అవసరాలకు సరిపోయే ఫ్రిడ్జ్‌ను ఎలా ఎంచుకోవాలో తెలుసా?

కలం, వెబ్ డెస్క్: ఫ్రిడ్జ్ (Refrigerator) ప్రతి ఇంట్లో తప్పకుండా ఉండే ఎలక్ట్రిక్ పరికరం. దీనిని చాలా మంది కంటిని నచ్చిందని, పాకెట్ ఫ్రెండ్లీగా ఉందని, మంచి బ్రాండ్ అనే కొంటుంటారు. కానీ అసలు తమకు కావాల్సిన, తమ అవసరాలకు సరిపోయే ఫ్రిడ్జ్‌ను ఎలా ఎంచుకోవాలో 90శాతం మందికి తెలియదని నిపుణులు అంటున్నారు. గతేడాది ప్రపంచవ్యాప్తంగా దాదాపు 128 బిలియన్ డాలర్ల విలువైన ఫ్రిజ్‌లు అమ్ముడయ్యాయంటే వీటి అవసరం ఎంత ఉందో అర్థం చేసుకోవచ్చు. ప్రస్తుతం స్మార్ట్ టెక్నాలజీ, విద్యుత్ ఆదా చేసే ఫీచర్లతో కొత్త మోడల్స్ అందుబాటులోకి వస్తున్నాయి. అయితే, మీ కుటుంబానికి ఏ సైజు ఫ్రిజ్ సరిపోతుందో తెలుసుకోవడం చాలా ముఖ్యం.

రిఫ్రిజిరేటర్ (Refrigerator) సామర్థ్యాన్ని తయారీదారులు లీటర్లలో కొలుస్తారు. మీ ఇంట్లో ఉండే సభ్యుల సంఖ్యను బట్టి దీని ఎంపిక మారాలి. ఒకరు లేదా ఇద్దరు ఉన్న కుటుంబాలకు 150 నుండి 250 లీటర్ల సామర్థ్యం గల ఫ్రిజ్ సరిపోతుంది. ఇవి తక్కువ విద్యుత్తును వాడుకుంటాయి, తక్కువ స్థలాన్ని ఆక్రమిస్తాయి. ముగ్గురు లేదా నలుగురు సభ్యులు ఉన్న ఇంటికి 250 నుండి 450 లీటర్ల ఫ్రిజ్ అవసరం. ఈ డబుల్ డోర్ మోడల్స్ వల్ల ఫ్రీజర్, ఆహార పదార్థాల నిల్వకు వేర్వేరు సదుపాయాలు ఉంటాయి. ఐదు లేదా ఆరుగురు సభ్యులు ఉంటే 450 నుండి 650 లీటర్ల సామర్థ్యం గల సైడ్-బై-సైడ్ లేదా ఫ్రెంచ్ డోర్ మోడల్స్ బాగుంటాయి. ఏడుగురు అంతకంటే ఎక్కువ మంది ఉన్న ఇళ్లకు 650 లీటర్ల కంటే ఎక్కువ సామర్థ్యం ఉన్న ఫ్రిజ్ అవసరమవుతుంది.

మీరు వారానికి ఒకసారి మాత్రమే కూరగాయలు, కిరాణా సామాన్లు కొనుగోలు చేసేవారైతే ఎక్కువ స్థలం ఉన్న ఫ్రిజ్ ఎంచుకోవాలి. అలా కాకుండా రోజూ తాజా కూరగాయలు కొనేవారు చిన్న ఫ్రిజ్‌తో కూడా సర్దుకోవచ్చు. మాంసాహారం లేదా ఐస్ క్రీమ్ వంటి వాటిని ఎక్కువగా నిల్వ చేసే వారికి పెద్ద ఫ్రీజర్ ఉన్న మోడల్స్ ప్రయోజనకరంగా ఉంటాయి. ఫ్రిజ్ కొనే ముందు అది మీ వంటగదిలో సరిపోతుందో లేదో చూసుకోవాలి. తలుపులు తీయడానికి వీలుగా, గాలి ఆడేలా తగినంత ఖాళీ ఉండాలి. పాత కాలపు ఫ్రిజ్‌ల కంటే కొత్త మోడల్స్ తక్కువ కరెంటును వాడుకుంటాయి. ఇన్వర్టర్ కంప్రెసర్లు, ఏఐ (AI) టెక్నాలజీ వంటి ఫీచర్లు ఉన్న ఫ్రిజ్‌లు విద్యుత్ బిల్లును తగ్గించడంలో సహాయపడతాయి.

ఇప్పుడు వస్తున్న స్మార్ట్ రిఫ్రిజిరేటర్లలో లోపల ఉన్న ఆహారం పాడవకుండా గుర్తు చేసే రిమైండర్లు, స్మార్ట్‌ఫోన్ కనెక్టివిటీ, వాయిస్ అసిస్టెంట్ వంటి సౌకర్యాలు ఉంటున్నాయి. 2025 నాటికి ఈ స్మార్ట్ ఫ్రిజ్ మార్కెట్ భారీగా పెరగడం విశేషం. సరైన పరిమాణం ఉన్న రిఫ్రిజిరేటర్ ఆహారాన్ని సురక్షితంగా ఉంచడమే కాకుండా, విద్యుత్ ఆదా చేయడం ద్వారా ఆర్థికంగా కూడా మీకు మేలు చేస్తుంది. మీ కుటుంబ అవసరాలను దృష్టిలో ఉంచుకుని సరైన నిర్ణయం తీసుకోవడం ఎంతో అవసరం.

Read Also: బరువు తగ్గేందుకు మందులను వాడుతున్నారా? బీ అలర్ట్

Follow Us On: WhatsApp