కలం, వెబ్డెస్క్: కోల్కతా (Kolkata)లో విలువిద్యకు కొత్త ఊపు వచ్చింది. ప్రపంచ స్థాయి సదుపాయాలతో ఆర్చరీ అకాడమీ (Archery Academy) నిర్మాణానికి శ్రీకారం చుట్టారు. శనివారం కోల్కతాలోని ఘోల్షాపూర్ రైల్వే కాలనీలో ఈస్టర్న్ రైల్వే జనరల్ మేనేజర్ మిలింద్ దేవుస్కర్ అకాడమీకి శంకుస్థాపన చేశారు. ఈ కార్యక్రమంలో ఈస్టర్న్ రైల్వే స్పోర్ట్స్ అసోసియేషన్ అధ్యక్షుడు దేవేందర్ కుమార్తో పాటు పలువురు సీనియర్ అధికారులు, కోచ్లు, క్రీడాకారులు పాల్గొన్నారు. శంకుస్థాపన అనంతరం అకాడమీ పేరుతో ఉన్న ఫలకాన్ని ఆవిష్కరించారు.
సంప్రదాయబద్ధంగా కొబ్బరికాయ కొట్టి కార్యక్రమాన్ని ప్రారంభించారు. అనంతరం మిలింద్ దేవుస్కర్ తొలి బాణాన్ని సంధించి అకాడమీ ప్రారంభాన్ని లాంఛనంగా ప్రారంభించారు. ఘోల్షాపూర్లో ఇప్పటికే స్టేడియం, స్పోర్ట్స్ కాంప్లెక్స్, ఒలింపిక్ ప్రమాణాల స్విమ్మింగ్ పూల్ ఉన్నాయి. ఇప్పుడు ఆర్చరీ అకాడమీ కూడా చేరడంతో అక్కడి క్రీడా సదుపాయాలు మరింత బలోపేతం కానున్నాయి.
ఈస్టర్న్ రైల్వేలో పనిచేసిన అర్జున అవార్డు గ్రహీత డోలా బెనర్జీ, పద్మశ్రీ బొంబాయ్లా దేవి, రాహుల్ బెనర్జీ వంటి ప్రముఖ విలువిద్య క్రీడాకారులు ఈ సంస్థకు చెందినవారే. వారి వారసత్వాన్ని కొనసాగించే లక్ష్యంతో ఈ అకాడమీని ఏర్పాటు చేస్తున్నారు. రైల్వే ఉద్యోగులు, వారి కుటుంబ సభ్యులు, యువ క్రీడాకారులకు ఇక్కడ నాణ్యమైన శిక్షణ అందించనున్నారు. ఆధునిక మౌలిక వసతులు, శాస్త్రీయ కోచింగ్, నిపుణుల మార్గదర్శకంతో జిల్లా నుంచి అంతర్జాతీయ స్థాయి వరకు పోటీ పడేలా తీర్చిదిద్దాలని లక్ష్యంగా పెట్టుకున్నారు.
ఈ సందర్భంగా మిలింద్ దేవుస్కర్ మాట్లాడుతూ, చిన్న వయసులోనే ప్రతిభను గుర్తించి ప్రోత్సహించడమే అకాడమీ ప్రధాన ఉద్దేశమని తెలిపారు. విలువిద్య ఏకాగ్రత, క్రమశిక్షణ, సహనం, ఆత్మవిశ్వాసాన్ని పెంచుతుందని చెప్పారు. శారీరక, మానసిక ఆరోగ్యానికీ ఈ క్రీడ ఎంతో ఉపయోగపడుతుందని వివరించారు. అర్జున అవార్డు గ్రహీత మంగళ్ సింగ్ చంపియా, ద్రోణాచార్య, అర్జున అవార్డు గ్రహీత అలీ కమర్ కూడా ఈ కార్యక్రమంలో పాల్గొన్నారు.
ఈస్టర్న్ రైల్వే సీపీఆర్వో శిబ్రామ్ మాఝీ మాట్లాడుతూ, యువతలో క్రీడలను ప్రోత్సహించే ప్రయత్నాల్లో ఇది మరో కీలక అడుగని తెలిపారు. ఆధునిక సదుపాయాలు, నిపుణుల శిక్షణతో యువ విలువిద్య క్రీడాకారులు తమ ప్రతిభను చాటుకునే వేదికగా ఈ అకాడమీ నిలుస్తుందని పేర్కొన్నారు.
