కలం వెబ్డెస్క్: భారత స్టార్ షట్లర్ పి.వి సింధు (PV Sindhu) సరికొత్త చరిత్ర సృష్టించింది. జపాన్ ఓపెన్ టైటిల్ (Japan Open Title) ను ముద్దాడిన తొలి భారతీయురాలిగా చరిత్ర పుటల్లోకెక్కింది. టోక్యో వేదికగా జరిగిన మహిళల సింగిల్స్ ఫైనల్లో ఆతిథ్య స్టార్, ప్రపంచ మూడో ర్యాంకర్ అకానె యమగూచిని 21-17, 21-17 తేడాతో సింధు వరుస గేమ్స్లో మట్టికరిపించింది.
ఈ విజయంతో జపాన్ ఓపెన్ గెలిచిన తొలి భారతీయ షట్లర్గా రికార్డు సృష్టించింది. రెండు సార్లు ఒలింపిక్ పతకాలు సాధించిన సింధు.. చివరిసారిగా 2024 డిసెంబర్లో జరిగిన సయ్యద్ మోదీ ఇంటర్నేషనల్ టోర్నీ విజేతగా నిలిచింది. ఆ తర్వాత సుదీర్ఘ టైటిల్ నిరీక్షణకు ఈ గెలుపుతో తెరదించింది. 31 ఏండ్ల సింధు కెరీర్ లో 2019 వరల్డ్ ఛాంపియన్షిప్ తర్వాత ఇదే అతిపెద్ద టైటిల్ కావడం విశేషం.
ఎన్నో విమర్శలు.. ఉబికివచ్చిన కన్నీళ్లు
ఈ గెలుపు తర్వాత సింధు ఎంతో భావోద్వేగానికి గురైంది. ఎన్నో నెలల కష్టం, విమర్శలు, నిరాశల తర్వాత వచ్చిన ఈ టైటిల్ ఆమె కళ్లలో ఆనందబాష్పాలు నింపింది. “నా ఫామ్పై ఎంతో మంది ఎన్నో సందేహాలు వ్యక్తం చేశారు. ‘సింధు పని అయిపోయిందా?’ అని ప్రశ్నించారు. కానీ నాపై నాకు నమ్మకం ఎప్పుడూ పోలేదు” అంటూ కన్నీళ్లు పెట్టుకుంది.
కష్టకాలంలో అండగా నిలిచిన తన భర్త వెంకట దత్త సాయి, తల్లిదండ్రులు, అత్తామామలు, కోచ్ ఆది ప్రతామా, ఫిట్నెస్ కోచ్, సపోర్ట్ స్టాఫ్కు సింధు ప్రత్యేకంగా కృతజ్ఞతలు తెలిపింది. పూరీ జగన్నాథ రథయాత్ర సమయంలో ఈ చారిత్రాత్మక విజయం సాధించడం ప్రత్యేకంగా అనిపించిందని సింధు పేర్కొంది.‘‘ఈ పవిత్ర రథయాత్ర సమయంలో ఈ విజయం రావడం దైవానుగ్రహంగా భావిస్తున్నాను. త్వరలోనే పూరీ వెళ్లి జగన్నాథ స్వామివారిని దర్శించుకోవాలని ఉంది’’ అని తెలిపింది.
అటాకింగ్ గేమ్.. బుల్లెట్ స్మాష్లు
ఫైనల్లో సింధు నెట్ ప్లే, దూకుడైన స్మాష్లు విజయానికి కీలకమయ్యాయి. తొలి గేమ్లో ఒక దశలో యమగూచి ఆధిక్యంలోకి వెళ్లినా.. విరామం తర్వాత సింధు తన ఆటతీరును పూర్తిగా మార్చేసింది. 36 షాట్ల సుదీర్ఘ ర్యాలీని గెలిచి స్కోరును సమం చేసింది. అనంతరం వరుస పాయింట్లు సాధించి తొలి గేమ్ను సొంతం చేసుకుంది. రెండో గేమ్లోనూ సింధు 44 షాట్ల సుదీర్ఘ ర్యాలీని గెలిచి స్పష్టమైన ఆధిక్యాన్ని సాధించింది. మధ్యలో కొన్ని అనవసర తప్పిదాలు చేసినప్పటికీ.. కోచ్ ఇచ్చిన సూచనలు తనకు ఎంతో ఉపయోగపడ్డాయని సింధు తెలిపింది. తన సహజసిద్ధమైన అటాకింగ్ గేమ్ను కొనసాగిస్తూనే అనవసర తప్పిదాలను తగ్గించుకోవడం వల్లే మ్యాచ్పై పూర్తి ఆధిపత్యం సాధించానని చెప్పింది.
టోర్నీ ఆరంభం నుంచి దూకుడు
ఈ టోర్నీ ఆరంభం నుంచే సింధు అద్భుతమైన దూకుడు ప్రదర్శించింది. ప్రపంచ స్థాయి క్రీడాకారిణులతో జరిగిన ఈ పోరులో తన పాత శైలికి భిన్నంగా, మరింత నియంత్రిత ఆటను ప్రదర్శిస్తూ ప్రత్యర్థులపై మానసిక ఆధిపత్యాన్ని సాధించింది. క్వార్టర్ ఫైనల్లో ఒలింపిక్ విజేత నోజోమి ఒకుహరా, ఆపై సెమీఫైనల్లో ప్రపంచ ఐదో ర్యాంకర్ చెన్యుఫీయ్(చైనా)ను చిత్తు చేసి కొండంత ఆత్మవిశ్వాసంతో ఫైనల్ బెర్త్ను ఖాయం చేసుకుంది.
నెక్స్ట్ టార్గెట్..
ఇదే ఆత్మవిశ్వాసంతో సింధు (PV Sindhu) ఇప్పుడు తన తదుపరి లక్ష్యంపై దృష్టి సారించింది. ఆగస్టు 17 నుంచి 23 వరకు భారత్ వేదికగా జరగనున్న బీడబ్ల్యూఎఫ్ ప్రపంచ ఛాంపియన్షిప్ గురిపెట్టింది. ఇప్పటికే ఈ మెగా టోర్నీలో 2013, 2014లో కాంస్యాలు, 2017, 2018లో రజతాలు, 2019లో స్వర్ణం సాధించిన ఆమె.. ఇప్పుడు స్వదేశంలో జరిగే టోర్నీలో మరోసారి పతకం గెలిచి తన ఘనతను మరింత పెంచుకోవాలని భావిస్తున్నది. ‘‘ఈ విజయం నాకు ఎంతో ఆత్మవిశ్వాసాన్ని ఇచ్చింది. ఇదే దూకుడు, ఇదే ప్రశాంతతను రాబోయే ప్రపంచ ఛాంపియన్షిప్లోనూ కొనసాగించాలనుకుంటున్నాను’’ అని సింధు ధీమా వ్యక్తం చేసింది.
‘‘భారత బ్యాడ్మింటన్ చరిత్రలో ఇదొక గొప్ప క్షణం. జపాన్ ఓపెన్ టైటిల్ గెలిచిన సింధుకు అభినందనలు. టోర్నీ ప్రతి మ్యాచ్లోనూ సింధు చూపించిన పట్టుదల, ఆత్మవిశ్వాసం, అత్యుత్తమ ఆటతీరు ఎంతో అభినందనీయం. సింధు విజయం దేశంలోని ఎంతో మంది యువ క్రీడాకారులకు స్ఫూర్తి”– ప్రధాని మోదీ
Read Also: సీజేపీ ఆందోళనలు.. అమిత్ షాతో ధర్మేంద్ర భేటీ!
Follow Us On : WhatsApp
