కలం, వెబ్ డెస్క్ : లివర్పూల్ ఫుట్బాల్ క్లబ్ (Liverpool FC) లెజెండ్ మొహమ్మద్ సలా (Mohamed Salah) ఈ సీజన్ ముగిశాక క్లబ్ను వీడుతున్నట్లు ప్రకటించి అభిమానులను ఒక్కసారిగా షాక్కు గురిచేశారు. ఈ క్రమంలో ఆయన తొమ్మిదేళ్ల కఠోర శ్రమను కొనియాడుతూ, ఆ జట్టు మాజీ బాస్ జుర్గెన్ క్లోప్ పంపిన ఒక వీడియో మెసేజ్ ఇప్పుడు అందరినీ ఆకట్టుకుంటోంది. సలా క్లబ్ను వీడుతున్న సమయంలో ఆయన ముఖంలో చిరునవ్వు ఉండాలని, ఎంతో మంది ప్రేమను ఆయన వెంట తీసుకెళ్తున్నారని క్లోప్ పేర్కొన్నారు. భవిష్యత్తులో ఎప్పుడు కలిసినా, తామిద్దరం కలిసి గడిపిన అద్భుతమైన క్షణాలను గుర్తుచేసుకోవాలని ఆశిస్తున్నట్లు క్లోప్ తెలిపారు. ఇదే వీడియోలో మాజీ ఆటగాడు జోర్డాన్ హెండర్సన్ మాట్లాడుతూ.. సలా ఆత్మవిశ్వాసం పెరుగుతున్న కొద్దీ జట్టులో అందరూ బాధ్యత తీసుకునేలా కొత్త సంస్కృతి మొదలైందని మెచ్చుకున్నారు.
ఈ ప్రశంసలపై స్పందిస్తూ.. జట్టులో గెలుపు సంస్కృతిని మార్చడమే తనకు అత్యంత గర్వకారణమని సలా (Mohamed Salah) అన్నారు. తాను వెళ్ళిన తర్వాత కూడా జట్టు విజయాలు సాధించాలంటే, అక్కడ ఒక ఆదర్శవంతమైన వాతావరణం ఉండాలని తాను సిబ్బందికి చెప్పినట్లు ఆయన వివరించారు. మరోవైపు, రాబోయే ఫిఫా వరల్డ్ కప్లో తన మాజీ ఆటగాళ్లంతా విజయం సాధించాలని కోరుకుంటున్నట్లు క్లోప్ తెలిపారు. వర్జిల్ వాన్ డిజ్క్, సలా, మానే, మాక్ అలిస్టర్ వంటి ఆటగాళ్లు మెడలో పతకాలతో తిరిగి రావాలని ఆశిస్తున్నట్లు చెప్పారు. ముఖ్యంగా గత సీజన్లో కష్టపడిన ఫ్లోరియన్ విర్ట్జ్ ఆటపై తాను ప్రత్యేక దృష్టి సారిస్తానని క్లోప్ పేర్కొన్నారు.
Read Also: తెలంగాణ టెంపుల్ టూరిజం : మన గుడులు.. మన సంస్కృతి
Follow Us On: Instagram
