కలం, వెబ్ డెస్క్: ఐపీఎల్ 2026 సీజన్ను రాయల్ ఛాలెంజర్స్ బెంగళూరు (RCB) ఘనంగా ప్రారంభించింది. సన్రైజర్స్ హైదరాబాద్(SRH) పై ఆరు వికెట్ల తేడాతో విజయం సాధించి పాత ఫామ్ను కొనసాగిస్తోంది. ఈ నేపథ్యంలో జట్టులో నెలకొన్న సానుకూల మార్పుల గురించి ఆల్రౌండర్ కృనాల్ పాండ్యా (Krunal Pandya) ఆసక్తికర విషయాలను పంచుకున్నారు. 2025లో తొలిసారి ఐపీఎల్ (IPL) ట్రోఫీని గెలుచుకోవడం వల్ల జట్టులో స్థిరత్వం, ఆటగాళ్లలో ఆత్మవిశ్వాసం పెరిగాయని ఆయన అభిప్రాయపడ్డారు.
ఆర్సీబీ పాడ్కాస్ట్లో మాట్లాడిన కృనాల్, జట్టులో ప్రస్తుతం చాలా ప్రశాంతమైన వాతావరణం ఉందని తెలిపారు. గత ఏడాది కొత్త జట్టుగా ఒకరినొకరు అర్థం చేసుకోవడానికి సమయం పట్టిందని, కానీ ఇప్పుడు ప్రతి ఆటగాడికి తన బాధ్యతపై స్పష్టత ఉందని చెప్పారు. ఇంతటి పెద్ద ఫ్రాంచైజీని రజత్ పాటిదార్ అద్భుతంగా నడిపిస్తున్నారని, గత సీజన్లో ఆయన నాయకత్వం ఎంతో ప్రత్యేకమని కృనాల్ కొనియాడారు.
మైదానంలో వికెట్ కీపర్ జితేష్ శర్మతో తనకు ఉన్న అవగాహన ప్రణాళికలను అమలు చేయడంలో ఎంతో సహాయపడుతుందని కృనాల్ పేర్కొన్నారు. జితేష్ కీపింగ్పై తనకు పూర్తి నమ్మకం ఉందని ఆయన చెప్పారు. ఇక పెద్ద మ్యాచ్లలో ఒత్తిడిని ఎదుర్కోవడంపై స్పందిస్తూ.. ఆ సందర్భాలు తన కోసమే సృష్టించబడ్డాయని భావిస్తానని, ప్రశాంతంగా ఉంటూ నైపుణ్యాలను నమ్ముకోవడమే తన విజయరహస్యమని వెల్లడించారు. 2025 ఫైనల్లో 2/17 గణాంకాలతో ‘ప్లేయర్ ఆఫ్ ది మ్యాచ్’గా నిలిచిన విషయాన్ని ఈ సందర్భంగా గుర్తు చేసుకున్నారు.
జట్టు సీనియర్ ప్లేయర్ విరాట్ కోహ్లీ గురించి మాట్లాడుతూ.. ఆయనలోని గెలుపు కసి, అభిలాష ఎంతో గొప్పవని కృనాల్ ప్రశంసించారు. కోహ్లీ ఏ తరంలో జన్మించినా గొప్ప ఆటగాడిగా ఉండేవారని, ఆయన ఎవరితోనూ పోటీ పడరని పేర్కొన్నారు. ఇదే సమయంలో, తిరిగి భారత జాతీయ జట్టులోకి రావడమే తన ప్రధాన లక్ష్యమని కృనాల్ స్పష్టం చేశారు. ప్రస్తుతం ఆర్సీబీ ఆటగాళ్ల మధ్య ఉన్న సమన్వయం, స్పష్టమైన ప్రణాళికలు ఆ జట్టును మరోసారి ఫేవరెట్గా నిలబెడుతున్నాయి. రాబోయే మ్యాచ్ల్లోనూ ఇదే జోరును కొనసాగించాలని అభిమానులు కోరుకుంటున్నారు.
