కలం, వెబ్ డెస్క్: రాయల్ ఛాలెంజర్స్ బెంగళూరు (RCB) (ఆర్సీబీ) తన ఖాతాలో మరో విజయాన్ని నమోదు చేసుకున్నది. లక్నో నిర్దేశించిన 147 పరుగుల లక్ష్యాన్ని ఛేదించే క్రమంలో ఆర్సీబీ బ్యాటర్లు ఆరంభంలో తడబడినా, చివరికి పట్టుదలగా నిలిచి గెలుపు తీరాలకు చేరారు. విరాట్ కోహ్లీ (49) కెప్టెన్ ఇన్నింగ్స్తో ఇటు ఫ్యాన్స్ను, అటు టీమ్ను ఉత్సాహపరిచాడు. కేవలం ఒక పరుగు దూరంలో హాఫ్ సెంచరీ మిస్ చేసుకున్నప్పటికీ, ఆర్సీబీ విజయంలో కీలక పునాది వేశాడు. మిడిల్ ఆర్డర్లో రజత్ పాటిదార్ (27), జితేష్ శర్మ (23) మెరుపులు మెరిపించగా, చివర్లో టిమ్ డేవిడ్, రొమారియో షెపర్డ్ చెరో 14 పరుగులు చేసి మరో 29 బంతులు మిగిలి ఉండగానే జట్టును విజయతీరాలకు చేర్చారు. లక్నో బౌలర్లలో ప్రిన్స్ యాదవ్ మూడు వికెట్లతో ఆర్సీబీని వణికించినా, అప్పటికే జరగాల్సిన నష్టం జరిగిపోయింది. వెరసి, చిన్నస్వామి గడ్డపై ఆర్సీబీ తన ఆధిపత్యాన్ని చాటుకుంది.
లక్నో ఇన్నింగ్స్లో మిచెల్ మార్ష్ 40 పరుగులతో టాప్ స్కోరర్గా నిలవగా, ముకుల్ చౌదరి 39, ఆయుష్ బదోని 38 పరుగులతో రాణించారు. మిగిలిన వారిలో ఐడెన్ మార్క్రామ్ 12, జార్జ్ లిండే 7 పరుగులు చేయగా, కెప్టెన్ రిషబ్ పంత్, నికోలస్ పూరన్, ఆవేష్ ఖాన్ తలో ఒక పరుగుకే పరిమితమయ్యారు. అబ్దుల్ సమద్, మొహమ్మద్ షమీ, దిగ్వేష్ రాఠీ ఖాతా తెరవకుండానే వెనుదిరిగారు. ఎక్స్ట్రాల రూపంలో 7 పరుగులు వచ్చాయి. నిర్ణీత 20 ఓవర్లలో లక్నో 146 పరుగులకు ఆలౌట్ అయింది. ఆర్సీబీ బౌలర్లు రాసిఖ్ సలామ్ 4 వికెట్లతో చెలరేగగా, భువనేశ్వర్ కుమార్ 3, క్రునాల్ పాండ్యా 2, జోష్ హేజిల్వుడ్ 1 వికెట్ తీశారు. సుయాష్ శర్మ వికెట్ తీయకపోయినా కట్టుదిట్టంగా బౌలింగ్ చేశాడు.
147 పరుగుల ఛేదనలో ఆర్సీబీ తరపున విరాట్ కోహ్లీ అత్యధికంగా 49 పరుగులు (34 బంతులు, 6 ఫోర్లు, 1 సిక్స్) చేశాడు. రజత్ పాటిదార్ 13 బంతుల్లో 27 పరుగులు (1 ఫోర్, 3 సిక్సర్లు), జితేష్ శర్మ 9 బంతుల్లో 23 పరుగులు (2 ఫోర్లు, 2 సిక్సర్లు) చేసి స్కోరు బోర్డును పరిగెత్తించారు. ఓపెనర్ ఫిల్ సాల్ట్ 7, దేవదత్ పడిక్కల్ 10 పరుగులు చేశారు. చివర్లో టిమ్ డేవిడ్, రొమారియో షెపర్డ్ చెరో 14 పరుగులు చేసి నాటౌట్గా నిలిచారు. ఆర్సీబీ 15.1 ఓవర్లలో 5 వికెట్ల నష్టానికి 149 పరుగులు చేసి విజయం సాధించింది. లక్నో బౌలర్లలో ప్రిన్స్ యాదవ్ 3 వికెట్లతో ఆకట్టుకోగా, అవేష్ ఖాన్ 2 వికెట్లు పడగొట్టాడు. మొహమ్మద్ షమీ, దిగ్వేష్ రాఠీ, జార్జ్ లిండే వికెట్లు తీయలేకపోయారు.
