కలం, స్పోర్ట్స్ : మహిళల టీ20 వరల్డ్ కప్ (Women T20 World Cup) లో భారత క్రికెట్ జట్టు భవితవ్యం నేడే తేలనుంది. హర్మన్ప్రీత్ కౌర్ నాయకత్వంలోని టీమిండియా సెమీఫైనల్కు చేరుకుంటుందా లేదా ఇంటిబాట పడుతుందా అనేది ఈరోజు బలమైన ఆస్ట్రేలియా జట్టుతో జరిగే మ్యాచ్తో తేలిపోనుంది. అంతకుముందు సౌతాఫ్రికాతో జరిగిన మ్యాచ్లో ఓడిపోవడంతో వన్డే వరల్డ్ కప్ ఛాంపియన్స్ అయిన భారత్కు ఇప్పుడు సెమీస్ దారులు కాస్త కష్టంగా మారాయి. ప్రస్తుతం ఆస్ట్రేలియా జట్టు ఎనిమిది పాయింట్లతో, అలాగే ప్లస్ 4.724 అనే బలమైన నెట్ రన్ రేట్తో దాదాపు సెమీఫైనల్ బెర్తును ఖరారు చేసుకుంది. ఇక మిగిలిన ఒక స్థానం కోసం భారత్, సౌతాఫ్రికా మధ్య పోటీ నెలకొంది. ఈ టోర్నమెంట్లో భారత్ ముందడుగు వేయాలంటే సమీకరణాలు ఇలా ఉన్నాయి.
ఒకవేళ భారత్ గెలిస్తే:
టీమిండియా ముందున్న లక్ష్యం ఒక్కటే.. ఆస్ట్రేలియాను ఓడించడం. ఈ మ్యాచ్లో గెలిస్తే భారత్ ఎనిమిది పాయింట్లకు చేరుకుంటుంది. ప్రస్తుతం భారత్ రన్ రేట్ ప్లస్ 2.268 కాగా, సౌతాఫ్రికా రన్ రేట్ ప్లస్ 0.734 గా ఉంది. ఒకవేళ భారత్ గెలిస్తే రన్ రేట్ ఇంకా మెరుగవుతుంది. ఆ సమయంలో సౌతాఫ్రికా తన తదుపరి మ్యాచ్లో బంగ్లాదేశ్పై గెలిచినప్పటికీ, వారి రన్ రేట్ భారత్ కంటే తక్కువగానే ఉండే అవకాశం ఉంది కాబట్టి ఇండియా సెమీస్కు వెళ్తుంది.
ఒకవేళ భారత్ ఓడిపోతే:
ఒకవేళ భారత్ గనుక ఆస్ట్రేలియా చేతిలో ఓడిపోతే మాత్రం బంగ్లాదేశ్ జట్టుపై ఆధారపడాల్సి వస్తుంది. బంగ్లాదేశ్ జట్టు సౌతాఫ్రికాను ఓడించి పెద్ద సంచలనం సృష్టించాలని భారత్ కోరుకోవాలి. ఒకవేళ అదే జరిగితే, అప్పుడు భారత్, సౌతాఫ్రికా లలో ఏ జట్టుకు ఎక్కువ రన్ రేట్ ఉంటే ఆ జట్టు సెమీస్కు అర్హత సాధిస్తుంది. ఈ కీలక మ్యాచ్ గురించి భారత వైస్ కెప్టెన్ స్మృతి మంధాన శనివారం ప్రెస్ కాన్ఫరెన్స్లో మాట్లాడారు. ఆస్ట్రేలియాతో జరిగే ఈ చావోరేవో మ్యాచ్లో భారత్ దూకుడుగా ఆడుతుందని ఆమె చెప్పారు. ఇదొక పెద్ద మ్యాచ్ అని, జట్టు అంతా అగ్రెసివ్గా ఆడాలని అనుకుంటున్నట్లు వివరించారు.
అయితే ఈ టోర్నమెంట్లో భారత బ్యాటింగ్ విభాగం తమ పూర్తి సామర్థ్యం మేరకు రాణించలేకపోయిందని మంధాన అంగీకరించారు. క్రీజులోకి వెళ్లి మంచి పట్టుదలతో బ్యాటింగ్ చేయాలని మీటింగ్లలో చర్చించుకున్నామని, అనుకున్నంతగా అది జరగకపోయినా బ్యాటర్లందరూ ఈ మ్యాచ్లో రాణించడానికి ఎంతో ఆతృతగా ఉన్నారని తెలిపారు. గడిచిన నాలుగైదేళ్లలో ఆస్ట్రేలియాపై భారత జట్టు ఆటతీరు నిలకడగా మెరుగవుతూ వస్తోందని మంధాన గుర్తుచేశారు.
ఆస్ట్రేలియాలో జరిగిన టీ20 ఫార్మాట్లో తాము బాగా ఆడామని, ఆ నమ్మకంతోనే బరిలోకి దిగుతామన్నారు. అలాగే ఉమెన్స్ ప్రీమియర్ లీగ్ (WPL) వల్ల ఇప్పుడు అమ్మాయిలు ఇలాంటి హై-ప్రెజర్ మ్యాచ్లను మునుపటి కంటే చాలా మెరుగ్గా ఎదుర్కోగలరని స్మృతి మంధాన ధీమా వ్యక్తం చేశారు.
