కలం, వెబ్ డెస్క్: ఐపీఎల్ 2026 సీజన్లో పంజాబ్ కింగ్స్ యువ సంచలనం ప్రియాన్ష్ ఆర్య (Priyansh Arya) ఆకాశమే హద్దుగా చెలరేగిపోతున్నారు. లక్నో సూపర్ జెయింట్స్తో జరిగిన తాజా పోరులో కేవలం 37 బంతుల్లోనే 93 పరుగులు చేసిన ఆర్య, తన జట్టుకు భారీ విజయాన్ని అందించడమే కాకుండా దిగ్గజ ఆటగాడు కేఎల్ రాహుల్ పేరిట ఉన్న ఒక అరుదైన రికార్డును కూడా తిరగరాశారు. ముందుగా బ్యాటింగ్ చేసిన పంజాబ్ కింగ్స్, ఆర్య విధ్వంసకర ఇన్నింగ్స్, కూపర్ కానలీ చేసిన 87 పరుగుల సాయంతో నిర్ణీత ఓవర్లలో 254 పరుగుల భారీ స్కోరు సాధించింది. లక్ష్య ఛేదనలో లక్నో జట్టు నిర్ణీత ఓవర్లలో 5 వికెట్ల నష్టానికి 200 పరుగులకే పరిమితమైంది. ఈ గెలుపుతో పంజాబ్ కింగ్స్ పాయింట్ల పట్టికలో అగ్రస్థానంలో కొనసాగుతుండగా, వరుసగా మూడవ ఓటమిని మూటగట్టుకున్న లక్నో ఎనిమిదో స్థానానికి పడిపోయింది.
ఈ మ్యాచ్లో ఆర్య కేవలం 19 బంతుల్లోనే అర్ధ సెంచరీ మార్కును అందుకున్నారు. దీంతో పంజాబ్ ఫ్రాంచైజీ తరపున 20 కంటే తక్కువ బంతుల్లో అత్యధిక సార్లు (3 సార్లు) యాభై పరుగులు చేసిన ఆటగాడిగా ఆయన చరిత్ర సృష్టించారు. గతంలో కేఎల్ రాహుల్ రెండుసార్లు మాత్రమే ఈ ఘనత సాధించగా, ఆర్య ఇప్పుడు ఆయనను అధిగమించారు. గత సీజన్లో చెన్నైపై, ఈ సీజన్లో హైదరాబాద్పై కూడా ఆర్య ఇలాగే మెరుపు వేగంతో అర్ధ సెంచరీలు బాదారు. తన ఇన్నింగ్స్లో 9 సిక్సర్లు, 4 ఫోర్లతో విరుచుకుపడ్డ ఆర్య, కేవలం ఏడు పరుగుల దూరంలో సెంచరీ చేసే అవకాశాన్ని కోల్పోయారు. మణిమారన్ సిద్ధార్థ్ బౌలింగ్లో మిచెల్ మార్ష్కు క్యాచ్ ఇచ్చి ఆయన వెనుదిరిగారు. ప్రస్తుతం ఈ సీజన్లో ఐదు ఇన్నింగ్స్లు ఆడిన ఆర్య, దాదాపు 248 స్ట్రైక్ రేట్తో 211 పరుగులు చేసి తన ఫామ్ను కొనసాగిస్తున్నారు.
