కలం, వెబ్ డెస్క్ : ఇటాలియన్ ఓపెన్ (Italian Open ) సెమీఫైనల్లో జానిక్ సిన్నర్ దూకుడుకు వర్షం బ్రేక్ వేసింది. డానిల్ మెద్వెదెవ్తో జరుగుతున్న ఉత్కంఠభరిత పోరు మధ్యలోనే ఆగిపోవడంతో అభిమానులు నిరాశకు గురయ్యారు. మ్యాచ్ నిలిచే సమయానికి సిన్నర్ గెలుపు దిశగా కనిపించాడు. రోమ్లో జరిగిన ఈ మ్యాచ్లో ప్రపంచ నంబర్ వన్ సిన్నర్ మొదటి నుంచే అటాకింగ్ గేమ్ ఆడాడు. వరుసగా తొలి నాలుగు గేమ్స్ గెలిచి మెద్వెదెవ్ను ఒత్తిడిలోకి నెట్టాడు. కేవలం 33 నిమిషాల్లోనే తొలి సెట్ను 6-2తో తన ఖాతాలో వేసుకున్నాడు.
అయితే రెండో సెట్లో మెద్వెదెవ్ గట్టిగా కంబ్యాక్ ఇచ్చాడు. ఆరంభంలోనే మూడు గేమ్స్ గెలిచి మ్యాచ్ను మళ్లీ పోటీపోటీగా మార్చాడు. ఇదే సమయంలో సిన్నర్ అలసటతో ఇబ్బంది పడుతున్నట్లు కనిపించింది. పాయింట్ల మధ్య రాకెట్పై ఆనుకుని ఊపిరి పీల్చుకుంటూ కనిపించాడు. రెండో సెట్ను 5-7తో కోల్పోయిన సిన్నర్.. నిర్ణాయక మూడో సెట్లో మళ్లీ తన రిథమ్ అందుకున్నాడు. మెద్వెదెవ్ వరుస తప్పిదాలు చేయడంతో 4-2 ఆధిక్యంలోకి వెళ్లాడు. అదే సమయంలో భారీ వర్షం కురవడంతో మ్యాచ్ను నిలిపివేశారు.
కొంతసేపు పరిస్థితిని గమనించిన నిర్వాహకులు.. మ్యాచ్ను శనివారం తిరిగి ప్రారంభించాలని నిర్ణయించారు. దీంతో సెమీఫైనల్ ఫలితం మరింత ఆసక్తికరంగా మారింది. ఈ టోర్నీలో వరుసగా 33వ విజయం కోసం సిన్నర్ పోరాడుతున్నాడు. మరోవైపు కాస్పర్ రూడ్ ఇప్పటికే ఫైనల్ చేరి ప్రత్యర్థి కోసం ఎదురుచూస్తున్నాడు. ఇప్పుడు అందరి చూపు సిన్నర్-మెద్వెదెవ్ మ్యాచ్పైనే ఉంది.
