కలం, స్పోర్ట్స్ : అర్జెంటీనా జెర్సీలో (Argentina Jersey) లియోనెల్ మెస్సీకి (Lionel Messi) ఇదే చివరి స్వదేశీ మ్యాచ్. రేపు బెనిన్‌తో జరిగే ప్రత్యేక మ్యాచ్‌కు ముందు మెస్సీ జట్టు శిబిరంలో చేరాడు. ఆదివారం ఎజైజా ట్రైనింగ్ బేస్‌కు వచ్చిన మెస్సీ.. తొలి ప్రాక్టీస్ సెషన్‌లో పాల్గొన్నాడు. ఆ తర్వాత జట్టు ఆటగాళ్లంతా కలిసి సంప్రదాయ అసాడో కార్యక్రమంలో పాల్గొన్నారు. రేపు బ్యూనస్ ఎయిర్స్‌లోని ఎస్టాడియో మోనుమెంటల్‌లో అర్జెంటీనా, బెనిన్‌తో తలపడనుంది. ఈ ప్రత్యేక మ్యాచ్‌ను చూసేందుకు సుమారు 85 వేల మంది అభిమానులు వచ్చే అవకాశం ఉంది. బొలీవియాపై 4-0, బుర్కినా ఫాసోపై 7-0 విజయాలతో అర్జెంటీనా మంచి ఫామ్‌లో ఉంది.
మెస్సీ 207 మ్యాచ్‌ల్లో అర్జెంటీనా తరఫున 125 గోల్స్ చేశాడు. అతడి కెరీర్‌లో 2022 ప్రపంచకప్‌తో పాటు రెండు కోపా అమెరికా టైటిళ్లు ఉన్నాయి. మెస్సీకి ఘనమైన వీడ్కోలు ఇవ్వాలనే ఉద్దేశంతో ఈ ప్రత్యేక మ్యాచ్‌ను ఏర్పాటు చేసినట్లు అర్జెంటీనా ఫుట్‌బాల్ సంఘం అధ్యక్షుడు క్లాడియో టాపియా తెలిపారు. అర్జెంటీనా కెప్టెన్‌కు తగిన వీడ్కోలు ఇవ్వాలనేది సంఘం ఉద్దేశమని ఆయన చెప్పారు. మెస్సీతో కలిసి అతడి సుదీర్ఘకాల సహచరులు జియోవాని లో సెల్సో, రోడ్రిగో డి పాల్, నికోలస్ ఒటమెండీ కూడా బరిలోకి దిగనున్నారు.
లియాండ్రో పరేడెస్ మాత్రం 10 మ్యాచ్‌ల ఫిఫా నిషేధంలో ఉన్నప్పటికీ స్టాండ్స్ నుంచి ఈ వేడుకకు హాజరుకానున్నాడు. అయితే 2022 ప్రపంచకప్ విజేతలు పౌలో డిబాలా, నహుయెల్ మోలినా మాత్రం ఈ మ్యాచ్‌కు దూరం కానున్నారు. వారి క్లబ్ ఏఎస్ రోమా ప్రయాణానికి అనుమతి ఇవ్వలేదు. రేపటి మ్యాచ్‌తో అర్జెంటీనా జట్టుతో మెస్సీ అధ్యాయం ముగియనుంది. ఆ తర్వాత అతడు ఇంటర్ మయామి క్లబ్ ఫుట్‌బాల్‌పై దృష్టి పెట్టనున్నాడు.
