కలం, వెబ్ డెస్క్ : దేశవ్యాప్తంగా రాజకీయ వర్గాల్లో ఆసక్తి రేపుతున్న ఉప ఎన్నికల పోలింగ్ (India Byelections) ప్రక్రియ ప్రశాంతంగా ముగిసింది. పలు రాష్ట్రాల్లో ఖాళీ అయిన లోక్‌సభ, అసెంబ్లీ స్థానాలకు మంగళవారం బై ఎలక్షన్ జరిగాయి. అస్సాంలోని నాగావ్ పార్లమెంట్ స్థానంతో పాటు, పశ్చిమ బెంగాల్, తమిళనాడు, పుదుచ్చేరిలలోని మొత్తం ఐదు అసెంబ్లీ నియోజకవర్గాల్లో జరిగిన పోలింగ్ లో ఓటర్లు తమ ఓటు హక్కును వినియోగించుకున్నారు. చెదురుమదురు ఘటనలు మినహా అన్ని ప్రాంతాల్లోనూ ఓటింగ్ ప్రక్రియ సజావుగా సాగినట్లు కేంద్ర ఎన్నికల సంఘం ప్రకటించింది.
పోలింగ్ ప్రక్రియ కొనసాగింది ఇలా..
కాంగ్రెస్ ఎంపీ ప్రద్యుత్ బోర్డోలోయ్ రాజీనామాతో ఖాళీ అయిన నాగావ్ లోక్‌సభ స్థానానికి జరిగిన ఉప ఎన్నికలో భాజపా, కాంగ్రెస్, ఏఐయూడీఎఫ్ మధ్య హోరాహోరీ పోటీ నెలకొంది. అత్యంత ప్రతిష్ఠాత్మకంగా మారిన నందిగ్రామ్, రెజినగర్ అసెంబ్లీ స్థానాల్లో భారీ స్థాయిలో ఓటింగ్ నమోదైంది. ఎస్సీ రిజర్వ్‌డ్ నియోజకవర్గాలైన మధురాంతకం, ధరాపురంలలో ఉదయం నుంచే ఓటర్లు బారులు తీరారు. ఇరు స్థానాల్లోనూ రికార్డు స్థాయిలో భారీగా పోలింగ్ శాతాలు నమోదయ్యాయి. కేంద్రపాలిత ప్రాంతమైన పుదుచ్చేరిలోని తట్టాంచావిడి నియోజకవర్గంలోనూ ఓటర్లు చురుగ్గా ఓటింగ్‌లో పాల్గొన్నారు.
అక్టోబర్ 9న ఫలితాలు..
ఉప ఎన్నికలకు పోలింగ్ (India Byelections) ప్రక్రియ పూర్తికావడంతో ఎన్నికల సిబ్బంది ఈవీఎంలను కట్టుదిట్టమైన భద్రత నడుమ స్ట్రాంగ్ రూమ్‌లకు తరలించారు. ఓట్ల లెక్కింపు అక్టోబర్ 9న జరగనుండగా, అదే రోజు ఫలితాలు వెల్లడి కానున్నాయి. లోక్‌సభతో పాటు మినీ సార్వత్రిక సమరంగా భావిస్తున్న ఈ ఉప ఎన్నికల ఫలితాలపై దేశవ్యాప్తంగా సర్వత్రా ఆసక్తి నెలకొంది.
