IMD Alert | బంగాళాఖాతంలో రెండు వాయుగుండాలు ఏర్పడ్డాయి. దీంతో ఏపీకి హైఅలెర్ట్ వచ్చింది. రానున్న 24 గంటల్లో భారీ వర్షాలు కురిసే అవకాశం ఉందని వాతావరణ శాఖ అంచనా వేస్తోంది. ఈ నెల ఆఖరున రాష్ట్రంలోని పలు ప్రాంతాలలో మోస్తరు నుంచి భారీ వర్షాలు కురవొచ్చని హెచ్చరిస్తోంది. ఈ క్రమంలోనే రైతులు, మత్స్యకారులు అప్రమత్తంగా ఉండాలని సూచిస్తోంది. మలక్కా జలసంధి ప్రాంతంలో ఏర్పడిన తీవ్ర అల్పపీడటం వాయుగుండంగా మారింది. అది రానున్న 6 గంటల్లో పశ్చిమ-వాయువ్య దిశగా కదులుతోంది. రానున్న 48 గంటల్లో ఇది బంగాళాఖాతంలో తుపానుగా బలపడే అవకాశం ఉందని వాతావరణ శాఖ పేర్కొంది.
మలక్కా జలసంధి పరిసరాల్లో ఏర్పడిన తీవ్ర అల్పపీడనం వాయుగుండంగా బలపడిన నేపథ్యంలో, మరో వాతావరణ వ్యవస్థ కూడా ప్రభావం చూపిస్తోంది. ఉపరితల ఆవర్తన ప్రభావంతో కొమోరిన్, నైరుతి బంగాళాఖాతం, శ్రీలంక పరిసర ప్రాంతాల్లో మరో అల్పపీడనం ఇప్పటికే రూపుదిద్దుకున్నట్లు వాతావరణ శాఖ వెల్లడించింది. ఈ అల్పపీడనం రాబోయే 24 గంటల్లో మరింత బలపడే అవకాశం ఉందని అధికారులు పేర్కొన్నారు. రెండు వాతావరణ వ్యవస్థల ప్రభావంతో శనివారం నుంచి మంగళవారం వరకు (నవంబర్ 29 – డిసెంబర్ 2) కోస్తాంధ్ర, రాయలసీమలో విస్తారంగా వర్షాలు కురిసే అవకాశం ఉంది. ఈ క్రమంలోనే వాతావరణ శాఖ పలు హెచ్చరికలు(IMD Alert) జారీ చేసింది.
నవంబర్ 27 నుంచి మత్స్యకారులు సముద్రంలో చేపల వేటకు వెళ్లొద్దని విపత్తుల నిర్వహణ శాఖ తెలిపింది. వేటకు వెళ్లిన మత్స్యకారులు కూడా వెంటనే తిరిగి రావాలని సూచించారు అధికారులు. రైతులు కూడా జాగ్రత్తగా ఉండాలని, పొలాల్లో పనిచేసే సమయంలో అప్రమత్తంగా ఉండాలని తెలిపింది.
Read Also: వరల్డ్ టాప్ 100 సిటీస్ లో హైదరాబాద్ కి చోటు
Follow Us on : Pinterest
