కలం, స్పోర్ట్స్ : తండ్రి మరణం.. వరుస వైఫల్యాలు.. నాలుగు ప్రపంచ ఛాంపియన్‌షిప్‌ల నిరీక్షణ.. ఇన్ని అడ్డంకులను దాటి చరిత్ర సృష్టించింది భారత రెజ్లర్ మణీషా భన్వాలా (Manisha Bhanwala). కజకిస్థాన్‌లోని అస్తానాలో జరిగిన ప్రపంచ రెజ్లింగ్ ఛాంపియన్షిప్(World Wrestling Championship)లో మహిళల 59 కేజీల విభాగంలో స్వర్ణం గెలిచింది. ఫైనల్లో అమెరికాకు చెందిన అబిగైల్ ఎలిజబెత్ నెట్టేపై 8-6తో విజయం సాధించింది. తొలి అర్ధభాగం ముగిసేసరికి 1-5తో వెనుకబడిన మణీషా.. చివరి మూడు నిమిషాల్లో ఏడు పాయింట్లు సాధించి మ్యాచ్‌ను మలుపు తిప్పింది. తద్వారా ప్రపంచ ఛాంపియన్‌షిప్‌లో స్వర్ణం గెలిచిన తొలి భారత మహిళా రెజ్లర్‌గా నిలిచింది.
మణీషా రెజ్లింగ్ ప్రయాణం 2013లో మొదలైంది. ఫిట్‌నెస్ కోసం తండ్రి సురేశ్ ఆమెను శిక్షణకు పంపించారు. అలా మొదలైన ప్రయాణం.. క్రమంగా అంతర్జాతీయ స్థాయికి చేరింది. రోహ్‌తక్‌లోని ఛోటూరామ్ స్టేడియంలో కోచ్ సందీప్ సైనీ పర్యవేక్షణలో ఆమె శిక్షణ కొనసాగింది.
కష్టాలను దాటుకుని.. నాలుగో ప్రయత్నంలో!
2022లో ఆసియా ఛాంపియన్షిప్ కోసం మంగోలియాకు బయలుదేరిన సమయంలో తండ్రి మరణవార్త మణీషాను తీవ్రంగా కుంగదీసింది. అయినా పోటీ నుంచి తప్పుకోకుండా ముందుకు సాగింది. తండ్రి తనకు నేర్పిన పట్టుదలను గుర్తుచేసుకుంటూ బరిలో నిలిచింది. ఆ తర్వాత గాయాలు, పరాజయాలు ఎదురైనా వెనక్కి తగ్గలేదు. 2023 నుంచి వరుసగా ప్రపంచ ఛాంపియన్‌షిప్‌లలో పాల్గొన్నా.. గత మూడు ప్రయత్నాల్లో పతకం సాధించలేకపోయింది.
బరువు విభాగాల్లోనూ మణీషా మార్పులు చేసుకుంది. 2025 ఆసియా ఛాంపియన్‌షిప్‌లో 62 కేజీల విభాగంలో స్వర్ణం సాధించింది. 2026 ఆసియా క్రీడల్లో 57 కేజీల విభాగంలో పోటీపడి క్వార్టర్ ఫైనల్లోనే నిష్క్రమించింది. ఇప్పుడు ప్రపంచ ఛాంపియన్‌షిప్‌లో 59 కేజీల విభాగంలో బరిలోకి దిగి తన లక్ష్యాన్ని చేరుకుంది.
అద్భుత ప్రదర్శన.. చారిత్రక స్వర్ణం!
అస్తానాలో ప్రీ క్వార్టర్స్‌లో కెనడా రెజ్లర్ లారెన్స్ బోర్గార్డ్‌పై 6-2తో గెలిచింది. క్వార్టర్ ఫైనల్లో మంగోలియా రెజ్లర్ బొలొర్తుయా ఖురెల్ఖూపై 6-0తో విజయం సాధించింది. సెమీఫైనల్లో షగయేవాను ఫాల్ ద్వారా ఓడించి ఫైనల్‌కు చేరింది. అక్కడ నాలుగు పాయింట్ల వెనుకబాటు నుంచి అద్భుతంగా పుంజుకుని స్వర్ణం కైవసం చేసుకుంది. ఇప్పటికే నీలం సిరోహి, కాజల్ ధోచక్ రజత పతకాలు సాధించగా.. మణీషా (Manisha Bhanwala) స్వర్ణంతో భారత్‌కు ఈ ఛాంపియన్‌షిప్‌లో మరో మైలురాయిని అందించింది. తనను రెజ్లింగ్‌లోకి తీసుకొచ్చిన తండ్రి ఇప్పుడు పక్కన లేకపోయినా.. ఆయన కలను ప్రపంచ వేదికపై నిజం చేసింది.
Also Read : నీరజ్ చోప్రా కంబ్యాక్.. ప్రాక్టీస్‌కు గ్రీన్ సిగ్నల్!
Follow Us On: X(Twitter)
