కలం, వెబ్ డెస్క్: ఫిఫా వరల్డ్ కప్ 2026 (FIFA World Cup 2026) లో పోర్చుగల్తో జరిగిన మ్యాచ్ కొలంబియాకు (Portugal vs Colombia) కేవలం గ్రూప్ అగ్రస్థానం మాత్రమే కాదు.. 64 ఏళ్లుగా కొనసాగుతున్న ఓ అరుదైన రికార్డుకు కూడా ముగింపు పలికింది. మియామీలో జరిగిన గ్రూప్-కే మ్యాచ్ 0-0తో ముగియడంతో.. వరల్డ్ కప్ చరిత్రలో తొలిసారి కొలంబియా గోల్లేని డ్రా నమోదు చేసింది. అయినప్పటికీ ఏడు పాయింట్లతో గ్రూప్ అగ్రస్థానంలో నిలిచి రౌండ్ ఆఫ్-32కు అర్హత సాధించింది. ఐదు పాయింట్లతో పోర్చుగల్ రెండో స్థానంలో నిలిచి నాకౌట్కు చేరుకుంది.
64 ఏళ్ల తర్వాత ముగిసిన అరుదైన రికార్డు
1962లో చిలీలో జరిగిన వరల్డ్ కప్తో కొలంబియా ప్రపంచకప్ ప్రయాణం ప్రారంభమైంది. అప్పటి నుంచి ఈ టోర్నీలో ఆడిన 23 మ్యాచ్ల్లో గెలిచినా, ఓడినా లేదా డ్రా అయినా.. ప్రతి మ్యాచ్లో కనీసం ఒక గోల్ నమోదైంది. కానీ పోర్చుగల్తో జరిగిన 24వ మ్యాచ్లో ఆ పరంపరకు తెరపడింది. వరల్డ్ కప్ చరిత్రలో కొలంబియాకు ఇదే తొలి గోల్లేని డ్రా.
స్కోరు మారకపోయినా.. ఆధిపత్యం కొలంబియాదే
స్కోరు 0-0గా ముగిసినా మ్యాచ్ మొత్తం కొలంబియానే ఆధిపత్యం చెలాయించింది. బంతిపై 55 శాతం నియంత్రణ సాధించిన ఆ జట్టు.. పోర్చుగల్ 13 షాట్లు కొట్టగా 26 షాట్లు ప్రయత్నించింది. ఆరు అద్భుతమైన సేవ్లతో పోర్చుగల్ గోల్కీపర్ డియోగో కోస్టా జట్టును కాపాడాడు. మ్యాచ్ ఆరంభంలోనే జాన్ అరియాస్ కొట్టిన బలమైన షాట్ను కోస్టా అడ్డుకున్నాడు. కొలంబియా పదే పదే ప్రమాదకర దాడులు చేసింది.
పోర్చుగల్ బాక్స్లో 23 సార్లు బంతిని చేరవేసింది. మరోవైపు ప్రత్యర్థిని తొలి దశలో కేవలం తొమ్మిది టచ్లకే పరిమితం చేసింది. జేమ్స్ రోడ్రిగ్స్ మిడ్ఫీల్డ్లో ఆటను సమర్థంగా నడిపించాడు. 62వ నిమిషంలో రిచర్డ్ రియోస్కు అద్భుతమైన పాస్ అందించినా.. అతడి షాట్ స్వల్ప తేడాతో గోల్ను తప్పించింది. లూయిస్ డియాజ్ కూడా ఎడమవైపు నుంచి వరుస దాడులతో పోర్చుగల్ రక్షణను ఇబ్బంది పెట్టాడు.
రొనాల్డోను కట్టడి చేసిన కొలంబియా
ఉజ్బెకిస్తాన్పై రెండు గోల్స్తో రికార్డు సృష్టించిన క్రిస్టియానో రొనాల్డో ఈ మ్యాచ్లో మాత్రం ప్రభావం చూపలేకపోయాడు. డావిన్సన్ సాంచెజ్, జాన్ లుకుమీ అతడికి అవకాశాలు ఇవ్వలేదు. ఒక బైసికిల్ కిక్తో గోల్కు దగ్గరగా వెళ్లినా.. శాంటియాగో అరియాస్ అద్భుతంగా అడ్డుకున్నాడు. అదనపు సమయంలో కొలంబియా విజయగోల్ సాధించినట్టే కనిపించింది. సెట్పీస్ నుంచి డావిన్సన్ సాంచెజ్ హెడ్డర్ను గోల్గా మలచడంతో ఆటగాళ్లు, అభిమానులు సంబరాల్లో మునిగిపోయారు. అయితే వీఏఆర్ సమీక్ష తర్వాత స్వల్ప ఆఫ్సైడ్ కారణంగా ఆ గోల్ను రద్దు చేశారు. దీంతో మ్యాచ్ 0-0తోనే ముగిసింది.
గ్రూప్ అగ్రస్థానంతో నాకౌట్కు
ఈ డ్రాతో కొలంబియా ఏడు పాయింట్లు సాధించి గ్రూప్-కేలో అగ్రస్థానాన్ని దక్కించుకుంది. టోర్నీలో తొలుత ఉజ్బెకిస్తాన్ను 3-1తో, ఆ తర్వాత డీఆర్ కాంగోను 1-0తో ఓడించిన కొలంబియా.. పోర్చుగల్తో డ్రా చేసి ఓటమి లేకుండానే నాకౌట్కు చేరింది. పోర్చుగల్ ఐదు పాయింట్లతో రెండో స్థానంలో నిలిచింది. రౌండ్ ఆఫ్-32లో కొలంబియా ఘనాను ఎదుర్కోనుండగా.. పోర్చుగల్ క్రొయేషియాతో తలపడనుంది.
జేమ్స్ రోడ్రిగ్జ్ మరో చరిత్ర
ఈ మ్యాచ్ జేమ్స్ రోడ్రిగ్స్కు కూడా ప్రత్యేకంగా నిలిచింది. పోర్చుగల్పై బరిలోకి దిగడంతో అతడు వరల్డ్ కప్లో 11వ మ్యాచ్ ఆడాడు. దీంతో పురుషుల వరల్డ్ కప్ చరిత్రలో అత్యధిక మ్యాచ్లు ఆడిన కొలంబియా ఆటగాడిగా నిలిచాడు. ఇంతకుముందు ఫ్రెడ్డీ రింకాన్, కార్లోస్ వాల్డెరామా చెరో 10 మ్యాచ్లతో ఈ రికార్డును పంచుకున్నారు. జేమ్స్ మరోసారి మిడ్ఫీల్డ్లో జట్టుకు కీలకంగా నిలిచాడు. బంతిపై నియంత్రణతో పాటు అవకాశాలు సృష్టిస్తూ కొలంబియాను నాకౌట్ దశకు చేర్చడంలో ముఖ్యపాత్ర పోషించాడు.
నాలుగు సార్లు గ్రూప్ దశను దాటిన కొలంబియా.. 2014లో క్వార్టర్ఫైనల్ చేరడం అత్యుత్తమ ప్రదర్శనగా నిలిచింది. ఇప్పుడు 2026లో మరోసారి గ్రూప్ విజేతగా నాకౌట్లో అడుగుపెట్టింది. అయితే ఈ మ్యాచ్ను మాత్రం గ్రూప్ అగ్రస్థానం కంటే.. 64 ఏళ్లుగా చెక్కుచెదరని ఒక అరుదైన రికార్డు ముగిసిన రోజుగానే ఫుట్బాల్ ప్రపంచం గుర్తుంచుకోనుంది.
