సత్యసాయిబాబా(Sathya Sai) శత జయంతి ఉత్సవాల్లో తెలంగాణ ముఖ్యమంత్రి రేవంత్ రెడ్డి(Revanth Reddy) పాల్గొన్నారు. మనుషుల్లో భగవంతుడిని చూసిన మహోన్నత వ్యక్తి సత్యసాయి అని పేర్కొన్నారు. ఈ సందర్బంగానే అందరికీ సత్యసాయి బాబా జయంతి శుభాకాంక్షలు తెలిపారు. ఈ కార్యక్రమంలో పాల్గొనడం తనకు ఒక గొప్ప గౌరవం.. అరుదైన అవకాశమని వ్యాఖ్యానించారు. బాబా ప్రేమతో మనుషులను గెలిచారని కొనియాడారు. ఆయన అందించిన సేవల కారణంగానే ఇప్పుడు దేవుడిలా పూజలు అందుకుంటున్నారని అన్నారు. ప్రేమతో ఏదైనా సాధించవచ్చు అనడానికి బాబా నిలువెత్తు నిదర్శనమని అన్నారు.
ఆయన మన మధ్య లేకపోయినా వారి స్ఫూర్తి మనందరిలో ఉందని అన్నారు. బాబా ప్రభుత్వాలతో పోటీ పడి కేజీ నుంచి పీజీ వరకూ పేదలకు ఉచితంగా విద్యనందించారని తెలిపారు. పేదలకు ఉచిత వైద్యం అందించి దేవుడిగా కొలువబడుతున్నారన్నారు. తెలంగాణ, ఆంధ్రప్రదేశ్ లోనే కాదు తమిళనాడు, కర్ణాటకతో పాటు ప్రపంచ వ్యాప్తంగా బాబా ట్రస్ట్ సేవలు కొనసాగుతున్నాయని చెప్పారు. మానవ సేవే మాధవ సేవ అని నమ్మి విద్య, వైద్యంతో పాటు ప్రజలకు మంచినీటి కష్టాలను దూరం చేసి వారి దాహార్తిని తీర్చిన వ్యక్తి సత్యసాయి బాబా అని అన్నారు. ప్రపంచవ్యాప్తంగా 140 దేశాల్లో బాబా ట్రస్ట్ సేవలు కొనసాగుతున్నాయని తెలిపారు రేవంత్ రెడ్డి(Revanth Reddy).
‘‘బాబా సేవలను మరింత విస్తృతం చేయాల్సిన అవసరం ఉంది. తెలంగాణలోనూ రాష్ట్ర ప్రభుత్వం ఆధ్వర్యంలో భగవాన్ శ్రీ సత్యసాయి బాబా శత జయంతి ఉత్సవాలను అధికారికంగా నిర్వహించాలని ఆదేశించాం. తెలంగాణ రాష్ట్రంలో బాబా సేవలను విస్తృతం చేసేందుకు మా ప్రభుత్వ సహకారం ఎప్పుడూ ఉంటుంది’’ అని స్పష్టం చేశారు.
Read Also: ఏపీని భయపెడుతోన్న మరో తుఫాన్
Follow Us on : Pinterest
