కలం, స్పోర్ట్స్ : అహ్మదాబాద్ వేదికగా జరుగుతున్న ఐపీఎల్ 2026 ఫైనల్ (IPL 2026 Final) లో.. గుజరాత్ బ్యాటర్లకు చుక్కలు చూపించారు ఆర్సీబీ బౌలర్లు. గుజరాత్ టైటాన్స్ టాప్ ఆర్డర్ అంతా పేక మేడ తరహాలో కుప్పకూలింది. ఆర్ఆర్తో జరిగిన క్వాలిఫయర్-2లో విజృంభించిన కెప్టెన్ శుభ్మన్ గిల్.. ఈ మ్యాచ్లో మాత్రం 10 పరుగులకే చాప చుట్టేశారు. ఇదే విధంగా మిగిలిన వారు కూడా పేలవ ప్రదర్శనతో వెనుదిరగడంతో.. వాషింగ్టన్ సుందర్ ఒంటరి పోరాటం చేశారు. అతడి పోరాటంతోనే గుజరాత్ చెప్పుకోదగ్గ స్కోర్ చేసింది. ఒత్తిడిని తట్టుకుని వాషింగ్టన్ సుందర్ నిలబడంతో గుజరాత్ నిర్ణీత 20 ఓవర్లలో 8 వికెట్లు కోల్పోయి 155 పరుగులు చేసింది.
టాస్ ఓడి తొలుత బ్యాటింగ్ చేసిన గుజరాత్ జట్టుకు ప్రారంభంలోనే భారీ షాక్ తగిలింది. క్వాలిఫయర్-2లో సెంచరీతో చెలరేగిన కెప్టెన్ శుభ్మన్ గిల్ కేవలం 10 పరుగులు (8 బంతులు, 2 ఫోర్లు) మాత్రమే చేసి జోష్ హేజిల్వుడ్ బౌలింగ్లో రజత్ పటిదార్కు క్యాచ్ ఇచ్చి అవుటయ్యారు. ఆ వెంటనే మరో ఓపెనర్ సాయి సుదర్శన్ 12 పరుగుల (12 బంతులు, 2 ఫోర్లు) వద్ద భువనేశ్వర్ కుమార్ బౌలింగ్లో వికెట్ కీపర్ శర్మకు దొరికిపోయారు. దీనితో గుజరాత్ జట్టు 26 పరుగులకే ఓపెనర్లను కోల్పోయి కష్టాల్లో పడింది. ఆ తర్వాత వచ్చిన నిశాంత్ సింధు 18 బంతుల్లో 3 ఫోర్లతో 20 పరుగులు చేయగా, జోస్ బట్లర్ 23 బంతుల్లో ఒక ఫోర్తో 19 పరుగులు చేసి కాసేపు వికెట్ల పతనాన్ని అడ్డుకున్నారు. అయితే నిశాంత్ సింధును రసిక్ సలామ్, జోస్ బట్లర్ను కృనాల్ పాండ్యా అవుట్ చేయడంతో గుజరాత్ 73 పరుగులకే 4 వికెట్లు కోల్పోయింది.
ఇలాంటి కష్టసమయంలో వాషింగ్టన్ సుందర్ బాధ్యతాయుతమైన ఇన్నింగ్స్తో జట్టును ఆదుకున్నారు. ఆయన ఒకవైపు వికెట్లు పడుతున్నా ఒత్తిడిని అధిగమించి ఒంటరి పోరాటం చేశారు. సుందర్ 37 బంతులు ఎదుర్కొని 5 ఫోర్లతో కీలకమైన 50 పరుగులు సాధించి చివరి వరకు నాటౌట్గా నిలిచారు. మిడిల్ ఆర్డర్లో వచ్చిన అర్షద్ ఖాన్ కేవలం 6 బంతుల్లో 2 సిక్సర్లతో 15 పరుగులు చేసి వేగంగా స్కోరు బోర్డును పరిగెత్తించారు. కానీ ఆయనను హేజిల్వుడ్ అవుట్ చేశారు. ఆ తర్వాత వచ్చిన రాహుల్ తెవాటియా 7 పరుగులు, జేసన్ హోల్డర్ 7 పరుగులు, రషీద్ ఖాన్ 7 పరుగులు చేసి తక్కువ స్కోరుకే వెనుదిరిగారు. చివరలో కగిసో రబాడ 3 పరుగులతో నాటౌట్గా నిలవడంతో గుజరాత్ టైటాన్స్ నిర్ణీత 20 ఓవర్లలో 8 వికెట్ల నష్టానికి 155 పరుగులు చేయగలిగింది. గుజరాత్ ఇన్నింగ్స్లో ఎక్స్ట్రాల రూపంలో 5 పరుగులు వచ్చాయి.
ఆర్సీబీ బౌలర్లలో రసిక్ సలామ్ అత్యంత అద్భుతంగా బౌలింగ్ చేశారు. ఆయన తన 4 ఓవర్లలో కేవలం 27 పరుగులిచ్చి 3 వికెట్లు పడగొట్టి గుజరాత్ను కోలుకోలేని దెబ్బతీశారు. సీనియర్ బౌలర్ భువనేశ్వర్ కుమార్ 4 ఓవర్లలో 29 పరుగులిచ్చి 2 వికెట్లు సాధించగా, జోష్ హేజిల్వుడ్ 4 ఓవర్లలో 37 పరుగులిచ్చి 2 వికెట్లు తీసుకున్నారు. స్పిన్నర్ కృనాల్ పాండ్యా 4 ఓవర్లలో 23 పరుగులు మాత్రమే ఇచ్చి ఒక వికెట్ దక్కించుకున్నారు. మరో బౌలర్ జాకబ్ డఫీ 4 ఓవర్లలో 38 పరుగులిచ్చినప్పటికీ వికెట్లేమీ సాధించలేకపోయారు. మొదటి ఇన్నింగ్స్ ముగిసేసరికి ఆర్సీబీ విజయం సాధించి ఐపీఎల్ టైటిల్ గెలవాలంటే 20 ఓవర్లలో 156 పరుగులు చేయాల్సి ఉంది. ఫైనల్ మ్యాచ్ ఒత్తిడి నేపథ్యంలో ఈ లక్ష్య ఛేదనలో ఆర్సీబీ బ్యాటర్లు ఎలా రాణిస్తారో, గుజరాత్ బౌలర్లు ఈ స్కోరును ఎలా డిఫెండ్ చేసుకుంటారో చూడాలి.
