కలం, స్పోర్ట్స్: భారత పిస్టల్ షూటింగ్ దిగ్గజం, తన గురువు జస్పాల్ రాణా (Coach Jaspal Rana) అకాల మరణంపై స్టార్ షూటర్ మను భాకర్ (Manu Bhaker) తీవ్ర భావోద్వేగానికి లోనయ్యారు. రాణా సార్ మరణం తన జీవితంలో ఎప్పటికీ తీరని లోటు అని ఆమె ఆవేదన వ్యక్తం చేశారు. 49 ఏళ్ల వయసులో గుండె సంబంధిత సమస్యలతో శనివారం ఆయన కన్నుమూయడం తనను ఎంతగానో కలచివేసిందని చెప్పారు. జస్పాల్ రాణాతో తనకు ఉన్న అనుబంధాన్ని మను భాకర్ గుర్తుచేసుకున్నారు. 15 ఏళ్లకు పైగా అద్భుతమైన కెరీర్ ఉన్న రాణా సార్, 2006 ఆసియా క్రీడల్లో మూడు బంగారు పతకాలు సాధించడమే కాకుండా ప్రపంచ రికార్డును సమం చేశారని పేర్కొన్నారు. అలాంటి గొప్ప ఆటగాడు తనకు కోచ్గా మారడం తన అదృష్టమని భావించారు.
ముఖ్యంగా 2024 పారిస్ ఒలింపిక్స్లో తాను సాధించిన చారిత్రాత్మక రెండు కాంస్య పతకాల వెనుక రాణా సార్ మార్గదర్శకత్వం ఎంతో ఉందని మను భాకర్ కృతజ్ఞతతో గుర్తుచేసుకున్నారు. ప్రస్తుతం ఆయన భారత పిస్టల్ జట్టుకు హై-పెర్ఫార్మెన్స్ కోచ్గా సేవలు అందిస్తూ దేశానికి ఎంతో మందిని అందిస్తున్నారని చెప్పారు. గురువు మరణవార్త విన్న వెంటనే మను భాకర్ (Manu Bhaker) సాషల్ మీడియాలో స్పందించారు. ఆయనతో దిగిన మూడు ఫోటోలను పంచుకుంటూ, హిందీలో “అపూర్ణీయ క్షతి” (తీరని లోటు) అని కేవలం రెండు ముక్కల్లో తన బాధను వ్యక్తపరిచారు.
ప్రస్తుతం డెహ్రాడూన్లో జాతీయ శిక్షణా శిబిరంలో ఉన్న మను భాకర్, జస్పాల్ రాణా భౌతికకాయాన్ని అక్కడికి తీసుకువచ్చినప్పుడు స్వయంగా హాజరయ్యారు. శుక్రవారం సాయంత్రం రాణా తండ్రి ఎన్.ఎస్. రాణా పక్కనే కూర్చుని, ఆయన కుటుంబ సభ్యులను ఓదారుస్తూ వారి దుఃఖంలో భాగమయ్యారు.
Read Also: వైభవ్ అరంగేట్రానికి అడ్డంకి.. ఐర్లాండ్తో బీసీసీఐ చర్చలు!
Follow Us On: X(Twitter)
