కలం, స్పోర్ట్స్: భారత క్రికెట్ సంచలనం, 15 ఏళ్ల వైభవ్ సూర్యవంశీ ప్రతిభపై ఇంగ్లాండ్ యువ బ్యాటర్ జాకబ్ బెథెల్ (Jacob Bethell) ఆసక్తికర వ్యాఖ్యలు చేశారు. శనివారం జరిగిన రెండో టీ20 మ్యాచ్లో సూర్యవంశీ టీమిండియా తరపున అరంగేట్రం చేసి, సచిన్ టెండూల్కర్ రికార్డును అధిగమించిన సంగతి తెలిసిందే. ఈ మ్యాచ్ ముగిసిన తర్వాత ఇంగ్లాండ్ జట్టులోని 22 ఏళ్ల యువ ఆటగాడైన బెథెల్, భారత యువ ప్లేయర్ గురించి తన అభిప్రాయాలను పంచుకున్నారు. తనకంటే ఏడేళ్లు చిన్నవాడైన ఒక ఆటగాడికి వ్యతిరేకంగా అంతర్జాతీయ మ్యాచ్ ఆడటం తనకు చాలా వింతగా అనిపించిందని బెథెల్ పేర్కొన్నారు.
తాను సూర్యవంశీ బ్యాటింగ్ను ఇదివరకు భారతదేశంలో చూశానని, ఈ రోజు మ్యాచ్లో కూడా గమనించానని చెప్పారు. అతని బ్యాట్ స్వింగ్, షాట్లు ఆడే విధానం ఎంతో స్వచ్ఛంగా ఉన్నాయని, అతను నిజంగా నమ్మశక్యం కాని గొప్ప ప్రతిభావంతుడని (అన్బిలీవబుల్ టాలెంట్) బెథెల్ ప్రశంసించారు. అలాగే ఈ మ్యాచ్లో అజేయంగా 76 పరుగులు చేసి ఇంగ్లాండ్ విజయానికి కారణమైన బెథెల్, తన ఇన్నింగ్స్ గురించి కూడా మాట్లాడారు.
ఒక బ్యాటర్గా మ్యాచ్ గెలిపించి, నాటౌట్గా నిలిచి, సహచర ఆటగాళ్లతో కరచాలనం చేస్తూ మైదానం వీడటం కంటే మధురమైన అనుభూతి మరొకటి ఉండదని ఆయన అన్నారు. తన కెరీర్లో ఇప్పటివరకు కొన్ని సెంచరీలు చేసినప్పటికీ, అందులో ఒక్కటి మాత్రమే జట్టు విజయానికి ఉపయోగపడిందని గుర్తు చేసుకున్నారు. గతంలో ఆస్ట్రేలియా, ఇండియా సిరీస్లలో ఓడిపోయినప్పుడు, జట్టు విజయం కోసం తాను ఇంకా ఏమి చేసి ఉండాల్సింది అని ఆలోచించేవాడినని చెప్పారు.
