కలం, స్పోర్ట్స్: లాస్ వెగాస్ గ్రాండ్ ప్రీ క్వాలిఫయింగ్లో (Las Vegas GP) ఫెరారీకి గట్టి ఎదురుదెబ్బ తగిలింది. స్టార్ డ్రైవర్లు లూయిస్ హామిల్టన్, చార్లెస్ లెక్లెర్ ఇద్దరూ క్యూ3కి చేరకుండానే నిష్క్రమించారు. లెక్లెర్ 11వ స్థానంలో, హామిల్టన్ 12వ స్థానంలో నిలిచారు. దీంతో ఫెరారీకి ఈ సెషన్ నిరాశగా ముగిసింది. హామిల్టన్ ఈ క్వాలిఫయింగ్ను పీడకలగా అభివర్ణించాడు. కారులో గ్రిప్ లేకపోవడంతో టైర్లు సరిగా పనిచేయలేదని తెలిపాడు. ఫ్లోర్ డ్యామేజ్ కారణంగా 3 నుంచి 4 టెన్త్స్ సెకన్లు కోల్పోయినట్లు చెప్పాడు. చివరి ల్యాప్లో పవర్ డిప్లాయ్మెంట్ సమస్య మరో 6 టెన్త్స్ సెకన్లు నష్టపరిచిందని వెల్లడించాడు. లెక్లెర్ కూడా క్వాలిఫయింగ్పై అసంతృప్తి వ్యక్తం చేశాడు.
స్ట్రెయిట్లలో దాదాపు సెకను వేగం కోల్పోతున్నామని తెలిపాడు. క్యూ2 చివరి ల్యాప్లో తాను చేసిన పొరపాటుతో క్యూ3 అవకాశాన్ని కోల్పోయినట్లు అంగీకరించాడు. టీమ్ వ్యూహంలోనూ లోపాలు జరిగాయని, వాటిపై సమీక్షించాల్సి ఉందని పేర్కొన్నాడు. మ్యాక్లారెన్ డ్రైవర్ ఆస్కార్ పియాస్ట్రీకి 10 స్థానాల గ్రిడ్ పెనాల్టీ పడింది. దీంతో ఏడో స్థానంలో క్వాలిఫై అయిన అతడు 17వ స్థానం నుంచి రేసును ప్రారంభించనున్నాడు. ఈ కారణంగా లెక్లెర్ 10వ స్థానానికి, హామిల్టన్ 11వ స్థానానికి చేరనున్నారు. అయినప్పటికీ రేసులో మెరుగైన ఫలితం సాధించడం కష్టమేనని ఇద్దరూ భావిస్తున్నారు.

