కలం, స్పోర్ట్స్ : ఫ్రెంచ్ ఓపెన్ గ్రాండ్స్లామ్ మరికొద్ది రోజుల్లో ప్రారంభం కానుండగా, టెన్నిస్ దిగ్గజం నోవాక్ జకోవిచ్ (Djokovic) ఒక కీలక నిర్ణయం తీసుకున్నారు. ఈ ప్రతిష్టాత్మక టోర్నీకి ముందు తన కొత్త కోచ్గా సెర్బియాకే చెందిన విక్టర్ ట్రోయ్స్కి (Viktor Troicki)ని నియమించుకున్నట్లు ఆయన సోషల్ మీడియా వేదికగా ప్రకటించారు. తన స్నేహితుడు, సహచర ఆటగాడు ఇప్పుడు తన కోచ్గా రావడం ఆనందంగా ఉందంటూ జకోవిచ్ పోస్ట్ చేశారు. ఇటీవల కాలంలో సరైన ఫామ్ కోసం ఎదురుచూస్తున్న జకోవిచ్, ఈ క్లే-కోర్ట్ సీజన్లో ఎలాగైనా మరో మేజర్ టైటిల్ సాధించాలనే పట్టుదలతో ఈ మార్పు చేశారు.
నిజానికి విక్టర్ ట్రోయ్స్కి కెరీర్ చాలా ఆసక్తికరంగా సాగింది. ఆయన 2006లో ప్రొఫెషనల్ టెన్నిస్ ఆటగాడిగా ప్రయాణాన్ని ప్రారంభించారు. తన అద్భుతమైన సర్వీసులు, చురుకైన ఆటతీరుతో 2011 నాటికి ప్రపంచ 12వ ర్యాంకుకు చేరుకున్నారు. తన కెరీర్లో మూడు ఏటీపీ సింగిల్స్ టైటిల్స్తో పాటు రెండు డబుల్స్ టైటిల్స్ కూడా గెలిచారు. ముఖ్యంగా 2010లో ఫ్రాన్స్తో జరిగిన డేవిస్ కప్ ఫైనల్లో సెర్బియా గెలవడానికి ఆయనే కీలక పాత్ర పోషించారు.
అయితే, 2013లో ట్రోయ్స్కి కెరీర్లో ఒక పెద్ద వివాదం ఎదురైంది. మాంటే కార్లో మాస్టర్స్ సమయంలో అనారోగ్యం కారణంగా ఆయన బ్లడ్ శాంపిల్ ఇవ్వలేకపోయారు. దీనివల్ల ఇంటర్నేషనల్ టెన్నిస్ ఫెడరేషన్ ఆయనపై 18 నెలల నిషేధం విధించింది. తాను ఏనాడూ డోపింగ్ టెస్టును తప్పించుకోవాలని చూడలేదని, అక్కడ ఉన్న అధికారి ఇచ్చిన సలహా వల్లే ఆ గందరగోళం జరిగిందని ట్రోయ్స్కి అప్పట్లో స్పష్టం చేశారు. ఆ తర్వాతి రోజే బ్లడ్ శాంపిల్ కూడా ఇచ్చానని చెప్పారు. కోర్టును ఆశ్రయించడంతో ఆ నిషేధం 12 నెలలకు తగ్గింది.
ఆ తర్వాత మళ్లీ కోర్టులోకి అడుగుపెట్టిన ఆయన, ఎన్నో విజయాలు అందుకుని 2021లో టెన్నిస్ ఆటకు రిటైర్మెంట్ ప్రకటించారు. జకోవిచ్తో ఎప్పటి నుంచో మంచి అనుబంధం ఉన్న ట్రోయ్స్కి, గతంలో డేవిస్ కప్, పారిస్ ఒలింపిక్స్లో కూడా జకోవిచ్తో కలిసి పనిచేశారు. ఇప్పుడు నేరుగా కోచ్ బాధ్యతలు చేపట్టారు.
