తెలంగాణ ప్రభుత్వం ఇటీవల ఇందిరమ్మ చీరల(Indiramma Sarees) పథకం ప్రారంభించిన విషయం తెలిసిందే. ముఖ్యమంత్రి రేవంత్ రెడ్డి హైదరాబాద్‌లో ఈ పథకాన్ని లాంచనంగా ప్రారంభించారు. త్వరలో జిల్లాల్లో పంపిణీని మొదలుపెట్టనున్నారు. పంచాయతీ ఎన్నికల నాటికి ఈ పంపిణీ పూర్తి చేయాలని ప్రభుత్వం లక్ష్యంగా పెట్టుకున్నది. మహిళా మంత్రులు, అధికారులు కూడా చీరలు ఈ చీరలు కట్టుకోవాలని సీఎం రేవంత్ రెడ్డి సూచించారు. దీంతో ఈ పథకం మీద ఆసక్తి నెలకొన్నది. గతంలో బీఆర్ఎస్ ప్రభుత్వం పంపిణీ చేసిన బతుకమ్మ చీరలు నాణ్యతతో లేవని.. తాము మాత్రం నాణ్యమైన చీరలు పంపిణీ చేయబోతున్నామని ప్రభుత్వం చెబుతోంది. అయితే ఈ చీరలు ఎవరికి పంపిణీ చేస్తారు? కేవలం మహిళా సంఘాల్లో సభ్యులుగా ఉన్నవారికి మాత్రమేనా? ఈ పథకం ద్వారా చీరలు పొందాలంటే అర్హతలు ఏమిటి? అన్న చర్చ జరుగుతోంది. దీంతో రాష్ట్ర ప్రభుత్వం తాజాగా ఈ పథకానికి సంబంధించిన మార్గదర్శకాలు విడుదల చేసింది.
పేదరిక నిర్మూలన సంస్థ (సెర్ప్) మార్గదర్శకాలను విడుదల చేసింది. గ్రామీణ, పట్టణ ప్రాంతాల్లో లక్షలాది మంది మహిళలకు ఈ చీరలను చేరవేయడానికి ప్రభుత్వం ప్రత్యేక పర్యవేక్షణ వ్యవస్థను అమల్లోకి తెచ్చింది. ప్రభుత్వ మార్గదర్శకాల ప్రకారం, ప్రతి మండల కేంద్రంలో ముందుగా ప్రత్యేక కార్యక్రమాలు నిర్వహించిన అనంతరం గ్రామాల స్థాయికి పంపిణీ విస్తరించనున్నారు. ప్రతి మండలానికి సబ్‌కలెక్టర్ లేదా ఆర్డీవోలను పర్యవేక్షణ అధికారులుగా నియమిస్తూ, పంపిణీ పారదర్శకంగా జరిగేలా చర్యలు చేపట్టాలని సూచించారు.
ఆధార్–ఫోటో తప్పనిసరి
చీరల(Indiramma Sarees) పంపిణీ సమయంలో మహిళలు ఆధార్ కార్డు చూపించాలి. చీర తీసుకున్నట్లు ఫోటో కూడా తీసుకుంటారు. ప్రస్తుతం పెన్షన్‌ల పంపిణీలో ఉపయోగిస్తున్న ముఖగుర్తింపు యాప్‌ను ఈ పంపిణీ కార్యక్రమంలో కూడా వినియోగించనున్నట్లు సెర్ప్ తెలిపింది. మహిళా సంఘాల సభ్యుల వివరాలను యాప్‌లో ఆధార్ నంబర్‌తో నమోదు చేసి, అక్కడికక్కడే చీరలు అందజేస్తారు. మహిళా సంఘాల్లో సభ్యులుకాకపోతే, సభ్యత్వ నమోదు చేసి చీర ఇస్తారు. జిల్లాలో ప్రతి రోజు పంపిణీ వివరాలను క్రమం తప్పకుండా సెర్ప్ ప్రధాన కార్యాలయానికి జిల్లా కలెక్టర్లు పంపాల్సి ఉంటుంది.
18 ఏళ్లు దాటిన వారందరికీ చీరలు
పంచాయతీరాజ్, గ్రామీణాభివృద్ధి శాఖ మంత్రి సీతక్క సూచనలతో, రాష్ట్రవ్యాప్తంగా ఇంటింటికీ మహిళా సంఘాలు తిరిగి ‘బొట్టు పెట్టే’ విధానంలో చీరలు అందజేయాలని నిర్ణయించారు. 18 ఏళ్లు దాటిన ప్రతీ యువతి, మహిళకు చీర అందేలా ప్రభుత్వం చర్యలు చేపట్టింది. 15 నుండి 18 ఏళ్ల మైనర్ బాలికలకు సల్వార్ కమీజ్ లేదా లంగావోణీ వంటి దుస్తులను పంపిణీ చేసే ప్రతిపాదనను సెర్ప్ పరిశీలిస్తోంది. ఈపై తుది నిర్ణయం త్వరలో ప్రభుత్వం తీసుకోనుంది.
మెప్మా–సెర్ప్ విలీనం
గ్రామీణ, పట్టణ పేదరిక నిర్మూలన సంస్థల కార్యకలాపాలను ఏకీకృతం చేసే దిశగా ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా కోటి మంది మహిళలను స్వయం సహాయక సంఘాల కిందకి తీసుకురావడానికి పేటీ పేదరిక నిర్మూలన సంస్థ (మెప్మా)ను సెర్ప్‌లో విలీనం చేసింది. ఈ నేపథ్యంలో సెర్ప్ సీఈవో దివ్యా దేవరాజన్‌ను మెప్మా మేనేజింగ్ డైరెక్టర్‌గా అదనపు భాద్యతలు అప్పగిస్తూ ప్రభుత్వం ఉత్తర్వులు జారీ చేసింది.
కోటిమంది మహిళలకు పంపిణీ లక్ష్యం
సీఎం మాట్లాడుతూ, గ్రామీణ ప్రాంతాల్లో 65 లక్షల మంది మహిళలు, పట్టణాలైన మున్సిపాలిటీల్లో 35 లక్షల మంది మహిళలు— మొత్తం కోటి మంది మహిళలకు ఈ కార్యక్రమం ద్వారా చీరలు అందజేయనున్నట్లు స్పష్టం చేశారు. పంపిణీ సందర్భంలో మహిళల సమగ్ర వివరాలను సేకరించి భవిష్యత్తులో మరిన్ని సంక్షేమ పథకాలు చేరేలా డేటాబేస్‌ను రూపొందిస్తామని చెప్పారు.
Read Also: ఉపాసనకు లేడీ డాక్టర్స్ కౌంటర్.. అసలేం జరిగింది..!
Follow Us on : Pinterest
