కలం, వెబ్ డెస్క్ : రాజన్న సిరిసిల్ల జిల్లా తంగళ్లపల్లి (Thangallapalli) మండలంలో ఓ ప్రేమ వ్యవహారం కలకలం రేపింది. ఏడేళ్లుగా ఓ యువతి, యువకుడు ప్రేమించుకుంటున్నారు. అయితే యువతి కుటుంబ సభ్యులు బలవంతంగా వేరే వ్యక్తితో ఆమెకు వివాహం నిశ్చయించారు. ఈ విషయం తెలుసుకున్న ప్రియుడు తీవ్ర ఆవేదనకు గురై ఒక వినూత్న నిరసనకు తెరలేపాడు.
కేవలం కట్నం, బంగారం కోసమే సదరు వరుడు ఈ పెళ్లికి ఒప్పుకున్నాడని ఆరోపిస్తూ.. ప్రియుడు తన ప్రేమ తాలూకు ఫొటోలను, అలాగే పెళ్లి కొడుకు వివరాలను వాల్ పోస్టర్లుగా ముద్రించాడు. అర్ధరాత్రి వేళ వరుడి గ్రామమంతటా ఆ పోస్టర్లను అంటించడంతో ఉదయాన్నే స్థానికులు చూసి షాక్కు గురయ్యారు. ప్రస్తుతం ఈ వాల్ పోస్టర్ల వ్యవహారం స్థానికంగా తీవ్ర సంచలనంగా మారడమే కాకుండా, సోషల్ మీడియాలోనూ తెగ వైరల్ అవుతోంది.
