కలం, వెబ్ డెస్క్ : అమెరికా, ఇజ్రాయెల్, ఇరాన్ యుద్ధం రోజురోజుకు ఉద్రిక్తం అవుతోంది. యుద్ధం మొదలైన రెండు మూడు రోజుల్లోనే ఇరాన్ సుప్రీం లీడర్ అయతొల్లా అలి ఖమేనీ (Ali Khamenei) ని శత్రుదేశాలు హత్య చేశాయి. దీంతో ఇరాన్లో పరిస్థితులు వేడెక్కాయి. ఈ నేపథ్యంలో తమ దేశ నూతన సుప్రీం లీడర్గా ఇరాన్.. అయతొల్లా మొజ్తాబా ఖమేనీ (Mojtaba Khamenei)ని ఎన్నుకున్నారు. ఆయనకు అత్యంత రక్షణ కల్పించాలని ఆ దేశ ప్రభుత్వం నిర్ణయించుకుంది. ఇందులో భాగంగానే ఎలైట్ కౌంటర్ టెర్రరిజం స్క్వాడ్ను రంగంలోకి దించింది. అత్యంత శక్తివంతమైన ‘నోపో’ (NOPO) దళం రంగంలోకి దిగింది.
అమెరికా-ఇజ్రాయెల్ జరిపిన ‘ఆపరేషన్ ఎపిక్ ఫ్యూరీ’ దాడిలో తండ్రి అలీ ఖమేనీ మరణించిన తర్వాత, మొజ్తబాను సురక్షితంగా ఉంచేందుకు ఇరాన్ ఈ నిర్ణయం తీసుకుంది. ఫిబ్రవరి 28 నాటి దాడుల్లో ఆయన గాయపడ్డారని వార్తలు వచ్చాయి. కాగా మొజ్తబా క్షేమంగా ఉన్నారని ఇరాన్ సీనియర్ నేతలు స్పష్టం చేశారు. మార్చి 8న ఆయనను సుప్రీం లీడర్గా ఎన్నుకున్నప్పటికీ, మొజ్తబా ఇప్పటివరకు బహిరంగంగా కనిపించలేదు.
ఈ క్రమంలోనే ‘నోపో'(NOPO) ఎలైట్ కౌంటర్ టెర్రరిజం యూనిట్ను ఆయన రక్షణకు కేటాయించారు. 1991లో ఏర్పాటైన ఈ యూనిట్, ఇరాన్ పోలీసింగ్లోనే అత్యంత కఠినమైన, శక్తివంతమైన విభాగంగా పేరుగాంచింది. కేవలం ఆరు బ్రిగేడ్లతో కూడిన ఈ దళం, గతంలో అలీ ఖమేనీకి కూడా రక్షణ కవచంలా పనిచేసింది. సుప్రీం లీడర్ భద్రతతో పాటు జైళ్ల వద్ద కూడా ఈ దళాన్ని భారీగా మోహరించారు. రివల్యూషనరీ గార్డ్స్ మద్దతుతో అధికారంలోకి వచ్చిన మొజ్తబా ఖమేనీ నాయకత్వంలో ఇరాన్ భవిష్యత్తు ఎలా ఉండబోతుందనేది ఇప్పుడు ప్రపంచవ్యాప్తంగా ఆసక్తికరంగా మారింది.
