కలం, స్పోర్ట్స్ : ఇంగ్లండ్ క్రికెట్ జట్టుతో తనకున్న అనుబంధంపై మాజీ బ్యాటర్ కేవిన్ పీటర్సన్ (Kevin Pietersen) సోషల్ మీడియా వేదికగా స్పష్టత ఇచ్చారు. తాను జట్టుకు కేవలం కన్సల్టెంట్‌గా మాత్రమే బాధ్యతలు నిర్వహిస్తున్నానని, పూర్తిస్థాయి ఉద్యోగిని కానని ఆయన వెల్లడించారు. ఇటీవల పాకిస్థాన్‌లో జరిగిన ముక్కోణపు సిరీస్‌లో ఇంగ్లండ్ ఫైనల్‌కు చేరకపోవడంతో ఆయన పాత్రపై ప్రశ్నలు తలెత్తాయి. దీనిపై స్పందించిన పీటర్సన్, రాబోయే 12 నెలల్లో ఇంగ్లండ్ ఆడే ప్రతి మ్యాచ్‌కూ తాను అందుబాటులో ఉండలేనని చెప్పారు. వచ్చే సోమవారం జట్టుతో కలిసి ఆస్ట్రేలియా పర్యటనకు వెళ్తున్నట్లు తెలిపారు.
2027 వన్డే ప్రపంచకప్ ముగిసే వరకు ఆయన ఇంగ్లండ్ జట్టుతో సుమారు 150 రోజుల పాటు పనిచేసేందుకు ఒప్పందం కుదుర్చుకున్నారు. ఆస్ట్రేలియా సిరీస్‌తో పాటు దక్షిణ ఆఫ్రికా పర్యటనకు, అలాగే పాకిస్థాన్, న్యూజిలాండ్‌లతో జరిగే మ్యాచ్‌లకు కూడా ఆయన అందుబాటులో ఉంటారు. అంతకుముందు ఐపీఎల్ 2025లో ఢిల్లీ క్యాపిటల్స్ మెంటార్‌గా పనిచేసిన పీటర్సన్ (Kevin Pietersen), వ్యాఖ్యాతగా కూడా సుపరిచితులు. ఇంగ్లండ్ తరఫున అన్ని ఫార్మాట్లలో అద్భుతమైన రికార్డు ఉన్న పీటర్సన్ సేవలు జట్టు అభివృద్ధికి ఎంతగానో దోహదపడనున్నాయి.
