద్రాద్రి కొత్తగూడెం జిల్లా చంద్రుగొండ మండలంలో భారీ వర్షాల కారణంగా వాగులు, వంతెనలు పొంగి ప్రవహిస్తున్నాయి. మండలంలోని సీతాయిగూడెం వెళ్లే ప్రధాన మార్గంలో ఉన్న వంతెన (Seethaigudem Bridge) పైకి భారీగా వరదనీరు ఉప్పొంగి ప్రవహిస్తుండటంతో, అధికారులు తక్షణమే స్పందించి ఆ మార్గంలో రాకపోకలను పూర్తిగా నిలిపివేశారు. ప్రమాదాలు జరగకుండా ప్రజలను అప్రమత్తం చేసేందుకు పంచాయతీ, రెవెన్యూ, పోలీస్ శాఖల అధికారులు సమన్వయంతో రంగంలోకి దిగారు.
వంతెన రెండు వైపులా ట్రాక్టర్లు, ట్రక్కులను అడ్డుగా ఉంచి వాహనాల రాకపోకలను పూర్తిగా కట్టడి చేశారు. ప్రజల ప్రాణ రక్షణే ధ్యేయంగా అధికారులు వంతెన వద్ద ప్రత్యేక నిఘాను ఏర్పాటు చేశారు. ఎలాంటి అవాంఛనీయ ఘటనలు చోటుచేసుకోకుండా ముందస్తుగా పోలీస్ శాఖ నుంచి ఇద్దరు, రెవెన్యూ శాఖ నుంచి ఇద్దరు, పంచాయతీ కార్మికులు ఇద్దరు చొప్పున సిబ్బందిని విధుల్లో కేటాయించారు.
ఈ సిబ్బంది నిరంతరం అక్కడే ఉంటూ, వంతెన దాటేందుకు ప్రయత్నించే వాహనదారులను అడ్డుకుంటున్నారు. వారికి పరిస్థితిని వివరించి సురక్షితమైన ప్రత్యామ్నాయ మార్గాల వైపు మళ్లిస్తున్నారు. వరద ఉధృతి తగ్గే వరకు ప్రజలు ఎట్టి పరిస్థితుల్లోనూ సాహసాలు చేయవద్దని అధికారులు స్పష్టం చేస్తున్నారు. ద్విచక్ర వాహనాలు, ఆటోలు, కార్లు, ఇతర వాహనాల డ్రైవర్లు వంతెన దాటే ప్రయత్నం చేయవద్దని హెచ్చరించారు.
వంతెనపై నీటి ప్రవాహం పూర్తిగా తగ్గి, సాధారణ పరిస్థితులు ఏర్పడే వరకు ప్రజలందరూ అధికారుల సూచనలను తూచా తప్పకుండా పాటించాలని విజ్ఞప్తి చేశారు. అత్యవసర పనులు ఉన్నవారు స్థానిక పరిస్థితిని బేరీజు వేసుకుని ప్రత్యామ్నాయ మార్గాలను మాత్రమే వినియోగించుకోవాలని కోరారు. అధికారుల సకాలంలో తీసుకున్న ముందస్తు చర్యలు, సమన్వయ పర్యవేక్షణ వల్ల ఎలాంటి ప్రాణనష్టం జరగకుండా పరిస్థితి అదుపులో ఉంది.
